(ភ្នំពេញ)៖ ពេញមួយថ្ងៃទី៧ ខែវិច្ឆិកា ឆ្នាំ២០១៧នេះ បណ្តាញសារព័ត៌មាន Fresh News បានទទួលលិខិតពីសមាជិកក្រុមប្រឹក្សាស្រុក ជំទប់ទី២ និងសមាជិកក្រុមប្រឹក្សាឃុំ-សង្កាត់ របស់គណបក្សសង្គ្រោះជាតិ ចំនួន១៨នាក់ ព្រមទាំងសកម្មជនចំនួន៥៥នាក់ ដែលបានសម្រេចចិត្តដើរចេញ ពី​គណបក្សសង្គ្រោះជាតិ មកសុំចូលរួមរស់ជាមួយគណបក្សប្រជាជនកម្ពុជា ពីព្រោះពួកគាត់មិនចង់គាំទ្រលោក កឹម សុខា មេបក្សក្បត់ជាតិតទៅទៀត។​

សមាជិកក្រុមប្រឹក្សាស្រុក ជំទប់ និងសមាជិកក្រុមប្រឹក្សាឃុំ-សង្កាត់ទាំង១៨នាក់ ថ្មីទៀត រួមមាន៖ ខេត្តកោះកុង៣នាក់ ជាសមាជិកក្រុមប្រឹក្សា, ខេត្តពោធិ៍សាត់១១នាក់​ សមាជិក្រុមប្រឹក្សា និងជំទប់, ខេត្តកំពង់ធំម្នាក់ ជាជំទប់ទី២, ខេត្តតាកែវម្នាក់ ជាសមាជិកក្រុមប្រឹក្សា និងខេត្តក្រចេះ២នាក់ សមាជិកក្រុមប្រឹក្សា ព្រមទាំងសកម្មជន និងគាំទ្រមូលដ្ឋាននៅស្រុកសំរោងទង ខេត្តកំពង់ស្ពឺចំនួន៥៥នាក់។

បើរាប់ទាំងសមាជិកក្រុមប្រឹក្សាស្រុក ជំទប់ និងសមាជិកក្រុមប្រឹក្សាឃុំ-សង្កាត់ទាំង១៤នាក់ខាងលើ (ផ្សាយម្សិលមិញ៤នាក់) គិតមកដល់ថ្ងៃទី០៧ ខែវិច្ឆិកានេះ តំណាងរាស្ដ្រ សមាជិកក្រុមប្រឹក្សា មេឃុំ ជំទប់ និងថ្នាក់ដឹកនាំមូលដ្ឋានសំខាន់ៗ សរុប​៨១នាក់ហើយ បានសម្រេចចិត្តដើរចេញពីគណបក្សសង្គ្រោះជាតិ ហើយសុំចូលរួមរស់ជាមួយគណបក្សប្រជាជនកម្ពុជា។

កាលពីព្រឹកថ្ងៃទី០៤ ខែវិច្ឆិកា ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា បានប្រកាសអំពាវនាវតាមរយៈវិដេអូចំនួន២៦នាទី នៅលើបណ្តាញទំនាក់ទំនង Facebook របស់សម្តេចដោយមានប្រសាសន៍ អំពីការផ្តល់ឱកាសដល់បងប្អូនសមាជិកគណបក្សសង្គ្រោះជាតិ បានបន្តអាជីពនយោបាយជាមួយ គណបក្សប្រជាជនកម្ពុជា ក្រោយពេលដែលគណបក្សសង្រ្គោះជាតិ ត្រូវបានកាត់រំលាយដោយតុលាការកំពូលនៅគឺថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ៕ (សូមស្តាប់ប្រសាសន៍សម្តេច)