(ក្រចេះ)៖ ​សមាជិកក្រុមប្រឹក្សា​ស្រុកស្នូល ខេត្តក្រចេះ​ មកពីគណបក្សសង្រ្គោះជាតិ បានប្រកាសជាសាធារណៈ ដើរចេញពីបក្សរបស់ខ្លួន ហើយមកសូំរួមរស់ជាមួយគណបក្សប្រជាជនកម្ពុជា ដោយសារតែគាត់បានឃើញថា លោក កឹម សុខា ជាជនក្បត់ជាតិ សម្លាប់ជាតិឯង និងបម្រើបរទេស។​ នេះបើតាមលិខិតប្រកាសចុះចូល ដែលអង្គភាព Fresh News ទទួលបាន​នៅ​រសៀលថ្ងៃទី១៤ ខែវិច្ឆិកា ឆ្នាំ២០១៧នេះ។

លោក ឡាច គា អាយុ៤៤ឆ្នាំ ​​​មានទីលំនៅភូមិគ្រញូងសែនជ័យខាងជើង ​ឃុំគ្រញូងសែនជ័យ ស្រុកស្នួល មានតួនាទីជាសមាជិកក្រុមប្រឹក្សាស្រុកស្នួល បានសរសេក្នុងលិខិតលាឈប់ ពីគណបក្យសង្រ្គោះជាតិថា ដោយមើលឃើញអំពើក្បត់របស់លោក កឹម សុខា និងគណបក្យសង្រ្គោះជាតិ បានឃុបឃិតជាមួយបរទេស ចង់បំផ្លិចបំផ្លាញប្រទេសជាតិ ទើបលោកសម្រេចចិត្តសុំចូលជា សមាជិកគណបក្យប្រជាជន។

តាមលិខិតដែលអង្គភាព Fresh News ទទួលបានលោក ឡាច គា ​បានបញ្ជាក់យ៉ាងដូច្នេះថា «​​បន្ទាប់ពីដឹងថា លោក កឹម សុខា និងបក្ខពួកជាជនក្បត់ជាតិ និងប្រពន្ធបក្សសង្គ្រោះជាតិ សុខចិត្តឱនក្បាលបម្រើពួកអាយ៉ងបរទេស ដើម្បីតែអំណាចបក្ខពួកខ្លួន ដោយមិនគិតពីគ្រោះមហន្ដរាយចំពោះប្រជាជន និងប្រទេសជាតិមាតុភូមិខ្លួនឯង»។

សូមជំរាបថា កាលពីព្រឹកថ្ងៃទី០៤ ខែវិច្ឆិកា ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា បានប្រកាសអំពាវនាវតាមរយៈ វិដេអូចំនួន២៦នាទី នៅលើបណ្តាញទំនាក់ទំនង Facebook របស់សម្តេចដោយមានប្រសាសន៍ អំពីការផ្តល់ឱកាសដល់បងប្អូនសមាជិក គណបក្សសង្គ្រោះជាតិ បានបន្តអាជីពនយោបាយជាមួយ គណបក្សប្រជាជនកម្ពុជា ក្រោយពេលដែលគណបក្សសង្រ្គោះជាតិ ត្រូវបានកាត់រំលាយដោយតុលាការកំពូលនៅគឺថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ៕ (សូមទស្សនាវិដេអូ ប្រសាសន៍សម្តេចតេជោ)៖​