(ភ្នំពេញ)៖ នៅថ្ងៃទី២៩ ខែតុលា ឆ្នាំ២០១៧នេះ បណ្តាញសារព័ត៌មាន Fresh News ទទួលបានលិខិតសុំចូលរួមជាមួយគណបក្សប្រជាជនកម្ពុជា ពីសំណាក់មេឃុំ និងសមាជិកក្រុមប្រឹក្សា មកពីគណបក្សសង្គ្រោះជាតិចំនួន៣រូប ដោយពួកគេទាំងអស់ បានប្រកាសចាកចេញពីបក្សរបស់ខ្លួន និងហៅលោក កឹម សុខា ព្រមទាំងមេដឹកនាំគណបក្សសង្គ្រោះជាតិ ជាជនក្បត់ជាតិទៀតផង។

ថ្នាក់ដឹកនាំ និងសមាជិកមូលដ្ឋានរបស់គណបក្សប្រឆាំង ទាំង៤នាក់ ដែលបង្ហាញការអស់ជំនឿទាំងស្រុង ទៅលើមេដឹកនាំរបស់ខ្លួន រហូតប្រកាសចាកចេញ និងសុំចូលរួមជីវភាពនយោបាយជាមួយ បក្សកាន់អំណាចនោះ រួមមាន៖

ទី១៖ ខេត្តកំពង់ចាម៖ ​លោក ស៊ូ លាងហាក់ អាយុ៤០ឆ្នាំ ជាមេឃុំថ្មពូន រស់នៅភូមិអណ្តូងផ្តៅ ឃុំថ្មពូន ស្រុកព្រៃឈរ ខេត្តកំពង់ចាម។
ទី២៖​ ខេត្តតាកែវ២នាក់ ទី១៖លោក សុខ លេង ជំទប់ទី២ និងជាសមាជិកក្រុមប្រឹក្សាឃុំតាអូរ និងទី២៖ លោក តាក ឈៀន សមាជិកក្រុមប្រឹក្សាឃុំព្រះបាទជាន់ជុំ ​ស្រុកគិរីវង់។

ដោយឡែក កាលពីប៉ុន្មានថ្ងៃមុននោះ ក៏មានជំទប់ និងសមាជិកក្រុមប្រឹក្សាឃុំសង្កាត់គណបក្សសង្រ្គោះជាតិ២០រូបផងដែរ សម្រេចផ្លាស់ប្តូរជីវភាពនយោបាយ ជាមួយគណបក្សប្រជាជនកម្ពុជា រួមមាន៖ខេត្តកំពង់ធំចំនួន៤នាក់​, ខេត្តកំពង់ចាមមានចំនួន២នាក់​, ខេត្តព្រះវិហារម្នាក់​, នៅខេត្តត្បូងឃ្មុំមានម្នាក់​​, នៅខេត្តកំពតមានម្នាក់, នៅខេត្តបន្ទាយមានជ័យ​មានម្នាក់, នៅខេត្តព្រៃវែងមាន​៣នាក់, នៅខេត្តឧត្តរមានជ័យមានម្នាក់, នៅខេត្តតាកែវមាន៣នាក់ និងខេត្តក្រចេះមានម្នាក់​។

ជាមួយគ្នានេះ សម្តេចតេជោ ហ៊ុ​ន សែន ក្នុងពេលដែលសម្តេចអញ្ជើញជួបសំណេះសំណាលជាមួយតំណាងកម្មករនិយោជិត កាលពីប៉ុន្មានថ្ងៃមុននេះ ក៏បានថ្លែងបញ្ជាក់ថា នៅពេលដែលគណបក្ស សង្រ្គោះជាតិ ត្រូវរំលាយក្រោមការចោទប្រកាន់ថា «ប្រព្រឹត្តិអំពើក្បត់ជាតិ» មេឃុំ-ចៅសង្កាត់ មកពីគណបក្សប្រឆាំងមួយនេះ នៅតែរក្សាតំណែងដដែលប្រសិនបើ ពួកគេព្រមមករួមរស់ជាមួយ គណបក្សប្រជាជនកម្ពុជា។

សម្តេចតេជោ ហ៊ុន សែន បង្ហាញជំនឿចិត្តរហូតដល់ជាង៩៩ភាគរយថា គណបក្សសង្រ្គោះជាតិនឹងត្រូវរំលាយ ហើយមិនអាចយកសហគមន៍អន្តរជាតិមកដាក់សម្ពាធបាននោះឡើយ៕