(ស្វាយរៀង)៖ សមាជិកក្រុមប្រឹក្សាឃុំថ្នាធ្នង់ ស្រុករំដួល ខេត្តស្វាយរៀង កូតាគណបក្សសង្គ្រោះជាតិ បានប្រកាសចូលជាមួយគណបក្សប្រជាជនកម្ពុជា ក្រោយបានឃើញទង្វើស្ដាប់តាម បទបញ្ជារបស់បរទេស ហើយញុះញង់ឲ្យខ្មែរបែកបាក់ ដែលជាទង្វើក្បត់ជាតិ។

តាមលិខិតដែលអង្គភាព Fresh News ទទួលបាននៅល្ងាចថ្ងៃទី០៩ ខែវិច្ឆិកា ឆ្នាំ២០១៧នេះ សមាជិកក្រុមប្រឹក្សាកូតាគណបក្សសង្គ្រោះជាតិ គឺលោក ញាណ ឡន អាយុ៦២ឆ្នាំ។

លោក ញាណ ឡន ដែល​ប្រកាសដើរចេញពីបក្ស ដែលខ្លួនធ្លាប់រស់នៅជាមួយយូរឆ្នាំមកហើយនោះ បានបញ្ជាក់ថា «គណបក្សសង្គ្រោះជាតិពុំដែលធ្វើឲ្យមានការរីកចម្រើនដល់ប្រទេសជាតិ គ្មានការរីកចម្រើនដល់សង្គមជាតិសោះ តែបានបំបែកបំបាក់ប្រជាពលរដ្ឋ និងប្រជាពលរដ្ឋ គ្មានការអភិវឌ្ឍន៍ប្រទេសឲ្យមានការរីកចម្រើនដោះ ដោយមើលឃើញមេដឹកនាំ គណបក្សសង្គ្រោះជាតិជាជនក្បត់ជាតិ»។

សូមជម្រាបថា ព្រឹកថ្ងៃទី០៤ ខែវិច្ឆិកា ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា បានប្រកាសអំពាវនាវតាមរយៈ វិដេអូចំនួន២៦នាទី នៅលើបណ្តាញទំនាក់ទំនង Facebook របស់សម្តេចដោយមានប្រសាសន៍ អំពីការផ្តល់ឱកាសដល់បងប្អូនសមាជិក គណបក្សសង្គ្រោះជាតិ បានបន្តអាជីពនយោបាយជាមួយ គណបក្សប្រជាជនកម្ពុជា ក្រោយពេលដែលគណបក្សសង្រ្គោះជាតិ ត្រូវបានកាត់រំលាយដោយតុលាការកំពូលនៅគឺថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ៕ (សូមទស្សនាវិដេអូ ប្រសាសន៍សម្តេចតេជោ)៖