(រីយ៉ាដ)៖ ព្រះចៅ សាល់ម៉ាន់ នៃរាជាណាចក្រអារ៉ាប៊ីសាអូឌីត បានបើកដៃឲ្យមានការចាប់​ខ្លួន ព្រះបុត្រាចំនួន ១១អង្គ រួមទាំងរដ្ឋមន្ត្រី និងអតីតរដ្ឋមន្ត្រីជាច្រើនរូបទៀត ដោយចោទប្រកាន់ថា ពួកគេមាន​ចេតនាក្បត់ ចំពោះព្រះបុត្រា​ស្នងរាជ្យ ព្រះនាម ម៉ូហាំម៉េដ ប៊ីន សាល់ម៉ាន់ ព្រមទាំង​មានជាប់ពាក់ព័ន្ធ ទៅនឹងអំពើពុករលួយផងដែរ។ នេះបើតាម​ការចេញផ្សាយ ដោយសារព័ត៌មាន​អារ៉ាប់ HAARETZ នារសៀល​ថ្ងៃអាទិត្យ ទី០៥ ខែវិច្ឆិកា ឆ្នាំ២០១៧។

ក្រៅពីចំណាត់ការក្តៅ ដើម្បីត្រួសត្រាយ​ផ្លូវដឹកនាំប្រទេស សម្រាប់ព្រះរាជ្យបុត្រា​របស់ព្រះអង្គ ទៅថ្ងៃអនាគតនោះ ព្រះចៅ សាល់ម៉ាន់ ក៏បានផ្លាស់ប្តូរតំណែងរដ្ឋមន្ត្រីពីរ​រូបផងដែរ ដើម្បីឲ្យកាន់​តំណែងផ្នែកសន្តិសុខ និងរដ្ឋបាលសាធារណៈ ដើម្បីធានាឲ្យបាននូវភាពស្មោះត្រង់ និងសន្តិសុខ​សម្រាប់រាជវង្សានុវង្ស។ ជាងនេះទៅទៀត ព្រះមហាក្សត្រដ៏ជរាអង្គនេះ ក៏បានបង្កើតនូវស្ថាប័ន​ប្រយុទ្ធប្រឆាំងអំពើពុករលួយថ្មី ដែលដឹកនាំដោយព្រះរាជទាយាទ ប៊ីន សាល់ម៉ាន់ ផ្ទាល់។

គួរបញ្ជាក់តាមការផ្សាយរបស់ទូរទស្សន៍រដ្ឋ Al Arabiya​ របស់អារ៉ាប៊ីសាអូឌីត កាល​ពីពេលថ្មីៗនេះថា ក្រោយបង្កើតស្ថាប័នប្រឆាំងអំពើពុករលួយ ដែលមិនធ្លាប់មាននេះភ្លាម បុត្រាសរុប ១១អង្គ, រដ្ឋមន្ត្រី ០៤រូប និងអតីតរដ្ឋមន្ត្រីចំនួន ១០រូប ត្រូវបានចាប់ខ្លួន ដោយរងការចោទប្រកាន់​ពីករណីពុករលួយ និងមិនស្មោះត្រង់ទៅនឹងព្រះរាជទាយាទ ប៉ុន្តែសម្រាប់ក្សត្រ និងរដ្ឋមន្ត្រី-អតីតរដ្ឋមន្ត្រី​ដែលជាប់​សង្ស័យទាំងនោះ មិនត្រូវបានគេបញ្ជាក់ព្រះនាម និងឈ្មោះនោះឡើយ៕