(សៀមរាប)៖ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅឯខេត្តសៀមរាប បានប្រារព្ធឡើងរយៈពេល២ថ្ងៃ ប្រកបដោយភាពអធិកអធ័ម ជាមួយវត្តមានភ្ញៀវទេសចរជាតិ-អន្តរជាតិ ចូលរួមទស្សនាកម្សាន្តប្រមាណជាង ២៨ម៉ឺននាក់។ ភ្ញៀវនេះបានកើនឡើង ៣៩.២៨% ក្នុងនោះភ្ញៀវអន្តរជាតិមានចំនួន ៣ម៉ឺននាក់ បើធៀបនឹងឆ្នាំមុន។ នេះបើតាម លោក ឃឹម ប៊ុនសុង អភិបាលខេត្តសៀមរាប ដែលបានថ្លែងប្រាប់ភ្នាក់ងារអង្គភាព Fresh News នាល្ងាចថ្ងៃទី០៣ ខែវិច្ឆិកានេះ។
លោក ឃឹម ប៊ុនសុង បានឲ្យដឹងថា ចំពោះបញ្ហាសន្តិសុខ សណ្តាប់ធ្នាប់ របៀបរៀបរយសាធារណៈ ប្រព្រឹត្តទៅក្នុងលក្ខខណ្ឌល្អប្រសើរ គ្មានគ្រោះថ្នាក់ចរាចរណ៍ គ្មានការប៉ះទង្គិចដោយអំពើហិង្សា អំពើឆក់ ប្លន់ និងបាតុភាពអវិជ្ជមានផ្សេងៗគួរឲ្យកត់សម្គាល់ឡើយ។
លោកបន្តថា បញ្ហាអនាម័យ បរិស្ថាន ក៏មានសភាពល្អប្រសើរលើសពីពេលមុនៗ ដោយនៅទីសាធារណៈ និងជុំវិញទីតាំងប្រារព្ធពិធី ក៏ដូចជានៅតាមបណ្តោយស្ទឹងសៀមរាប មានការថយចុះនូវការបោះចោលសំរាម និងកាកសំណល់ផ្សេងៗ ដែលបញ្ជាក់ឲ្យឃើញថា ការយល់ដឹងពីផលប្រយោជន៍នៃការថែរក្សាបរិស្ថាន អនាម័យរបស់ប្រជាពលរដ្ឋ ទោះបីជាមិនទាន់ពេញលេញតាមការចង់បានក៏ដោយ។
បើតាមលោកអភិបាលខេត្តសៀមរាប បញ្ហាចរាចរនៅក្នុងក្រុង និងជុំវិញទីតាំងប្រារព្ធពិធី មានលក្ខណៈល្អប្រសើរ បើទោះបីជាមានការកក់ស្ទះនៅតាមកន្លែងខ្លះក៏ដោយ ក៏កងកម្លាំងសមត្ថកិច្ចបានជួយសម្រួលចរាចបានទាន់ពេលវេលា មិនធ្វើឲ្យមានការពិបាកដល់ប្រជាពលរដ្ឋ ដែលមកកម្សាន្តសប្បាយក្នុងព្រះរាជពិធីបុណ្យនេះឡើយ។
សូមជម្រាបថា ក្នុងព្រះរាជពិធីបុណ្យអុំទូក នៅខេត្តសៀមរាបនេះ ក៏មានការអញ្ជើញចូលរួមពីសមាជិកព្រឹទ្ធសភា រដ្ឋសភា មេបញ្ជាការយោធភូមិភាគទី៤ ប្រធានក្រុមប្រឹក្សាខេត្តសៀមរាប ប្រធានក្រុមប្រឹក្សាខេត្តបន្ទាយមានជ័យ មេបញ្ជាការកងពលធំអន្តរាគមន៍លេខ២ អគ្គកុងស៊ុលសាធារណរដ្ឋកូរ៉េប្រចាំខេត្តសៀមរាប តំណាងស្ថានទូតចិនប្រចាំកម្ពុជា អភិបាលរងខេត្តកំពង់ធំ បាត់ដំបង បន្ទាយមានជ័យ ឧត្តរមានជ័យ និងខេត្តព្រះវិហារ អគ្គនាយករងអាជ្ញាធរជាតិអប្សរា សមាជិក-សមាជិកាក្រុមប្រឹក្សាខេត្តសៀមរាប ឧត្តរមានជ័យ និងខេត្តបាត់ដំបង តំណាងខេត្តសុរិន្ទ និងខេត្តបុរីរាំ ប្រទេសថៃ៕
