(ភ្នំពេញ)៖ នាយឧត្តមសេនីយ៍ ចៅ ភិរុណ អគ្គនាយក នៃអគ្គនាយកដ្ឋានសម្ភារ:បច្ចេកទេស ក្រសួងការពារជាតិ នៅថ្ងៃទី២៣ ខែតុលា ឆ្នាំ២០១៧ បានចេញញត្តិប្រកាសថ្កោលទោសដាច់ខាត ចំពោះសម្ដីទណ្ឌិត សម រង្ស៊ី អតីតប្រធានគណបក្សសង្គ្រោះជាតិ ដែលបានអំពាវនាវ ឲ្យកងកម្លាំងប្រដាប់អាវុធ បែរកាណុងផ្តួលរំលំរាជរដ្ឋាភិបាលស្របច្បាប់។
នាយឧត្តមសេនីយ៍ ចៅ ភិរុណ បានចាត់ទុកថា ការអំពាវនាវបែបនេះ គឺជាទង្វើក្បត់ជាតិ និងញុះញង់ឱ្យមានអស្ថេរភាព និងអសន្តិសុខ ក្នុងព្រះរាជាណាចក្រកម្ពុជា។ អគ្គនាយកដ្ឋានសម្ភារ:បច្ចេកទេស ក្រសួងការពារជាតិ បានប្រកាសប្រឆាំងដាច់ខាត និងសូមឲ្យសមត្ថកិច្ច និងប្រជាពលរដ្ឋរួមគ្នា កម្ចាត់ជនក្បត់ជាតិរូបនេះ រួមទាំងបក្ខពួក ដើម្បីទប់ស្កាត់កុំឱ្យកម្ពុជាដែលកំពុងមានសុខសន្តិភាពពេញលេញ និងការរីកចំរើនលើគ្រប់វិស័យ ធ្លាក់ក្នុងសង្គ្រាមជាថ្មី។
ការប្រកាសប្រឆាំង និងកំចាត់ជនក្បត់ជាតិខាងលើ និងបក្ខពួក បានធ្វើឡើងបន្ទាប់ពីមានការបែកធ្លាយនូវ វីដេអូមួយទៀតដែលក្នុងនោះ សម រង្ស៊ី ដែលបានប្រកាសអំពាវនាវឲ្យកងកម្លាំងប្រដាប់អាវុធ បែរកាណុងផ្តួលរំលំរាជរដ្ឋាភិបាលស្របច្បាប់របស់ សម្តេចតេជោ ហ៊ុន សែន។
តាមរយៈវីដេអូនេះ សម រង្ស៊ី បាននិយាយកាលពីថ្ងៃទី០៤ ខែមិថុនា ឆ្នាំ២០១១ នៅទីក្រុងឡូវែល រដ្ឋម៉ាស្សាឈូសែត សហរដ្ឋអាមេរិក ដូច្នេះថា «របប ហ៊ុន សែន ជិតដួលរលំហើយ ការបះបោរយើងត្រូវការរៀបចំ ការណែនាំ ត្រូវការការផ្គត់ផ្គង់ឧបត្ថម្ភ ខ្នងបង្អែក ដើម្បីឲ្យការបះបោរផ្ទុះឡើង និងកងកម្លាំងប្រដាប់អាវុធបែរចុងកាណុងផ្តួលរំលំរបបផ្តាច់ការ ហ៊ុន សែន»៕
(សូមស្តាប់ការលើកឡើងរបស់លោក សម រង្ស៊ី ខាងក្រោម)
