(ភ្នំពេញ)៖ អគ្គនាយកដ្ឋានកាំកុងត្រូល ក្រសួងពាណិជ្ជកម្ម បានចេញសេចក្ដីជូនដំណឹងបន្ទាន់មួយ ពាក់ព័ន្ធវិធានការណ៍រាំងខ្ទប់ និងចុះប្រមូលមកផលិតផលពងត្រី Rainbow Trout Caviar ក្រោយពីក្រុមហ៊ុនមួយរបស់ប្រទេសកាណាដា បានរកឃើញផលិតផលពងត្រីនេះ មានការលូតលាស់បាក់តេរី បង្កឲ្យប៉ះពាល់ដល់សុខភាពមនុស្សយ៉ាងធ្ងន់ធ្ងរ អាចបណ្ដាលឲ្យស្លាប់ទៀតផង។ នេះបើយោងតាមសេចក្ដីជូនដំណឹង របស់អគ្គនាយកដ្ឋានកាំកុងត្រូល ដែលបណ្ដាញសារព័ត៌មាន Fresh News ទើបទទួលបាននៅមុននេះបន្ដិច នារសៀលថ្ងៃទី០១ ខែវិច្ឆិកា ឆ្នាំ២០១៧នេះ។

នៅក្នុងសេចក្ដីជូនដំណឹងបានបញ្ជាក់ថា ការលូតលាស់របស់បាក់តេរី អាចផលិតសារធាតុពុលខ្លាំងចំពោះកោសិកាសរសៃប្រសាទ ដែលនឹងបង្កគ្រោះថ្នាក់ដល់សុខភាពមនុស្ស ហើយក្នុងករណីធ្ងន់ធ្ងរ អាចបណ្ដាលឲ្យស្លាប់ទៀតផង។

សម្រាប់វិធានការទប់ស្កាត់​នៅចំពោះមុខនេះ អគ្គនាយកដ្ឋានកាំកុងត្រូល បានប្រកាសរាំងខ្ទប់មិនឲ្យនាំចូលផលិតផល មកលក់ចែកចាយនៅកម្ពុជា និងអំពាវនាវដល់សាធារណជន បើបានឃើញផលិតផលទាំងនេះ ដាក់លក់នៅលើទីផ្សារ សូមរាយការណ៍មកកាន់មន្ដ្រីកាំកុងត្រូល តាមរយៈខ្សែទូរស័ព្ទដែលបានបង្ហាញជូនខាងក្រោមនេះ៕