(សឹង្ហបុរី)៖ ការតភ្ជាប់ទំនាក់ទំនង តាមរយៈពាណិជ្ជកម្ម និងការវិនិយោគ ដែលកាន់តែមានសន្ទុះកើនឡើងនៅអាស៊ី និងប៉ាស៊ីហ្វិក បានជួយបង្កើនភាពធន់ នៃសេដ្ឋកិច្ចរបស់តំបន់នេះ ចំពោះភាពមិនប្រាកដប្រជា ដែលកើតឡើងក្នុងបរិយាកាសគោលនយោបាយសេដ្ឋកិច្ច និងពាណិជ្ជកម្មសកលលោក។ នេះបើតាមរបាយការណ៍ថ្មីមួយ របស់ធនាគារ-អភិវឌ្ឍន៍អាស៊ី (ADB) ដែលអង្គភាពព័ត៌មាន Fresh News ទទួលបាននៅថ្ងៃទី២៦​ ខែតុលា ឆ្នាំ២០១៧នេះ។

របាយការណ៍នេះ ក៏មានជំពូកពិសេសមួយអំពីរបៀបដែលអាស៊ី អាចបង្កើនភាពធន់ទ្រាំ នៃវិស័យហិរញ្ញវត្ថុរបស់ខ្លួនក្នុង យុគសម័យដែលមានការភ្ជាប់ទំនាក់ទំនង ផ្នែកហិរញ្ញវត្ថុ ជាមួយគ្នាទៅវិញទៅមក។ ភាពរឹងមាំនៃពាណិជ្ជកម្ម និងការវិនិយោគក្នុងតំបន់ មានតួនាទីជាខែល សម្រាប់ការពារតំបន់នេះ ទប់ទល់នឹងភាពមិនប្រាកដប្រជា នៃស្ថានភាពពាណិជ្ជកម្ម និងកំណើនសេដ្ឋកិច្ចសកល។ នេះបើតាមការលើកឡើងដោយរបាយការណ៍នេះ។

របាយការណ៍ដដែលនេះ បានឲ្យដឹងថា ក្នុងឆ្នាំ ២០១៦ភាគរយ នៃការធ្វើពាណិជ្ជកម្មរវាងប្រទេសមួយ និងប្រទេសមួយទៀតក្នុងតំបន់ បើគិតជាតម្លៃ កើនឡើងដល់ ៥៧.៣% ក្នុងឆ្នាំ ២០១៦ ដែលជាកម្រិតខ្ពស់មិនធ្លាប់មាន បើធៀបនឹងកំណើនជាមធ្យម ៥៥.៩% ពីឆ្នាំ ២០១០ ដល់ ២០១៥។ តម្លៃនៃការវិនិយោគផ្ទាល់ពីបរទេស (FDI) ក្នុងតំបន់អាស៊ីទាំងមូល បានកើនឡើងដល់ ២៧២ ពាន់លានដុល្លារ ក្នុងឆ្នាំ ២០១៦ បើទោះបីជាលំហូរ FDI ជាសកលមកកាន់តំបន់នេះ បានថយចុះ៦%ក៏ដោយ។

FDI ពីប្រទេសមួយទៅប្រទេសមួយទៀត ក្នុងតំបន់នេះ គឺជាភាគរយនៃ FDI សរុប ដែលចូលមកក្នុងតំបន់នេះ កើនឡើងពី ៤៨% ក្នុងឆ្នាំ ២០១៥ ដល់ ៥៥% ក្នុងឆ្នាំ ២០១៦។ ដោយសារតែ FDI ពីប្រទេសមួយទៅប្រទេសមួយទៀតក្នុងតំបន់អាស៊ីនេះ បំពេញតួនាទីសំខាន់ក្នុងការជម្រុញការអភិវឌ្ឍ សង្វាក់តម្លៃ គេរំពឹងថា វាក៏នឹងជួយពង្រឹងកំណើនពាណិជ្ជកម្ម
របស់តំបន់នេះផងដែរ។

សេដ្ឋកិច្ចរបស់អាស៊ី បានបន្តពង្រីកវត្តមានក្នុងសកលលោក ដោយ FDI ដែលមានប្រភពពីអាស៊ី បានកើនឡើង១១% ក្នុងឆ្នាំ ២០១៦ ដល់៤៨២ពាន់លានដុល្លារ ជាពិសេស តាមរយៈការវិនិយោគលើថាមពលកកើតឡើងវិញ ធនធានធម្មជាតិ ឧបករណ៍សើមីខុនដាក់ឌ័រ (semiconductors) និងបច្ចេក-វិទ្យាព័ត៌មាន។

Yasuyuki Sawada ប្រធានសេដ្ឋវិទូរបស់ ADB បានថ្លែងថា «តំបន់អាស៊ី និងប៉ាស៊ីហ្វិច កំពុងដឹកនាំការងើបឡើងវិញ នៃពាណិជ្ជកម្មសកលលោក ដែលជួយឲ្យតំបន់នេះ អាចបន្ត រក្សាសន្ទុះកំណើនខ្ពស់របស់ខ្លួន បើទោះបីជាស្ថានភាពគោលនយោបាយសេដ្ឋកិច្ច និងពាណិជ្ជកម្មសកលលោក កំពុងមានភាពមិនប្រាកដប្រជាយ៉ាងណាក៏ដោយ។ សមាហរណកម្ម និងកិច្ចសហប្រតិបត្តិការនៅអាស៊ី នឹងជួយពង្រឹងកំណើនសេដ្ឋកិច្ច និងភាពធន់ទ្រាំផ្នែកហិរញ្ញវត្ថុរបស់តំបន់នេះ»៕

ព័ត៌មានលម្អិត សូមអានរបាយការណ៍ របស់ធនាគារ-អភិវឌ្ឍន៍អាស៊ី (ADB) ទាំងស្រុងនៅខាងក្រោមនេះ៖