(ភ្នំពេញ)៖ សហភាពសហព័ន្ធសហជីពជាតិកម្ពុជា (CCTU) កាលពីពេលថ្មីៗកន្លងទៅនេះ បានបោះឆ្នោតគាំទ្រសហភាព សហជីពចិន (ACFTU) នៅទីក្រុងហ្សឺណែវ ប្រទេសស្វីស ជាសមាជិកពេញសិទ្ធិនៃអង្គការអាយឡូ (ILO) ក្នុងចំណោម សំឡេងជាង១០០។
លោក ជួន មុំថុល ប្រធានសហភាពសហភាពសហព័ន្ធសហជីពជាតិកម្ពុជា បានលើកឡើងដូចនេះ ក្នុងពីធីប្រគល់សម្ភារៈ ការិយាល័យ និងកិច្ចជួបពិភាក្សាការងារ ជាមួយគណប្រតិភូសហភាពសហជីពចិន (ACFTU) ដឹកមាំដោយលោក ជាវ ខាយហ័រ(Joao Kai He) នៅទីស្នាក់ការសហភាពសហព័ន្ធសហជីពជាតិកម្ពុជា ស្ថិតក្នុងសង្កាត់បឹងព្រលឹត ខណ្ឌ៧មករា នាព្រឹកថ្ងៃទី១០ ខែវិច្ឆិកា ឆ្នាំ២០១៧។
លោក ជួន មុំថុល បានថ្លែងដោយស្វាគមន៍ដំណើរទស្សនកិច្ចគណៈប្រតិភូសហភាព សហជីពចិន (ACFTU) មកកាន់សហភាពសហភាពសហព័ន្ធសហជីពជាតិកម្ពុជា (CCTU) ពីថ្ងៃទី០៩ ដល់ថ្ងៃទី១២ ខែវិច្ឆិកា ឆ្នាំ២០១៧នៅលើទឹកដីនៃកម្ពុជា និងសូមថ្លែងអំណរគុណសហជីពចិនដែលផ្តល់សម្ភារៈការិយាល័យនូវកុំព្យូទ័រដៃ២០គ្រឿង ព្រីនធឺ២០គ្រឿង ម៉ាស៊ីនហ្វូតូកូពី ០១គ្រឿង និងLCD០១គ្រឿង ជូន CCTU ដែលនឹងបញ្ជូនមកក្នុងពេលឆាប់ៗខាងមុខនេះ។
លោកបានបន្តថា សហភាពសហព័ន្ធសហជីពជាតិកម្ពុជា បានទំនាក់ទំនងជាមួយសហភាពសហជីពចិន ក្នុងឆ្នាំ១៩៩៨ បន្ទាប់មកសហជីពទាំង២ បានទំនាក់ទំនងផ្លាស់ប្តូរទស្សនកិច្ចគ្នារហូតដល់បច្ចុប្បន្ន ហើយបានសហការគ្នានៅថ្នាក់ជាតិ និងអន្តរជាតិ ដោយជួយគាំទ្រគ្នាទៅវិញទៅមក។ មេសហជីពរូបនេះបន្តទៀតថា នៅរសៀលថ្ងៃដដែលនេះ លោកនឹងនាំប្រតិភូ សហភាពសហជីពចិន ជួបលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅទីស្តីការក្រសួង ដើម្បីស្វែងយល់ពីវិស័យការងារនៅកម្ពុជា និងសូមគណៈប្រតិភូទាំងអស់ ស្នាក់នៅកម្ពុជាប្រកបដោយសុវត្ថិភាព។
ជាមួយគ្នានេះ លោក ជាវ ខាយហ័រ (Joao Kai He) អនុប្រធានសហភាពសហជីពចិន (ACFTU) បានថ្លែងថា លោកសូមវាយតម្លៃខ្ពស់ នូវទំនាក់ទំនងយ៉ាងជិតស្និត រវាងសហជីពប្រទេសទាំងពីរ និងសូមថ្លែងអំណរគុណដល់សហភាពសហព័ន្ធសហជីពជាតិកម្ពុជា ដែលបានបោះឆ្នោតគាំទ្រសហភាពសហជីពចិន បានចូលជាសមាជិកពេញសិទ្ធិអង្គការអាយឡូ នៅទីក្រុងហ្សឺណែវកន្លងមក។
លោក ជាវ ខាយហ័រ ក៏បានស្នើអញ្ជើញលោក ជួន មុំថុល និងសហការីទៅបំពេញទស្សនកិច្ចនៅប្រទេសចិន ដើម្បីស្វែងយល់ពីសហភាពសហជីពចិន ដកបទពិសោធន៍ រៀនសូត្រពីគ្នាទៅវិញទៅមក ឲ្យកាន់តែស៊ីជម្រៅថែមទៀត។
ទាក់ទងនឹងជំនួយសម្ភារៈការិយាល័យ ដល់សហភាពសហព័ន្ធសហជីពជាតិកម្ពុជា លោក ជាវ ខាយហ័រ បញ្ជាក់ថា នឹងបញ្ជូនមកក្នុងពេលឆាប់ៗ ខាងមុខនេះ ហើយលោកនឹងបញ្ជូនក្រុមអ្នកបច្ចេកទេស មកសិក្សាតម្រូវការបន្ថែមរបស់ CCTU ដូចជាការជួសជុលការិយាល័យជាដើម៕
