(ភ្នំពេញ)៖ លោក នុត ពុធដារ៉ា អភិបាលខណ្ឌដង្កោ ព្រឹកថ្ងៃទី១០ ខែវិច្ឆិកា ឆ្នាំ២០១៧នេះ រួមជាមួយព្រះសង្ឃ មន្ត្រីរាជការ ខណ្ឌ សង្កាត់ ភូមិ បាននាំយកអំណោយទៅចែកជូនប្រជាពលរដ្ឋក្រីក្រ ចំនួន៥០គ្រួសារ ក្នុងសង្កាត់ដង្កោ។
អំណោយដែលត្រូវចែកជូន ក្នុង០១គ្រួសារទទួលបាន៖ អង្ករ មី គ្រឿងឧបភោគបរិភោគ និងសម្ភារៈប្រើប្រាស់០៧មុខផ្សេងទៀត និងថវិកា៣ម៉ឺនរៀល។
លោកអភិបាលខណ្ឌដង្កោ បានធ្វើការផ្តាំផ្ញើពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលជានិច្ចកាលសម្តេចតែងបានគិតគូរ និងយកចិត្តទុកដាក់ដល់ការលំបាក របស់បងប្អូនប្រជាពលរដ្ឋនៅមូលដ្ឋាន ជាពិសេសបងប្អូនប្រជាពលរដ្ឋក្រីក្រ ទុរគតជន ជនរងគ្រោះនានា។
ក្នុងឱកាសនោះលោកអភិបាល ក៏បានលើកឡើងអំពីការអភិវឌ្ឍរីកចម្រើនរបស់ប្រទេសជាតិ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី ដែលបានធ្វើឲ្យប្រទេសមានសុខសន្តិភាព និងការអភិវឌ្ឍជាលំដាប់។
លោក នុត ពុធដារ៉ា ក៏បានផ្តាំផ្ញើដល់បងប្អូនទាំងអស់ឲ្យយកចិត្តទុកដាក់ថែរក្សាសុខភាព តាមរយៈការហាត់ប្រាណ រស់នៅស្អាត ហូបស្អាត ផឹកស្អាត ដើម្បីបន្តរស់នៅបានយូរអង្វែង រងចាំមើលការអភិវឌ្ឍរបស់ប្រទេសជាតិតទៅមុខទៀត៕
