(កំពង់ចាម)៖ អភិបាលខេត្តកំពង់ចាម​ លោក គួច ចំរើន នៅរសៀលថ្ងៃទី១០ ខែវិច្ឆិកា ឆ្នាំ២០១៧នេះ បានចុះសួរសុខទុក្ខ និងនាំអំណោយជូនកម្មការិនីជិត១០០នាក់ ដែលរងរបួសដោយសារ គ្រោះថ្នាក់ចរាចរណ៍ ក្រឡាបរថយន្ដដឹកកម្មករ នៅភូមិរវៀង ឃុំខ្នុរដំបង ស្រុកជើងព្រៃ។

ក្នុងឱកាសនោះ កម្មការិនីដែលរបួសទាំងអស់ ត្រូវបានលោក គួច ចំរើន ជួយថវិកាម្នាក់៥០,០០០រៀល និងកម្មការិនីដែលមានផ្ទៃពោះ ទទួលបានថវិកាម្នាក់១៥០,០០០រៀល។

ស្នងការនគរបាលខេត្តកំពង់ចាម លោកឧត្តមសេនីយ៍ត្រី ឯម កុសល បានប្រាប់អង្គភាព Fresh News ឲ្យដឹងថា គ្រោះថ្នាក់ចរាចរណ៍នេះ បានកើតឡើងនៅវេលាម៉ោងប្រមាណ៧ព្រឹក ថ្ងៃទី១០ ខែវិច្ឆិកា ឆ្នាំ២០១៧នេះ បង្កឡើងដោយ រថយន្តម៉ាកហ៊ឺយ៉ាន់ដាយខ្លួនឯងតែម្ដង ពាក់ស្លាកលេខកំពង់ចាម​3A-4553 បើកបរដោយឈ្មោះ ឆៃ គីមហេង ទីលំនៅភូមិពោធិ៍ស្ទាង ឃុំសណ្ដែក ស្រុកបាធាយ ខេត្តកំពង់ចាម។

បើតាមលោកឧត្តមសេនីយ៍ស្នងការ មុនពេលកើតហេតុរថយន្ដខាងលើ បានដឹកកម្មកររោងចក្របើកពីទិសខាង​លិចទៅកើត ចូលរោងចក្រជូហួយ លុះមកដល់ចំណុចកើតហេតុ បានបត់ឆ្វេងបម្រុងចូលរោងចក្រជូហួយ ប៉ុន្ដែពេលបត់ចូលនោះអ្នកបើកបរបួងចង្កូតខ្លាំងពេក ក៏បណ្ដាលឲ្យក្រឡាប់ខ្លួនឯងតែម្ដង។​

ក្នុងករណីគ្រោះថ្នាក់ចរាចរណ៍ទាំងព្រឹកព្រលឹមនេះ បណ្ដាលឲ្យកម្មការិនី​ចំនួន៩២ នាក់រងរបួស ក្នុងនោះ កម្មការនី នៅរោងចក្រ​ខាលីនតុន ចំនួន​៥២​នាក់ ក្នុងនោះ​មានផ្ទៃពោះ​ចំនួន៤នាក់ និងកម្មការនី នៅរោងចក្រជូហួយ ចំនួន​៤០​នាក់ បានបញ្ជូនមកព្យាបាលនៅមន្ទីរពេទ្យ​ភ្នំពេញ ចំនួន​០៣នាក់ បញ្ជូនទៅមន្ទីរពេទ្យខេត្ត០៥​នាក់ និងនៅមន្ទីរពេទ្យស្រុកជើងព្រៃ ចំនួន​៨៣​នាក់ ជាកម្មការិនី នៅ​ឃុំសណ្តែក ឃុំត្រប់ និង​ឃុំទំនប់ ស្រុកបាធាយ​​ ប៉ុន្ដែទោះជាយ៉ាងណា ក្រោយកើតហេតុភា្លមៗ កម្លាំងនគរបាលនៃអធិការដ្ឋាននគរបាលស្រុកជើងព្រៃ ដែលដឹកនាំដោយលោក ប្រាក់ សុគន្ធ អធិការនគរបាលស្រុក បានបញ្ជូនជនរងគ្រោះទាំងអស់​ទៅសង្គ្រោះមន្ទីរពេទ្យបង្អែកស្រុកជើងព្រៃ ​ចំណែកជនរងគ្រោះដែលរបួសធ្ងន់ចំនួន៤នាក់​ បានបញ្ជូនទៅសង្គ្រោះនៅភ្នំពេញ៕