(ភ្នំពេញ)៖ ករណីឃាតកម្មដ៏សាហាវមួយ បានកើតឡើងទាំងព្រឹកព្រលឹមថ្ងៃទី០៧ ខែវិច្ឆិកា ឆ្នាំ២០១៧នេះ នៅ​ភូមិថ្មគោល១ សង្កាត់ចោមចៅ២ ខណ្ឌពោធិ៍សែនជ័យ ដោយបុរសជាប្តីបានអារ.ក សម្លាប់ប្រពន្ធខ្លួនឯង បណ្តាលឲ្យដេកស្លាប់ក្នុងថ្លុកឈាម បន្ទាប់មកប្តីតិរិច្ឆានរូបនោះ បានអារ.កសម្លាប់ខ្លួនឯង តាមក្រោយតែមិនស្លាប់ ត្រឹមតែរបួសធ្ងន់នោះ ត្រូវបានសមត្ថកិច្ចបញ្ជាក់ថា បុរសជាប្ដីទើបចេញពីពន្ធនាគារកន្លះខែតែប៉ុណ្ណោះ ហើយក៏ទើបតែរស់នៅបន្ទប់ជួលកើតហេតុបាន៥ថ្ងៃ។

នគរបាលខណ្ឌពោធិ៍សែន បានបញ្ជាក់ថា ជនសង្ស័យជាប្តីឈ្មោះ ចា​ន់ ជីវី ​អាយុ៣០ឆ្នាំ ​​បច្ចុប្បន្នស្នាក់នៅបន្ទប់ជួលភូមិខាងលើ ហើយជន
សង្ស័យទើបចេញពីពន្ធនាគាបានកន្លះខែប៉ុណ្ណោះ ដោយឡែកជនរងគ្រោះ ជាប្រពន្ធស្លាប់ នៅក្នុងបន្ទប់មិនទាន់ស្គាល់អត្តសញ្ញាណ
នៅឡើយ ព្រោះទើប​មកនៅជាមួយប្តីបាន៥ថ្ងៃ។

សមត្ថកិច្ចបានបន្ថែមថា ​មុនពេលកើតហេតុម្ចាស់ផ្ទះជួល ឮសូរសំលេងប្រតាយប្រតប់គ្នា នៅបន្ទប់កើតហេតុក៏ចេញទៅមើល ក៏បានឃើញជនសង្ស័យ កំពុងអារ.ក​ប្រពន្ធរបស់ខ្លួន ម្ចាស់ផ្ទះក៏បានរាយការណ៍ មកនគរបាលប៉ុស្តិ៍ ពេលកម្លាំងប៉ុស្តិ៍ទៅដល់ជនសង្ស័យបានរត់ឡើងទៅលើដំបូលផ្ទះ ដោយយកកូនកាំបិតចាក់ក​ខ្លួនឯង រួចលោតពីលើតំបូលចុះមកក្រោមសន្លប់តែម្តង។ ចំណែកមូលហេតុដែលនាំឲ្យមានករណីនេះឡើង មិនទាន់ត្រូវបានសមត្ថកិច្ច បញ្ជាក់នៅឡើយទេ។

ប៉ុន្ដែទោះជាយ៉ាងណា ក្រោយកើតហេតុភ្លាមៗ គេឃើញមានវត្តមាន លោក យឹម សារ៉ាន់ អធិការនគរបាលខណ្ឌពោធិ៍សែនជ័យ ដឹកនាំកម្លាំងនគរបាលជំនាញ ចុះទៅដល់កន្លែងកើតហេតុ និងកំពុងស្រាវជ្រាវយ៉ាងយកចិត្តទុកដាក់ផងដែរ៕​