(ភ្នំពេញ)៖ ភាពយន្តខ្នាតធំបែបកំប្លុកកំប្លែង ភ័យរន្ធត់ញាប់ញ័រ ​​របស់ផលិតកម្ម «រស្មីតាន់តាន់» មានចំណង​ជើងថា «ផ្អើលភូមិ» ត្រូវបានបើកសម្ពោធ​ចាក់បញ្ចាំង តាមបណ្ដារោងភាពយន្ត​​ទំនើបនានា នៅព្រឹកថ្ងៃទី២៧ ខែតុលា ឆ្នាំ២០១៧នេះ នៅរោងភាពយន្ត Major ផ្សារទំនើប ​អ៊ីអនម៉ល ដោយមានការអញ្ជើញ​ចូលរួ​ម ពីសំណាក់ផលិតករ, តារាសម្ដែងល្បីៗ និងទស្សនិកជន ជាច្រើននាក់។

លោក ស៊ុ ស៊ីថែន អ្នកចាត់ការទូទៅ របស់ក្រុមហ៊ុន «ពូព្រហ្ម» ​បានថ្លែងបញ្ជាក់ឲ្យដឹងថា ភាពយន្តខ្នាតធំ រឿង «ផ្អើលភូមិ» នឹងចាប់បញ្ចាំង​ពីថ្ងៃទី​២៧ ខែតុលា ២០១៧នេះ តទៅ​ រហូតដល់អស់អ្នកទស្សនា។ លោកជឿជាក់ថា ទោះបីជាការដាក់បញ្ចាំង ស្ថិតក្នុងស្ថានភាពមួយ ​ស្របគ្នានឹងការដាក់បញ្ចាំង​ភាពយន្តបរទេសក្ដី ប៉ុន្តែភាពយន្តនេះ ​នឹងទទួលបានការគាំទ្រច្រើន ពីសំណាក់មហាជន ក៏ដូចជាយុវវ័យ។ ​

លោកបន្តថា បើយើងសង្កេតមើលភាពយន្ត​ កំប្លែងរបស់ខ្មែរកន្លងមក ច្រើនប្រើតួមានអាជីពកំប្លែង ដើម្បីទាញអារម្មណ៍ទស្សនិកជន ឲ្យសើចសប្បាយ ប៉ុន្តែរឿងនេះ មិនបានយកតួមានអាជីពកំប្លែង​មកសម្ដែងទេ ពោលគឺជ្រើសរើសតួល្បីធម្មតាៗ ប៉ុន្តែជឿជាក់ថា ពិតជាបង្អើលអារម្មណ៍ទស្សនិកជន តាមរោងភាពយន្ត ឲ្យរន្ធត់ តែស្រាកស្រានចិត្ត និងហួសចិត្ត​ទៅតាមសាច់រឿង និងតួសម្តែង។ ​

លោកបានបន្ថែមថា លើសពីនេះ​​ដោយសារភាពយន្តរឿង «ផ្អើលភូមិ» មានចំណុចទាក់ទាញខ្លាំង ជាងរឿងក្នុងស្រុកផ្សេងទៀត ក្រុមហ៊ុននឹងពង្រីកការចែកចាយរបស់ខ្លួន ក្រៅពីរោងភាពយន្តទំនើប ទាំងអស់នៅភ្នំពេញ និងសៀមរាបទៅដល់២តំបន់ទៀត គឺខេត្តបន្ទាយមានជ័យ និងប៉ោយប៉ែត។ រីឯផលិតកម្ម ក៏នឹងចាក់បញ្ចាំង «ផ្អើលភូមិ» នៅខេត្តបាត់ដំបង កំពង់សោម កោះកុង ក្នុងពេលជាមួយគ្នានេះ ផងដែរ។

​សូមបញ្ជាក់ថា ភាពយន្តខ្នាតធំរឿង​ «ផ្អើលភូមិ» មានការចូលរួមសម្ដែង​ដោយតារា​ល្បីៗដូចជា​ លោក ខាត់ វ៉ៃហាំង ជាតួឯកប្រុស, កញ្ញា ស៊ិន សក្កដា ជាតួឯកស្រី, នាយ ភី ម៉ៃ, នាយ សាយ ចៃ, កញ្ញា ឆុំ វីកាន់ណាដា, លោក ប៉េង វុទ្ធី តារាប្រដាល់ អេ ភូថង និងតារាល្បីៗជាច្រើនទៀត៕