(កណ្តាល)៖ នៅព្រឹកថ្ងៃទី២៥ ខែតុលា ឆ្នាំ២០១៧នេះ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភគ្រឿងឧបភោគ-បរិភោគ សម្ភារៈប្រើប្រាស់ និងថវិកា ក្នុងឱកាសចុះសួរសុខទុក្ខ សិស្សក្រីក្រ គ្រូ បុគ្គលិក ចំនួន ១៣៦នាក់ នៃវិទ្យាស្ថានអភិវឌ្ឍន៍ភាពជាអ្នកដឹកនាំ និងចរិតលក្ខណៈ ដែលមានទីតាំងស្ថិតនៅភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្តាល។
នៅក្នុងឱកាសចុះសួរសុខទុក្ខនោះ លោកស្រី ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា បានពាំនាំប្រសាសន៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តាំផ្ញើការសួរសុខទុក្ខ ក្តីអាណិត ស្រឡាញ់ និងសូមឱ្យសិស្សទាំងអស់ដែលកំពុងស្នាក់នៅ និងទទួលការអប់រំ បណ្តុះបណ្តាល នៅក្នុងវិទ្យាស្ថាននេះ ត្រូវចេះស្រឡាញ់គ្នា សាមគ្គីគ្នា ចេះជួយយកអាសារគ្នាទៅវិញទៅមក និងបន្តរក្សាអនាម័យល្អ បរិស្ថានស្អាតក្នុងការរស់នៅ ។
លោកស្រី ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា បានពាំនាំប្រសាសន៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បន្ថែមទៀតថា សូមក្មួយៗទាំងអស់ ត្រូវចេះរស់នៅដោយអត់ធ្មត់ តស៊ូ ប្រឹងប្រែង គោរពវិន័យរបស់វិទ្យាស្ថាន គោរពលោកគ្រូអ្នកគ្រូ ដែលបានលះបង់កម្លាំងកាយ-ចិត្ត ផ្តល់ក្តីស្រឡាញ់ ភាពកក់ក្តៅដូចជាអាណាព្យាបាល និងសូមចារទុកក្នុងដួងចិត្តនូវអនុស្សារវីយ៍ធ្លាប់រស់នៅ ក្រេបជញ្ជក់ចំណេះដឹង ដើម្បីអនាគតរុងរឿងរបស់ខ្លួន ជាពិសេស ត្រូវបំពេញកាតព្វកិច្ចជាកូនល្អ មិត្តល្អ សិស្សល្អ ពលរដ្ឋល្អក្នុងសង្គម ជៀសវាងការប្រើប្រាស់គ្រឿងញៀន ការប្រព្រឹត្តនូវអំពើអបាយមុខ និងសេពគប់មិត្តមិនល្អ ដើម្បីរួមចំណែកអភិវឌ្ឍប្រទេសជាតិឱ្យកាន់តែរីកចម្រើនថែមទៀត។ ទន្ទឹមនឹងនេះ ដើម្បីចូលរួមអបអរព្រះរាជពិធីបុណ្យអុំទូក ខាងមុខនេះ សូមប្រជាពលរដ្ឋទាំងអស់គោរពច្បាប់ចរាចរណ៍ឱ្យបានខ្ជាប់ខ្ជួន ប្រុងប្រយ័ត្នរាល់ពេលធ្វើដំណើរ និងចូលរួមយុទ្ធនាការប្រយុទ្ធប្រឆាំងនឹងមេរោគអេសដ៍ ជំងឺអេដស៍ ដើម្បីសុភមង្គលក្នុងក្រុមគ្រួសារ។
ជាមួយគ្នានោះ លោក ប្រាក់ ផល្លា នាយកប្រតិបត្តិវិទ្យាស្ថាន បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលដឹកនាំកាកបាទក្រហមកម្ពុជា ដោយយកចិត្តទុកដាក់ គិតគូរពីសុខទុក្ខ ផ្តល់ក្តីមេត្តា ករុណា អាណិត ស្រឡាញ់ ព្រមទាំងបានឧបត្ថម្ភអំណោយដ៏ច្រើនជាងគេបំផុតជាប្រវត្តិសាស្ត្រសម្រាប់វិទ្យាស្ថាន ដែលនេះជាការផ្តល់ក្តីសង្ឃឹមមិនចេះរីងស្ងួត ចំពោះប្រជាជនជួបការលំបាកដោយគ្មានការរើសអើង មិនប្រកាន់វណ្ណៈ ពូជសាសន៍ សាសនា ឬនិន្នាការនយោបាយអ្វីឡើយ។
សូមបញ្ជាក់ថា អំណោយប្រគល់ជូនវិទ្យាស្ថានរួមមាន ៖ អង្ករ ២តោន មីយើង ៣០កេស ត្រីខ ៥កេស ទឹកក្រូច ១០កេស ទឹកសុទ្ធ ១០កេស ទឹកត្រី ២៤ដប ទឹកស៊ីអ៊ីវ ២៤ដប ប្រេងឆា ២៤ដប និងថវិកា ៥លានរៀល។ ដោយឡែក សិស្ស គ្រូ និងបុគ្គលិក ទទួលបាន មុង១ ភួយ១ សារុង១ ក្រមា១ និងថវិកាមួយចំនួន៕
