(ភ្នំពេញ)៖ តារាចម្រៀងដែលកំ​ពុងមានប្រជាប្រិយភាពខ្លាំង នៅកម្ពុជា គឺកញ្ញា Adda ម្ចាស់បទ «ពីរនាក់​បានហើយ» បន្ទាប់ពីមានភាពជោគជ័យ​ខ្លាំង គួរឲ្យកត់សំគាល់ និងមមាញឹកនឹងការងារសិល្ប: ផ្នែកនិពន្ធ ច្រៀង និង ផលិតវីដេអូចម្រៀងដោយខ្លួនឯងនោះរួចមក នាងទើបនឹងចេញបទចម្រៀងថ្មីសន្លាង ដែលកំពុងអង្រួនដួងចិត្តយុវវ័យ នាពេលបច្ចុប្បន្ននេះ​ គឺបទ «មានអ្នកថែឬនៅ» ដែលនិពន្ធទំនុកច្រៀង និងបទភ្លេងដោយនាងផ្ទាល់ និងមានការសហការរៀបរៀងតន្ត្រីដោយ Noly records។ ជាពិសេសបទនេះ គឺចេញក្នុងឱកាសអបអរ ថ្ងៃខួបកំណើតរបស់នាង​តែម្ដង។

នៅក្នុងវីដេអូបទចម្រៀង ដែលទើបនឹងសម្ពោធការចេញផ្សាយ កាលពីល្ងាចថ្ងៃសៅរ៍ ទី​១១ ខែវិច្ឆិកានេះ អមជាមួយនឹងពិធីខួបកំណើត ដ៏អធិកអធមរបស់នាងផងនោះ គេសង្កេតឃើញថា វីដេអូចម្រៀងមួយនេះ ពិតជាមានភាពខុសប្លែកពី វីដេអូចម្រៀងផ្សេងៗរបស់នាង ដោយសាច់រឿងនៅក្នុងនោះ ហាក់បីដូចជារឿងពិតរបស់សាមីខ្លួន និងមានភាពផ្អែមល្ហែមខុសធម្មតា។ អ្វីដែលគួរឲ្យភ្ញាក់ផ្អើលនោះ គឺនៅពេលដែលការចាក់សម្ពោធវីដេអូ ត្រូវបានបញ្ចប់ នាងក៏ប្រកាសជាសាធារណ:តែម្តង អំពីទំនាក់ទំនងរបស់នាង និងតួប្រុសសំខាន់ក្នុងវីដេអូនោះ ដែលមានឈ្មោះ អេលែន តាន់ គឺពិតដូចជាអ្នកទាំងអស់គ្នា បានគិតមែន។

ស្រីស្រស់ Adda បានថ្លែងឲ្យដឹងថា ពួកគេមានការស្រឡាញ់ពេញចិត្តគ្នា អស់មួយ​រយ:ពេលមកហើយ រហូតដល់មានការសរសេរ​ ជាបទចម្រៀង និងផលិតវីដេអូនេះឡើង ដើម្បីចែករំលែកដល់អ្នកដែលស្រឡាញ់គាំទ្រ កញ្ញាអោយបានដឹងទៀតផង។ តាមការបញ្ជាក់ នាងបានជឿជាក់ថា អ្នកគាំទ្ររបស់នាងដ៏ពិតប្រាកដ ពួកគេនឹងសប្បាយចិត្ត នៅពេលដែលឃើញកញ្ញាសប្បាយចិត្ត ហើយកញ្ញាក៏មិនចង់មានអ្វីលាក់លៀមនឹងអ្នកគាំទ្រដែរ ព្រោះនេះជារឿងធម្មតាទៅហើយ ដែលមនុស្សស្រឡាញ់គ្នាមិនគួរ មានការលាក់បាំង ឬគេចវេសណាមួយនោះទេ ហើយនាងរីករាយនឹងទទួលយកការពិត និងហ៊ាននិយាយដោយបើកចំហ អំពីទំនាក់ទំនងមួយនេះ ដែលទង្វើនេះត្រូវបានគ្រប់គ្នាកោតសរសើរ ផងដែរ។

នាងបញ្ជាក់ថា ក្រឡេកមកមើលវីដេអូ «មានអ្នកថែឬនៅ» វិញ គឺពិតជាមានគុណភាពល្អក្នុងកំរិតស្តង់ដា ដោយនាងបានឲ្យដឹងថា នេះជាការផលិតលើកទីមួយរបស់ Studio A/3 Production ដែលជាផលិតកម្មរបស់នាងផ្ទាល់បង្កើតឡើង ដើម្បី​ផលិតវីដេអូចម្រៀង និងស្ប៉តពាណិជ្ជកម្មផ្សេងៗ ដែលកញ្ញាមិនផ្តោតទៅលើបរិមាណទេ តែផ្តោតទៅលើគុណភាព។ បើចង់ដឹងថា គូស្នេហ៍ពិតរបស់កញ្ញា អេដា ជានរណា សង្ហាប៉ុណ្ណា និងសមគ្នាប៉ុណ្ណានោះ សូមតាមដានទស្សនាវីដេអូចម្រៀង «មានអ្នកថែរឬនៅ» ទាំងអស់គ្នា៖