(កណ្ដាល)៖ ឈើគ្រញូងជាង៣តោន ដែលត្រូវបានកម្លាំងនគរបាលខេត្តកណ្តាលចុះទៅបង្ក្រាប នៅក្រុងតាខ្មៅ កាលពីចុងសប្ដាហ៍កន្លងមក ដោយឃាត់មនុស្សចំនួន១៩នាក់ នៅថ្ងៃទី១៣ ខែវិច្ឆិកា ឆ្នាំ២០១៧នេះ តុលាការខេត្តកណ្តាលបានចេញដីកាឃុំខ្លួនមនុស្សចំនួន៤នាក់ ដាក់ពន្ធនាគារ។
មន្រ្តីតុលាការបានឲ្យដឹងថា មនុស្សចំនួន៤នាក់ ត្រូវបានលោកស្រី ពេជ ម៉ារ៉ែន ចៅក្រមស៊ើបសួរសាលាដំបូងខេត្តកណ្ដាល សម្រេចឃុំខ្លួនដាក់ពន្ធនាគារបណ្តោះអាសន្នហើយ បន្ទាប់ពីត្រូវបានព្រះរាជអាជ្ញារង ចោទប្រកាន់ជាផ្លូវការ។
មនុស្សទាំង៤នាក់ មានស្រីម្នាក់ ដែលមានឈ្មោះ ដូ យ៉ាំងឡាំ ឈ្មោះ លួង ចន្ធី ឈ្មោះ ដាំង យាំតាំ និង ឈ្មោះ ឱម តុលារតន៍ ត្រូវបានលោកឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល ចោទប្រកាន់ពីបទ «ប្រមូលផល អនុផលព្រៃឈើប្រភេទមានដោយកម្រ (ក្រាក់ គ្រញូង)» ប្រព្រឹត្តនៅភូមិតាក្តុល សង្កាត់តាក្តុល ក្រុងតាខ្មៅ កាលពីថ្ងៃទី១០ ខែវិច្ឆិកា ឆ្នាំ២០១៧ តាមមាត្រា៩៨នៃច្បាប់ស្ដីពីព្រៃឈើ។
ដោយឡែកម្ចាស់ទីតាំងឈ្មោះ អ៊ី ស្រុន ភេទប្រុស ពុំត្រូវបានសមត្ថកិច្ចឃាត់ខ្លួនទេ ដោយសារតែរកពុំទាន់ឃើញបទល្មើស។ ប៉ុន្តែតុលាការកំពុងបន្តនីតិវិធី ហើយបើរកឃើញថា ម្ចាស់ផ្ទះមានជាប់ពាក់ព័ន្ធ តុលាការនឹងមានចំណាត់ការបន្តទៀត។
សូមបញ្ជាក់ថា ឈើគ្រញូងរាប់ពាន់កំណាត់ ត្រូវកម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្តាល ក្រោមការបញ្ជាផ្ទាល់ពីលោកឧត្តមសេនីយ៍ទោ អ៊ាវ ចំរើន និងក្រោមការសម្របសម្រួលពីតំណាងអយ្យការ បានចុះទៅបង្ក្រាបនៅក្នុងផ្ទះទីតាំងស្តុកមួយកន្លែង តាមបណ្តោយផ្លូវលេខ១១៥ ស្ថិតក្នុងភូមិតាក្ដុលត្បូងសង្កាត់តាក្ដុល ក្រុងតាខ្មៅ ខេត្តកណ្តាល កាលពីវេលាម៉ោងជាង១០យប់ ថ្ងៃទី៩ ខែវិច្ឆិកា ឆ្នាំ២០១៧។
លោក លី សុជាតិ នាយរងការិយាល័យ នគរបាលប្រឆាំងបទល្មើសសេដ្ឋកិច្ចខេត្តកណ្ដាល បានឱ្យដឹងថាផ្ទះស្តុកឈើគ្រញូងខាងលើ មានម្ចាស់ ផ្ទះឈ្មោះ អ៊ី ស្រុន ភេទប្រុស ជួលផ្ទះ ទៅឱ្យក្រុមហ៊ុន បណ្ដាញទូរស័ព្ទ ដាក់សម្ភារផ្សេងៗ និងស្តុកឈើ។
កម្លាំងបានចុះឆែកឆេរលំនៅដ្ឋានស្តុកឈើរខាងលើ រកឃើញឈើក្រញូងជាច្រើនពាន់កំណាត់ ផ្ទុកក្នុងរថយន្តពីរគ្រឿង ម៉ាកហ៊ីយ៉ាន់ដាយ និងម៉ាកកាមរី និងឈើគ្រញូង ច្រកក្នុងបាវជាច្រើន បាវ និងបានឃាត់ខ្លួនមនុស្ស១៩នាក់ មកសាកសួរនៅស្នងការនគរបាលខេត្ត ដើម្បីរកម្ចាស់ឈើខាងលើនេះ។
សមត្ថកិច្ចបានតាមប្រមាញ់ចាប់រថយន្តដឹកឈើគ្រញូងខាងលើ ដែលកំពុងបើកតាមផ្លូវជាតិ ពេលនោះ គឺកម្លាំងបានតាមរថយន្តខាងលើរហូត ដល់រថយន្តនោះបើចូលផ្ទះមួយកន្លែងនៅតាមបណ្តោយផ្លូវលេខ១១៥ និងបានបិតទ្វាផ្ទះជិត។ ភ្លាមនោះ លោកក៏បានសុំគោលការណ៍ ធ្វើការឆែកឆេរភ្លាមៗ រកឃើញឈើគ្រញូងជាច្រើនពាន់កំណាត់។
លោកបញ្ជាក់ថា ឈើទាំងនោះ និងរថយន្តត្រូវបាន ប្រគល់ឱ្យសង្កាត់រដ្ឋបាល ព្រៃឈើតាខ្មៅ សរុបចំនួន៣.៣០៥ គីឡូក្រាម ដើម្បី យកទៅរក្សាទុក និងបន្តនីតិវិធីតាមផ្លូវច្បាប់៕
