(ភ្នំពេញ)៖ សមាជិកក្រុមប្រឹក្សាសង្កាត់ច្រាំងចំរេះទី១ នៃគណបក្សសង្គ្រោះជាតិ លោក ស្មាន ហ៊ីម បានដាក់លិខិតសុំចូលរួមរស់ជាមួយនឹងគណបក្សប្រជាជនកម្ពុជា បន្ទាប់ពីអស់ជំនឿទៅលើ ថ្នាក់ដឹកនាំគណបក្សសង្គ្រោះជាតិ ដែលសុខចិត្តឱនក្បាលបម្រើបរទេស ដើម្បីតែអំណាចមិនគិតពីមហន្ដរាយជាតិមាតុភូមិ ដែលនេះគឺជាអំពើក្បត់ជាតិ។

នៅក្នុងលិខិតរបស់លោក ស្មាន ហ៊ីម បានសង្កត់ធ្ងន់យ៉ាងដូច្នេះថា៖ «ពីមុនខ្ញុំនឹកស្មានថាការតស៊ូដណ្ដើមអំណាច តាមរយៈការបោះឆ្នោត និងតាមបែបប្រជាធិបតេយ្យពិតប្រាកដ ប៉ុន្ដែក្រោយពីខ្ញុំបានឃើញឃ្លីប Video និងសកម្មភាពជាក់ស្ដែងញុះញង់បំបែកបំបាក់ខ្មែរជាពីរ​។ លោក គឹម សុខា និងគណបក្សសង្គ្រោះជាតិសុខចិត្តឱនក្បាលបម្រើបរទេស ដើម្បីអំណាចមិនគិតពីមហន្ដរាយរបស់ជាតិមាតុភូមិ នេះហើយជាអំពើក្បត់ជាតិ»។

នៅរសៀលថ្ងៃទី២២ ខែតុលា ឆ្នាំ២០១៧ លោក លឹម ជាវុត្ថា អគ្គនាយកបណ្តាញព័ត៌មាន Fresh News បានធ្វើកិច្ចសម្ភាសន៍ពិសេសមួយ ជាមួយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា៖ «សម្តេចតេជោ ហ៊ុន សែន បានមានប្រសាសន៍ ស្វាគមន៍ទាំងអស់ចំពោះការចុះចូល ជាមួយគណបក្សប្រជាជនកម្ពុជា និងសូមអំពាវនាវបន្តទៀត ប្រសិនបើតំណាងរាស្រ្ត មេឃុំ ចៅសង្កាត់ ឬសមាជិកគណបក្សសង្រ្គោះជាតិ ដែលមានបំណងចុះចូល គឺគណបក្សប្រជាជនកម្ពុជាស្វាគមន៍ទាំងអស់ និងបន្តរក្សាតំណែង តួនាទីជូនដល់មេឃុំ ចៅសង្កាត់ ឬជំទប់ដែលបានចុះចូល»។

នៅព្រឹកថ្ងៃអាទិត្យ ថ្ងៃទី២២ ខែតុលា ឆ្នាំ២០១៧ សម្តេចតេជោ ហ៊ុ​ន សែន បានប្រកាសក្នុងពេលដែលសម្តេចអញ្ជើញជួបសំណេះសំណាលជាមួយតំណាងកម្មករ និយោជិត ជាង៤ពាន់នាក់ នៅសាលមហោស្រពកោះពេជ្រ ឲ្យដឹងថា នៅពេលដែលគណបក្សសង្រ្គោះជាតិ ត្រូវរំលាយក្រោមការចោទប្រកាន់ថា «ប្រព្រឹត្តិអំពើក្បត់ជាតិ» មេឃុំ-ចៅសង្កាត់ មកពីគណបក្សប្រឆាំងមួយនេះ នៅតែរក្សាតំណែងដដែលប្រសិនបើ ពួកគេព្រមមករួមរស់ជាមួយគណបក្សប្រជាជនកម្ពុជា។ សម្តេចតេជោ ហ៊ុន សែន បង្ហាញជំនឿចិត្តរហូតដល់ជាង ៩៩ភាគរយថា គណបក្សសង្រ្គោះជាតិនឹងត្រូវរំលាយ ហើយមិនអាចយកសហគមន៍អន្តរជាតិមកដាក់សម្ពាធបាននោះឡើយ៕