(បន្ទាយមានជ័យ)៖ ឈើគ្រញូងទម្ងន់ជិត ១តោនត្រូវបានកម្លាំងគយច្រកទ្វារអន្តរជាតិប៉ោយប៉ែតស្ទាក់ចាប់បាននៅព្រលប់ថ្ងៃទី០១ ខែវិច្ឆិកា ឆ្នាំ២០១៧នេះ។ នេះគឺជារឿងដ៏គួរឲ្យភ្ញាក់ផ្អើលមួយព្រោះថាកន្លងទៅគេធ្លាប់តែឃើញឈ្មួញលួចដឹកឈើពីកម្ពុជា ដែលជាប្រទេសសម្បូរណ៌ឈើចេញទៅប្រទេសដទៃ តែពេលនេះបែរជាក្រុមឈ្មួយលួចដឹកមកពីថៃចូលមកកម្ពុជាទៅវិញ។

លោក ហ៊ុយ​ សុជាតិ​ ប្រធានសាខាគយ និងរដ្ឋាករច្រកទ្វារអ​ន្តរជាតិប៉ោយប៉ែត បានថ្លែងប្រាប់ភ្នាក់ងារសារព័ត៌មាន Fresh News ប្រចាំខេត្តបន្ទាយមានជ័យ តាមទូរស័ព្ទថា​ ឈ្មួញបានលួចនាំយកឈើគ្រញូងទាំងអស់នេះបានប្រើល្បិចថ្មី​ និងឈ្លាសវៃដោយជួលរទេះដឹកទំនិញ ​និងបង្កប់ដោយបច្ចេកពិសេសខ្លាំងណាស់​ គឺគាត់បានដាក់បន្លែ​ និងស្បែកជើងជជុះ​​ពីលើឈើគ្រញូង​​​ ហើយឈើគ្រញូងរុំក្រដាស់កេសខាងក្រៅ​ទាំងអស់ ​ដើម្បីបន្លំភ្នែកសមត្ថកិច្ចជំនាញ។

លោកប្រធានសាខាគយ បានបន្តថា​ ​ឈើគ្រញូងដុំតូចធំទាំងអស់​មានចំនួន ៧៨៨គីឡូក្រាម​​។ ដោយឡែកកម្មករ​អូសរទេះ និងឈ្មួញបានរត់គេចខ្លួនភ្លាមៗ ​ពេលឃើញសមត្ថកិច្ចស្ទាក់ត្រួតពិនិត្យ​។

លោកប្រធានសាខាគយ និងរដ្ឋាករប្រចាំច្រកទ្វារអន្តរជាតិប៉ោយប៉ែន បានបញ្ជាក់ថា ក្រោយឆែកឆេររកឃើញហើយឈើទាំងអស់ ត្រូវមន្ត្រីជំនាញរក្សាទុកបណ្តុះអាសន្ននៅការិយាល័យគយ និងរដ្ឋាករច្រកទ្វារអន្តរជាតិប៉ោយប៉ែត៕