(ភ្នំពេញ)៖ រដ្ឋាភិបាលជប៉ុន បានប្រគល់គ្រឿងឥស្សរិយយស «Grand Cordon of the Order of the Rising Sun» ជូនកិត្តិសេដ្ឋាបណ្ឌិត គាត ឈន់ អតីតឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៃកម្ពុជា និងជាអតីតអនុប្រធាន នៃក្រុមប្រឹក្សាអភិវឌ្ឍន៍កម្ពុជា ដើម្បីជាការទទួលស្គាល់ការចូលរួមវិភាគទានរបស់កិត្តិសេដ្ឋាបណ្ឌិត ក្នុងការពង្រឹងកិច្ចសហប្រតិបត្តិការ និងទំនាក់ទំនងមិត្តភាពរវាងប្រទេសកម្ពុជា និងជប៉ុន។
ឥស្សរជនឆ្នើមចំនួន១៧ រូបទៀត ដែលទទួលគ្រឿងឥស្សរិយយសនេះ សម្រាប់សរទរដូវឆ្នាំ២០១៧ នេះ។ ឥស្សរជនដែលជាសហលាភីរបស់កិត្តិសេដ្ឋាបណ្ឌិត គាត ឈន់ ទាំងនោះ មានឥស្សរជនដ៏ឆ្នើមរបស់ជប៉ុន ដូចជាលោក Wataru Aso អតីតអភិបាលខេត្ត Fukuoka និងឥស្សរជន ដែលជាអតីតថ្នាក់ដឹកនាំនៃប្រទេសនានាលើសាកលលោក ដូចជាលោក Jean-Marc Ayrault អតីតនាយករដ្ឋមន្ត្រីនៃសាធារណរដ្ឋបារាំង និងលោកស្រី Helen Clark អតីតនាយករដ្ឋមន្ត្រីនៃប្រទេសណូវែលហ្សេឡង់ជាដើម។
លោកកិត្តិសេដ្ឋាបណ្ឌិត គាត ឈន់ ដែលត្រូវបានផ្សព្វផ្សាយតាមបណ្តាញសង្គម Facebook នៃប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ កាលពីថ្ងៃទី៩ ខែវិច្ឆិកា ឆ្នាំ២០១៧ កិត្តិសេដ្ឋាបណ្ឌិត បានសំដែងនូវមនោសញ្ចេតនារំភើបរីករាយ និងអំណរគុណដ៏ជ្រាលជ្រៅជូនរដ្ឋាភិបាលជប៉ុន ដែលបានផ្តល់នូវគ្រឿងឥស្សរិយយសដ៏ខ្ពង់ខ្ពស់បំផុត «The Grand Cordon of the Order of the Rising Sun» ហើយក៏បានសំដែងនូវអំណរគុណចំពោះការយោគយល់របស់រដ្ឋាភិបាលជប៉ុន ដែលមានការអធ្យាស្រ័យដល់រូបលោក ដោយសារបញ្ហាសុខភាព លោកពុំបានចូលរួមតាមការអញ្ជើញទៅក្នុងព្រះរាជពិធីសវនាការជាមួយព្រះចៅអធិរាជជប៉ុន Akihito ដែលប្រព្រឹត្តទៅនាថ្ងៃទី០៧ ខែវិច្ឆិកា ឆ្នាំ២០១៧ នៅព្រះបរមរាជវាំងនាទីក្រុងតូក្យូ ប្រទេសជប៉ុន ហើយដែលព្រះអង្គសព្វព្រះរាជហឬទ័យប្រោសព្រះរាជប្រទាននូវគ្រឿងឥស្សរិយយសដោយព្រះអង្គផ្ទាល់ ដោយមានវត្តមានដ៏ខ្ពង់ខ្ពស់របស់ឯកឧត្តមនាយករដ្ឋមន្ត្រី Shinzo Abe ទោះបីជាជម្រៅទឹកចិត្តនិងមនោសញ្ចេតនា កិត្តិសេដ្ឋាបណ្ឌិតមានបំណងទៅទទួលដោយផ្ទាល់នូវគ្រឿងឥស្សរិយយសពីព្រះអង្គ ក៏ដោយ។
កិត្តិសេដ្ឋាបណ្ឌិត គាត ឈន់ បានរំលឹកអំពីផលគុណនៃកត្តាធំៗចំនួនបី ដែលជាវិភាគទាននាំឱ្យឯកឧត្តមទទួលបានគ្រឿងឥស្សរិយយសដ៏ឧត្តុង្គឧត្តមបំផុត «The Grand Cordon of the Order of the Rising Sun» នៃប្រទេសជប៉ុននេះ៖
ទី១-កិច្ចសហប្រតិបត្តិការទ្វេភាគីកម្ពុជា-ជប៉ុន បានបន្តពីមនុញ្ញកុសលនៃព្រះរាជកេរមត៌កដ៏ថ្លៃថ្លាបំផុត របស់ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ដែលទ្រង់បានឡាយព្រះហស្តលេខាលើសន្ធិសញ្ញាមិត្តភាពកម្ពុជា-ជប៉ុន ឆ្នាំ១៩៥៥ ដើម្បីមិត្តភាពនិងកិច្ចសហប្រតិបត្តិការរវាងប្រទេសទាំងពីរ។
ទី២-អគ្គមគ្គទេសភាពដ៏ឧត្តុង្គឧត្តម ប្រកបដោយប្រសិទ្ធភាព និងស័ក្តសិទ្ធិភាព ពោរពេញដោយគតិបណ្ឌិត ទេពកោសល្យដ៏ប៉ិនប្រសប់ បញ្ញាញាណវៃឈ្លាស មានចក្ខុវិស័យវែងឆ្ងាយ និងប្រាកដនិយម របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ។សម្ដេចតេជោ បានដើរតួដោយឡែក ជានិម្មាបនិកនៃទំនាក់ទំនង និងកិច្ចសហប្រតិបត្តិការជាមួយប្រទេសជប៉ុន ពោលគឺសម្ដេចតេជោ ជាអ្នកលើកនយោបាយផង ហើយជាអ្នកដឹកនាំអនុវត្តដោយផ្ទាល់ផង។ សម្តេចតេជោ ជាអ្នកជំរុញយ៉ាងខ្លាំងក្លា ដើម្បីប្រទេសជប៉ុនមានតួនាទីចូលរួមក្នុងកងកម្លាំងថែរក្សាសន្តិភាព (PKO) ក្រោមឆ័ត្រនៃអង្គការសហប្រជា-ជាតិ ជាលើកដំបូងបំផុត ក្នុងប្រវត្តិសាស្ត្ររបស់ខ្លួន។ ក្នុងការអភិវឌ្ឍប្រទេស សម្តេចតេជោ និងសមភាគីជប៉ុនគឺលោកShinzo Abe បានចុះហត្ថលេខាលើកិច្ចព្រមព្រៀងស្តីពីសេរីភាវូបនីយកម្ម ការជំរុញនិងការការពារវិនិយោគ នេះជាលើកទីមួយហើយក្នុងប្រវត្តិសាស្ត្រនៃកិច្ចព្រមព្រៀងវិនិយោគទ្វេភាគី (BIT) ដែលមាននាយករដ្ឋមន្ត្រីនៃប្រទេសពីរចុះហត្ថលេខា ហើយលើការអនុវត្តជាក់ស្តែង សម្ដេចតេជោនាយករដ្ឋមន្ត្រីក៏បានដើរតួនាទីជាឆ្មបសម្រាប់វិនិយោគិនជប៉ុន ដូចជាការបង្កើតរោងចក្រផលិតឧបករណ៍អេឡិកត្រូនិក
ទី៣.កិត្តិសេដ្ឋាបណ្ឌិត គាត ឈន់ បានបញ្ជាក់ថារូបលោកគ្រាន់តែជាអគ្គសេនាធិការរបស់សម្ដេចតេជោ ក្នុងប្រព័ន្ធតួអង្គនៃការអនុវត្តគោលនយោបាយ និងនយោបាយដែលដាក់ចេញនិងដឹកនាំអនុវត្តផ្ទាល់ ដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា។ កិត្តិសេដ្ឋាបណ្ឌិត បានគោរពសំដែងនូវកតញ្ញុតាធម៌ និងកតវេទិតាធម៌ដ៏ជ្រាលជ្រៅបំផុត ជូនចំពោះគុណូបការៈដ៏មហាធំធេង ឥតត្រើយត្រាណរបស់ សម្ដេចតេជោ ចំពោះលោក។ គ្រឿងឥស្សរិយយស និងជ័យលាភីនានា ដែលកិតិ្តសេដ្ឋាបណ្ឌិតបានទទួលពេលនេះ និងពេលមុនៗ គឺបានមកដោយសារឯកឧត្តមមានភ័ព្វសំណាង និងកិត្តិយសដ៏ធំធេងទទួលទំនុកទុកចិត្តដ៏មុតមាំ ពីសំណាក់ ដែលមានចំពោះលោកជានិច្ច ក្នុងការដឹកនាំការងារ ជាពិសេសជាមួយប្រទេសជប៉ុន ដែលធ្វើឱ្យកិច្ចសហប្រតិបត្តិការកម្ពុជា-ជប៉ុន បន្តសម្រេចបានផ្លែផ្កាដ៏ត្រចះត្រចង់។ កិត្តិសេដ្ឋាបណ្ឌិត បានរំលឹកដល់តួអង្គផ្ទាល់នៃកិច្ចសហប្រតិបត្តិការកម្ពុជា-ជប៉ុន ដែលបានរួមគ្នាជាក្រុមក្នុងការអនុវត្តនូវនយោបាយនានារបស់សម្តេចតេជោនាយករដ្ឋមន្ត្រី ក្នុងនោះមានជាអាទិ៍ លោកបណ្ឌិតសភាចារ្យ អូន ព័ន្ធមុន្នីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោករដ្ឋមន្ត្រី សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា លោករដ្ឋមន្ត្រី ឈៀង យ៉ាណារ៉ា អគ្គលេខាធិការគណៈកម្មាធិការនីតិសម្បទានិងអភិវឌ្ឍន៍កម្ពុជា និងសហសេវិកទំាងអស់ក្នុងគណៈរដ្ឋមន្រ្តី ក្នុងស្ថាប័ននីតិប្បញ្ញត្តិ ព្រមទាំងសហការីទាំងអស់ទាំងនៃក្រសួង ស្ថាប័នថ្នាក់ជាតិ និងថ្នាក់ក្រោមជាតិ ក៏ដូចជាអង្គការមិនមែនរដ្ឋាភិបាល និងជនជាតិកម្ពុជាដែលពាក់ព័ន្ធ ព្រមទាំងភ្នាក់ងារ-អង្គភាពរដ្ឋផ្សេងៗ។
កិត្តិសេដ្ឋាបណ្ឌិត គាត ឈន់ បានគូសបញ្ជាក់ថា ការទទួលបានកិត្តិយសនិងគ្រឿងឥស្សរិយយសដ៏ថ្លៃថ្លានេះ មិនអាចកាត់ផ្តាច់បានពីនយោបាយរបស់រដ្ឋាភិបាលជប៉ុន, ភ្នាក់ងាររដ្ឋាភិបាលជប៉ុន ទាំងនៅទីស្នាក់ការកណ្ដាល នាទីក្រុងតូក្យូ ទាំងការិយាល័យតំណាងនៅរាជធានីភ្នំពេញ ដែលធ្វើការនៅក្រោមការសម្របសម្រួលរបស់ឯកអគ្គរដ្ឋទូតជប៉ុនប្រចាំកម្ពុជាជាបន្តបន្ទាប់ដើម្បីអនុវត្តគោលនយោបាយរបស់ជប៉ុនចំពោះកម្ពុជា ដូចជាទីភ្នាក់ងារសហប្រតិបត្តិការអន្តរជាតិជប៉ុន (JICA) ជាដើម និងវិភាគទាននានារបស់អង្គការមិនមែនរដ្ឋាភិបាលជប៉ុន ។
ទន្ទឹមនឹងនេះ កិត្តិសេដ្ឋាបណ្ឌិត គាត ឈន់ បានគូសបញ្ជាក់ថាកិត្តិសេដ្ឋាបណ្ឌិតតែងចូលរួមសកម្មភាពទាំងផ្លូវការ ទាំងសង្គមជាមួយសមភាគីជប៉ុន ក៏ដូចជាជាមួយវិនិយោគិនជប៉ុននៅកម្ពុជា។
មុននឹងបញ្ចប់ កិត្តិសេដ្ឋាបណ្ឌិត បានថ្លែងអំណរគុណចំពោះលោក Hidehisa Horinouchi ឯកអគ្គរដ្ឋទូតជប៉ុនប្រចាំកម្ពុជា និងអតីតឯកអគ្គរដ្ឋទូតជប៉ុនចំនួន ០៨ រូបទៀត ព្រមទាំងសហការីទាំងអស់នៃស្ថានទូតជប៉ុនប្រចាំព្រះរាជាណាចក្រកកម្ពុជា តាំងពីនីតិកាលទី១ នៃរដ្ឋសភានៃព្រះរាជាណាចក្រកម្ពុជា យុគសម័យទី២ ដែលតែងតែយកចិត្តទុកដាក់រាល់សកម្មភាពការងារនិងទំនាក់ទំនងគ្រប់ប្រភេទរបស់កិត្តិសេដ្ឋាបណ្ឌិត និងបានខិតខំជម្រាបជូនរដ្ឋាភិបាលជប៉ុន រហូតរដ្ឋាភិបាលជប៉ុនសម្រេចផ្តល់គ្រឿងឥស្សរិយយសដ៏វិសេសវិសាលបំផុត “The Grand Cordon of the Order of the Rising Sun” ដល់រូបកិត្តិសេដ្ឋាបណ្ឌិត។
ជាទីបញ្ចប់នៃចំណាប់អារម្មណ៍ កិត្តិសេដ្ឋាបណ្ឌិត គាត ឈន់ បានសំដែងនូវជំនឿថា ទំនាក់ទំនង និងកិច្ចសហប្រតិបត្តិការក្នុងក្របខ័ណ្ឌភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ កម្ពុជា-ជប៉ុន នឹងបន្តពង្រឹងថែមទៀត ដើម្បីជាឧត្តមប្រយោជន៍សម្រាប់កម្ពុជាផង សម្រាប់ជប៉ុនផង ព្រមទាំងដល់តំបន់និងពិភពលោកផង ហើយបានសំដែងការជឿជាក់ថា ជប៉ុននឹងបន្តផ្តល់ហិរញ្ញប្បទានដល់កម្ពុជា ហើយការគាំទ្ររបស់ប្រទេសជប៉ុនចំពោះកម្ពុជានឹងចេះតែបន្តបង្កើនឡើង ឯលំហូរទុនជប៉ុន ចូលមកកម្ពុជា ក៏ចេះតែរីកចម្រើនពីមួយឆ្នាំទៅមួយឆ្នាំ៕
