(ភ្នំពេញ)៖ ខណៈនេះទាំងទណ្ឌិត សម រង្ស៊ី កូនស្រីកឹម សុខា និងសមាជិកនៃគណៈកម្មាធិការអចិន្ត្រៃយ៍ និងគណៈកម្មាធិការកណ្តាលគណបក្សប្រឆាំង រួមនឹងអ្នកវិភាគឯករាជ្យក្លែងក្លាយលម្អៀងរកបក្សប្រឆាំងបាន និងកំពុងតែធ្វើសកម្មភាពខ្លាំងក្លាដើរចលនាអន្តរជាតិដាក់សម្ពាធលើកម្ពុជាដោយបានស្នើសុំឱ្យ ប្រទេសមួយចំនួនឈប់ផ្តល់ទិដ្ឋាការឈប់ផ្តល់ជំនួយឱ្យកម្ពុជា ឈប់វិនិយោគនៅកម្ពុជា ឈប់ទិញទំនិញពីកម្ពុជា ផ្តាច់ទំនាក់ទំនងការ ទូត និងសេដ្ឋកិច្ចជាមួយកម្ពុជា អំពាវនាវឱ្យប្រទេសជប៉ុនឈប់សាងសង់ផ្លូវថ្នល់ ស្ពាន ដល់កម្ពុជាជាដើម។

កិច្ចខិតខំប្រឹងប្រែងបំផ្លាញជាតិដោយមិនខ្លាចនឿយហត់របស់បក្សប្រឆាំងនេះ ក្នុងបំណងតែមួយគឺស្វែងរកទឹកមន្តមកប្រស់គម្រោងផែនការក្បត់ជាតិខ្លួនតាមរយៈបដិវត្តន៍ពណ៌ឱ្យរស់ឡើងវិញ ជាពិសេសប៉ុនប៉ងរំដោះមេបក្សក្បត់ជាតិ កឹម សុខា ឱ្យមានសេរីភាពវិញក្រោមលេសដើម្បីបោះឆ្នោតសេរី យុត្តិធម៌ ត្រឹមត្រូវ មានការគោរពសិទ្ធិមនុស្ស និងលទ្ធិប្រជាធិបតេយ្យ។ តាមពិតពួកគេព្យាយាមធ្វើជាជនរងគ្រោះនៃទង្វើក្បត់ជាតិរបស់ខ្លួន និងបន្តផែនការបំផ្លាញកម្ពុជា។

ក្រុមមន្ត្រីបក្សប្រឆាំងក្បត់ជាតិ ឃុបឃិតជាមួយបរទេសបំផ្លាញកម្ពុជាមិនអស់ចិត្ត ពួកគេបានព្យាយាមមកបំផ្លាញឆ្នាំងបាយរបស់កម្មករកម្មការិនី និងប្រជាជនខ្មែរ ដោយបានដើរជំរុញឱ្យប្រទេសមួយចំនួនដាក់សម្ពាធនយោបាយ ការទូត សេដ្ឋកិច្ចប្រឆាំងនឹងកម្ពុជា។

ក្រុមមន្ត្រីទាំងនោះបាន និងកំពុងរីករាយនៅពេលដែលបរទេសមួយចំនួនបំពានធម្មនុញ្ញអង្គការសហប្រជាជាតិដែលមិនជ្រៀតជ្រែកលើកិច្ចការផ្ទៃក្នុងនៃ
ប្រទេសឯករាជ្យ និងអធិបតេយ្យមួយដូចកម្ពុជានេះ។ ដើម្បីមហិច្ឆតាអំណាចផ្ទាល់ខ្លួនពួកគេក៏ពេញចិត្តនឹងឱ្យជនបរទេសបំផ្លាញខ្មែរក្រោមរូបភាពសិទ្ធិមនុស្ស និងលទ្ធិប្រជាធិបតេយ្យនិងមិនខ្លាចរអារក្នុងការនាំយកសោកនាដកម្មមកឱ្យជាតិ និងប្រជាជនកម្ពុជា សាជាថ្មីទៀតឡើយ។
ទោះបីជាពួកគេដឹងថាប្រវត្តិសាស្ត្រកម្ពុជាក្នុងទសវត្សរ៍ឆ្នាំ ១៩៧០ បង្កវិនាសកម្មយ៉ាងណាដល់កម្ពុជាទាំងការទម្លាក់គ្រាប់បែក និងការសម្លាប់រង្គាលខ្មែរ តែពួកគេពិតជារីករាយក្នុងការខ្ចីដៃបរទេសជាពិសេសបន្តអនុវត្តផែនការខ្មៅរបស់អា មេរិកកម្ចេចសន្តិភាព និងការអភិវឌ្ឍរបស់កម្ពុជាដោយមិនស្តាយ ស្រណោះអ្វីបន្តិចទេ។

ក្នុងការអនុវត្តផែនការក្បត់ជាតិនេះមិនមែនត្រឹមតែបក្សប្រឆាំងឡើយ ចៅហ្វាយ នាយបរទេសដែលជាមេគំនិតនៃបដិវត្តន៍ពណ៌បានរៀបចំដៃគូឱ្យបក្សប្រឆាំងដើម្បី សម្រេចផែនការក្បត់ថែមទៀតផង។ ដៃគូទាំងនោះស្ថិតសម្ងំលាក់ខ្លួននៅតាមអង្គការ ក្រៅរដ្ឋាភិបាលនានា ពួកគេបានបំភ្លៃ បំផ្លើស បំប៉ោង និងបំភ័ន្តសភាពការណ៍ និងបាន ព្យាយាមចូលជិតប្រជាជន អនុវត្តផែនការបង្វែរការចាប់អារម្មណ៍ប្រជាជន ខ្សឹបដាក់ ត្រចៀកប្រជាជនឱ្យចេះប្រឆាំង ឱ្យចេះតវ៉ានឹងរដ្ឋអំណាច តស៊ូមតិ ក្រោកឈរ បះបោរ ក្រោមរូបភាពដើម្បីអនុវត្តសេរីភាព សិទ្ធិមនុស្ស លទ្ធិប្រជាធិបតេយ្យតាមរដ្ឋធម្មនុញ្ញនៃ ព្រះរាជាណាចក្រកម្ពុជា ដោយមានមូលនិធិ របស់អាមេរិកជួយគាំទ្រពីក្រោយ និងមាន មន្ត្រីបច្ចេកទេសមកបង្ហាត់បង្រៀនដល់កន្លែងថែមទៀត។

មិនតែប៉ុណ្ណោះពួកគេបាន ចងសម្ព័ន្ធភាពជាមួយ ក្រុមបក្សប្រឆាំង និងបណ្តាញផ្សេងៗនៅតាមប្រទេសនានាដែល បានទទួលថវិកាពីអាមេរិក និងអនុវត្តផែនការ ផ្តួលរំលំរដ្ឋអំណាចស្របច្បាប់ដូចគ្នា ដែរដូចជាចលនាប្រឆាំងនឹងប្រធានាធិបតីកូរ៉េខាងត្បូង ប៉ាក់ខិន ហេ ជាដើម រហូតដល់កូនស្រី កឹម សុខា បានទៅចូលរួមតវ៉ា ដកបទពិសោធពីចលនានេះ និងត្រៀមអនុវត្តនៅ កម្ពុជាថែមទៀតផង។ តាមពិតទាំងនេះគឺជាអនុវត្តនូវផែនការលម្អិតប្រទាក់ក្រឡាគ្នា មានលក្ខណៈជាប្រព័ន្ធរបស់គម្រោង បដិវត្តន៍ពណ៌តែប៉ុណ្ណោះ។

ប្រឈមមុខចំពោះផែនការក្បត់ជាតិ បំផ្ទុះបដិវត្តន៍របស់បក្សប្រឆាំងដោយមាន បរទេសនៅពីក្រោយខ្នងចាំបញ្ជា និងផ្គត់ផ្គង់សព្វបែបយ៉ាងនេះ រាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន រួមនឹងប្រជារាស្ត្រខ្មែរបានចាត់វិធានការទាន់ពេលវេលាដើម្បីគ្រប់គ្រងស្ថានការណ៍បាន និងបានកម្ទេចផែនការក្បត់ជាតិ របស់បក្ស ប្រឆាំង។ ស្ថានភាពនេះគឺរាជរដ្ឋាភិបាលកម្ពុជាបានប្រើដៃម្ខាងការពារសន្តិភាព ទប់ទល់ នឹងផែនការបដិវត្តន៍ពណ៌បំផ្លាញសន្តិភាពបំផ្លាញប្រទេស របស់ក្រុមជនក្បត់ជាតិ ស៊ី ឈ្នួលបរទេសបំផ្លាញខ្មែរដោយបានចាត់វិធានការសព្វបែបយ៉ាងទាំងអស់។

ចំណែកឯដៃម្ខាងទៀតរាជរដ្ឋាភិបាលកម្ពុជា បានខិតខំប្រឹងប្រែងអភិវឌ្ឍប្រទេសជាតិឱ្យរីកចម្រើនឡើងកាន់តែខ្លាំង បន្ទាប់ពីកម្ពុជាដ៏កំសត់នេះបានបាត់បង់ ពេលវេលាអភិវឌ្ឍប្រទេស របស់ខ្លួនជិតបីទសវត្សរ៍ ដោយសារតែឆ្លងកាត់ភ្នក់ភ្លើងសង្គ្រាម ការជ្រៀតជ្រែករបស់ បរទេស ការទម្លាក់គ្រាប់បែករបស់អាមេរិក អំពើប្រល័យពូជសាសន៍ និងការដាក់ទណ្ឌ កម្មសេដ្ឋកិច្ចពីបស្ចិមប្រទេសប្រឆាំងនឹងការរស់រានមានជីវិតឡើងវិញរបស់ពលរដ្ឋខ្មែរ ពីរបបខ្មែរក្រហម។

រាជរដ្ឋាភិបាលបានបង្កើតឆ្នាំងបាយជូនប្រជាជនដោយសុំឱ្យបរទេសវិនិយោគនៅកម្ពុជា ទិញទំនិញពីកម្ពុជា និងផ្តល់ជំនួយដល់កម្ពុជា។ ប៉ុន្តែក្រុមបក្ស ប្រឆាំងធ្វើនយោបាយប្រឆាំងនឹងការអភិវឌ្ឍជាតិ ប្រឆាំងនឹងផលប្រយោជន៍ជាតិ និងប្រជាជន។ ហេតុអ្វីបានក្រុមបក្សប្រឆាំងមានឈាមជ័រជាខ្មែរ ប៉ុន្តែមានចិត្តបរទេសនិយមដូច្នេះ? ហេតុអ្វីមិនបម្រើខ្មែរ តែបម្រើផលប្រយោជន៍ជនបរទេស បំផ្លាញខ្មែរ ក្បត់ជាតិខ្មែរទៅវិញ? តាមពិត ពួកគេមិនគួរណា កើតជាជាជនជាតិខ្មែរឡើយ!

ទង្វើក្បត់ជាតិលើក្បត់ជាតិរបស់បក្សសង្គ្រោះជាតិមិនអាចអត់ឱនឱ្យបានឡើយពពេលនេះ ម៉ោងនេះ ពួកគេនៅតែបន្តយុទ្ធនាការបំផ្លាញខ្មែរ និងបំបែកឆ្នាំងបាយរបស់ ប្រជាជនកម្ពុជា។ បើ សម រង្ស៊ី អេង ឆៃអ៊ាង មូរ សុខហួរ យឹម សុវណ្ណ កូនស្រីកឹម សុខា និងមន្ត្រីបក្សសង្គ្រោះជាតិតាំងខ្លួនជាខ្មែរ គួរយកចិត្តពិតមកស្រឡាញខ្មែរ មិនមែននៅ តែលើបបូរមាត់របស់ខ្លួនឡើយ ហើយចិត្តបម្រើបរទេស បំផ្លិចបំផ្លាញខ្មែរ។ សូមកុំដើម្បី ផលប្រយោជន៍សម្រាបបក្សពួក និងក្រុមគ្រួសាររបស់ខ្លួន ហ៊ាញុះញង់ បើកដៃឱ្យបរទេសបំពានលើខ្មែរ បំបែកបំបាក់ខ្មែរ បំផ្លាញខ្មែរ និងមាក់ងាយពលរដ្ឋខ្មែរ។ ខ្មែរគឺជា ប្រទេសដែលធ្លាប់មានអរិយធម៌ខ្ពង់ខ្ពស់ និងមានមោទនភាពជាតិរបស់ខ្លួនដូចអ្វីដែល កម្ពុជាកំពុងមានសព្វថ្ងៃនេះ។

ខ្មែរមានមោទនភាពដែលមានកំណើនសេដ្ឋកិច្ច ៧% ក្នុងមួយឆ្នាំ។ ខ្មែរពិតជាមានមោទនភាពដែលបានយកសន្តិភាពទាំងស្រុងដោយដៃខ្លួនឯង។ ខ្មែរមានមោទនភាព ដែលប្រែពីប្រទេសអស្ថេរភាព និងទទួលមួកខៀវរបស់អង្គការសហប្រជាជាតិជាប្រទេសដែលបញ្ជូនទ័ពមួកខៀវទៅបំពេញបេសកកម្មមនុស្សធម៌ ក្រោមទង់អ.ស.ប។ ខ្មែរមានមោទនភាពដែលកម្រិតនៃការវិនិយោគសូន្យមកកំណើន វិនិយោគដ៏ច្រើនសម្បើម បង្កើតការងាររាប់លានជូនពលរដ្ឋខ្មែរ និងមានកំណើនសេដ្ឋ កិច្ចជាតិ និងគ្រួសារ។ ខ្មែរមានមោទនភាពដែលបានឈរស្មើមុខស្មើមាត់ជាមួយប្រទេសនានានៅលើសកលលោកក្នុងនាមជា ដៃគូស្មើសិទ្ធិ និងស្មើភាព។ ខ្មែរពិតជាមានមោទនាភាពខ្លាំងដែលប្រទេសផ្សេងៗបន្តជួបប្រទះសង្គ្រាម អស្ថេរភាពនយោបាយ អសន្តិសុខ ប៉ុន្តែកម្ពុជាពោរពេញដោយ សន្តិភាពនិងការអភិវឌ្ឍ។

ទាំងនេះគឺជាកិច្ចខិតខំប្រឹងប្រែងរបស់ រាជរដ្ឋាភិបាលដឹកនាំដោយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខក្រោមម្លប់ដ៏ ត្រជាក់នៃអតីតព្រះមហាក្សត្រ ព្រះបរមរតនកោដ្ឋ និងព្រះ មហាក្សត្រខ្មែរ ព្រះករុណាសម្តេចព្រះបរមនាថ នរោត្តម សីហនុ និងការគាំទ្រគ្រប់
កាលៈទេសៈរបស់ប្រជាជនកម្ពុជា។

សមិទ្ធផលទាំងអស់នេះគឺជាកិច្ចខិតខំប្រឹងប្រែងរួមគ្នារបស់រាជរដ្ឋាភិបាល និង ប្រជាជនទូទាំងនគរ ហើយបន្តការពារសម្រាប់មនុស្សរាប់ជំនាន់ ទៅមុខទៀតដើម្បីផ្តល់ ឱកាសដល់កម្ពុជាបោះជំហានក្នុងការអភិវឌ្ឍកសាងជាតិខ្លួនឱ្យរីកចម្រើនរុងរឿងឡើង ចាកផុតពីភាពក្រីក្រ។ គេមិនអាចនិយាយពីសិទ្ធិមនុស្ស លទ្ធិប្រជាធិបតេយ្យ សេរីភាព បានឡើយ នៅពេលប្រទេសមានសង្គ្រាម ហើយការអភិវឌ្ឍប្រទេសមួយរីកចម្រើនមិន អាចប្រព្រឹត្តទៅក្រោមស្នូរកាំភ្លើង និងទម្ងន់នៃគ្រាប់បែកចង្កោម និងគ្រាប់បែកគីមីដែល ច្បាប់ហាមឃាត់ឡើយ។ ប្រទេសស៊ីរី និងលីប៊ីដែលរងគ្រោះដោយការផ្លាស់ប្តូរតាមបែប បដិវត្តន៍ពណ៌ជាឧទាហរណ៍ជាក់ស្តែងដែលប្រជាជនកម្ពុជាមិនត្រូវការឡើយ។ ការរស់នៅក្នុងឈាមនិងទឹកភ្នែក ការនិរាសព្រាត់ប្រាស់ក្រុមគ្រួសារ សោកនាដកម្មសព្វបែប យ៉ាង ការបំផ្លិចបំផ្លាញហេដ្ឋារចនាសម្ព័ន្ធរបស់ប្រទេសជាតិ គឺប្រជាជនខ្មែរបានហែល ឆ្លងកាត់ឆ្អៀតឆ្អន់ហើយ។ ជាតិនិងប្រជាជនកម្ពុជាមិនត្រូវការវិនាសកម្មទាំងនេះទៀត ឡើយ។

ប៉ុន្តែបក្សសង្គ្រោះជាតិដែលឥឡូវបានក្លាយជាបក្សដែលពោរពេញដោយជន ក្បត់ជាតិនេះបានក្បត់កម្ពុជា បំផ្លាញខ្មែរ។ បើអន្តរជាតិអនុវត្តវិធានការណាប្រឆាំងនឹងប្រជាជនកម្ពុជា ប្រឆាំងនឹងដំណើរអភិវឌ្ឍកម្ពុជា និងបំផ្លាញសន្តិភាព ស្ថេរភាពជាតិ ដែលកម្ពុជា និងប្រជាជនមានពេលបច្ចុប្បន្ននេះ នោះក្រុមជនក្បត់ជាតិដែលពួនសម្ងំក្នុងបក្សប្រឆាំងទាំងអស់នេះត្រូវទទួលខុសត្រូវទាំងស្រុងចំពោះមុខជាតិ និងប្រជាជន។

ពួកគេក្បត់ជាតិដោយឃុបឃិតជាមួយបរទេសអនុវត្តផែនការបដិវត្តន៍ពណ៌មិនអស់ចិត្តបន្តអនុវត្តផែនការបំផ្លាញខ្មែរតាមផ្លូវត្រជាក់គឺអំពាវនាវ ឱ្យចៅហ្វាយខ្លួនបំផ្លាញ ខ្មែរ។ ប្រជាជនកម្ពុជាដែលស្រឡាញ់សន្តិភាព និងការអភិវឌ្ឍ អ្នកសេ្នហាជាតិទាំងអស់ត្រូវ ក្រោកឈរឡើងការពារជាតិការពារ ឆ្នាំងបាយខ្លួនប្រឆាំងនឹងការបំផ្លិចបំផ្លាញរបស់បក្សប្រឆាំង និងការជ្រៀតជ្រែករបស់បរទេសក្នុងកិច្ចការផ្ទៃក្នុងរបស់រដ្ឋឯករាជ្យ និង អធិបតេយ្យភាពដូចកម្ពុជានេះ! ជយោ! កម្ពុជា!

ដោយ៖ ចៅចាក់ស្មុក