(ស្វាយរៀង)៖ សមាជិកក្រុមប្រឹក្សាឃុំអណ្តូងពោធិ៍ ស្រុករមាសហែក ខេត្ត​ស្វាយរៀងម្នាក់ទៀតហើយ មកពីគណបក្សសង្រ្គោះជាតិ បានប្រកាសជាសាធារណៈ ដើរចេញេពីបក្សរបស់ខ្លួន ហើយមកសូំរួមរស់ជាមួយគណបក្សប្រជាជនកម្ពុជា ដោយសារតែគាត់បានឃើញថា លោក កឹម សុខា ជាជនក្បត់ជាតិ សម្លាប់ជាតិឯង និងបម្រើបរទេស។ នេះបើតាមលិខិតដែលអង្គភាពព័ត៌មាន Fresh News ទទួលបាននៅព្រឹកថ្ងៃទី​០៣ ខែវិច្ឆិកា ឆ្នាំ២០១៧។

លោក សូ ភី អាយុ៦១ឆ្នាំ ជាសមាជិកក្រុមប្រឹក្សាឃុំអណ្ដូងពោធិ៍ ស្រុករមាសហែក ខេត្តស្វាយរៀង មកពីគណបក្សសង្គ្រោះជាតិ បានបញ្ជាក់យ៉ាងដូច្នេះថា «ខ្ញុំបាទមើលឃើញថា ការដឹកនាំរបស់គណបក្សសង្គ្រោះជាតិ ពុំដែលបានធ្វើអ្វីឲ្យមានផលប្រយោជន៍ដល់ប្រទេសជាតិ និងដល់ប្រជាពលរដ្ឋម្ដងណាឡើយ ហើយថ្នាក់ដឹកនាំ គឺមានគំនិតក្បត់ជាតិសាន៍ឯងទៀត ទើបរូបខ្ញុំបាទសុំមករួមរស់ជីវភាពរបស់គណបក្សប្រជាចនកម្ពុជាវិញ»។

លោក សូ ភី ដែលតទៅនេះជាសមាជិកថ្មីរបស់គណបក្សប្រជាជនកម្ពុជា បានបន្តទៀតថា បានជាលោកសម្រេចចិត្តចាកចេញពីគណបក្សសង្គ្រោះជាតិ មករួមរស់ជាមួយគណបក្សប្រជាជនកម្ពុជា គឺដោយសារការមើលឃើញគណបក្សប្រជាជន មានគុណបំណាច់ធំធេងចំពោះប្រទេសជាតិ និងចំពោះប្រជាពលរដ្ឋទូទាំងប្រទេស និងនាំសន្តិភាពមកជូនប្រទេសផងដែរ។

លោក ម៉ែន វិបុល ប្រធានគណៈកម្មាធិការគណបក្សប្រជាជនកម្ពុជាខេត្តស្វាយរៀង ក៏បានទទួលលោក សូ ភី សមាជិកគណបក្សថ្មី យ៉ាងរាក់ទាក់បំផុត។

សូមជម្រាបថា សម្តេចតេជោ ហ៊ុ​ន សែន ក្នុងពេលដែលសម្តេចអញ្ជើញ ជួបសំណេះសំណាលជាមួយ តំណាងកម្មករនិយោជិត កាលពីពេលកន្លងទៅ ក៏បានថ្លែងបញ្ជាក់ថា នៅពេលដែលគណបក្ស​សង្រ្គោះជាតិ ត្រូវរំលាយក្រោមការចោទប្រកាន់ថា «ប្រព្រឹត្តិអំពើក្បត់ជាតិ» មេឃុំ-ចៅសង្កាត់ មកពីគណបក្សប្រឆាំងមួយនេះ នៅតែរក្សាតំណែងដដែលប្រសិនបើ ពួកគេព្រមមករួមរស់ជាមួយ គណបក្សប្រជាជនកម្ពុជា។

គិតត្រឹមថ្ងៃទី៣ ខែវិច្ឆិកា ឆ្នាំ២០១៧នេះ តំណាងរាស្ដ្រ សមាជិកក្រុមប្រឹក្សា មេឃុំ ជំទប់ និងថ្នាក់ដឹកនាំមូលដ្ឋានសំខាន់ៗ សរុប៥៦នាក់ (គិតទាំងម្នាក់នេះទៀត) បានសម្រេចចិត្តដើរចេញពីគណបក្សសង្គ្រោះជាតិ ហើយសុំចូលរួមរស់ជាមួយគណបក្ស ប្រជាជនកម្ពុជា ដែលកំពុងដឹកនាំរាជរដ្ឋាភិបាល៕