(ភ្នំពេញ)៖ នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ នៅយប់ថ្ងៃទី២១ ខែតុលា ឆ្នាំ២០១៧នេះថា កងកម្លាំងនគរបាលទូទាំងរាជធានីភ្នំពេញ សូមថ្កោលទោសយ៉ាងដាច់អហង្កាទៅ នឹងសម្តីជនក្បត់ជាតិ សម រង្ស៊ី ដែលញុះញង់ឲ្យកងកម្លាំងប្រដាប់អាវុធប្រឆាំងរាជរដ្ឋាភិបាល ដែលបានប្រកាសតាម «ឃ្លីបវិដេអូមួយទៀត កាលពីថ្ងៃទី០៤ ខែមិថុនាឆ្នាំ២០១១ បានអំពាវនាវឱ្យមានការបះបោរប្រឆាំង នឹងរដ្ឋាភិបាលស្របច្បាប់កម្ពុជា»។
នាយឧត្តមសេនីយ៍ ជួន សុវណ្ណ បានចាត់ទុកការអំពាវនាវ ឱ្យកងកម្លាំងប្រដាប់អាវុធបង្វែរកាណុង មកកាន់រដ្ឋាភិបាលកម្ពុជា គឺជាអំពើក្បត់ជាតិសុទ្ធសាធ ហើយការអំពាវនាវនេះ គឺផ្សារភ្ជាប់ទៅនឹង ការលើកឡើងរបស់លោក កឹម សុខា នៅទីក្រុងណូវែល រដ្ឋម៉ាសាឈូសេត សហរដ្ឋអាមេរិកផងដែរ។ វាជាវិដេអូចាស់ប៉ុន្តែវាគឺបានផ្សារភ្ជាប់មកដល់បច្ចុប្បន្ន ដែលសកម្មភាពនេះបានឆ្លុះបញ្ចាំងអោយឃើញច្បាស់ ពីសារជាតិនៃក្រុមជនក្បត់ជាតិ តែងតែលោភលន់អំណាច មិនគិតដល់ភាពសុខសាន្តរបស់ប្រជាពលរដ្ឋ និងផលប្រយោជន៏សង្គមជាតិឡើយ។
នាយឧត្តមសេនីយ៍ ជួន សុវណ្ណ បានបញ្ជាក់ប្រាប់បណ្តាញសារព័ត៌មាន Fresh News យ៉ាងដូច្នេះថា «ខ្ញុំសូមបញ្ជាក់ជូនថា កម្លាំងនគរបាលទាំងអស់ ទាំងនៅស្នងការដ្ឋាន និងទូទាំងខណ្ឌ បានត្រៀមខ្លួនរួចជាស្រេចហើយ ដើម្បីកំចាត់ក្រុមបង្កចលាចលទាំងឡាយណា ដែលចង់ឲ្យសង្គមវឹកវរ ហើយរង់ចាំតែបទបញ្ជារបស់ថ្នាក់ដឹកនាំ តែប៉ុណ្ណោះ ពេលនោះកម្លាំងនគរបាលត្រៀមចេញប្រតិបត្តិការលើកិច្ច ការពារសន្តិសុខ និងសណ្តាប់ធ្នាប់សាធារណ:ជូន ប្រជាពលរដ្ឋ និងរាជរដ្ឋាភិបាលដឹកនាំដោយ សម្តេចតេជោ ហ៊ុន សែន»។
ឆ្លើយតបទៅនឹងឧបាយកលដ៏ពិសពុលនេះ កាលពីថ្ងៃទី១៨ ខែតុលា ឆ្នាំ២០១៧ ថ្មីៗនេះ អគ្គស្នងការនគរបាលជាតិ បានធ្វើការប្រកាសផ្សព្វផ្សាយ ជូនដល់គ្រប់ស្នងការរាជធានី ខេត្ត និងនាយកដ្ឋានជំនាញទាំងអស់ឱ្យបានដឹង អំពីឧបាយកល សកម្មភាពរបស់ក្រុមក្បត់ជាតិ ជាពិសេសសំដីញុះញង់របស់ សម រង្សី អុជអាលកងកម្លាំងប្រដាប់អាវុធ ឱ្យផ្តួលរំលំរាជរដ្ឋាភិបាលស្របច្បាប់។
ដូច្នេះស្នងការដ្ឋាននគរបាលរាជធានីភ្នំពេញ ដែលជាកងកម្លាំងមានកាតព្វកិច្ចថែរក្សាខឿនសន្តិសុខជាតិ និងធានាសណ្តាប់ធ្នាប់សាធារណ: និងសុវត្ថិភាពសង្គម សូមប្តេជ្ញាការពារដាច់ខាតរាជរដ្ឋាភិបាលស្របច្បាប់ មិនឱ្យឲ្យក្រុមពួកបំផ្លិចបំផ្លាញជាតិ និងក្បត់ជាតិទាំងនោះ មកធ្វើឡើងនៅលើទឹកដីកម្ពុជាជាដាច់ខាត។
«ក្នុងនាមជា ស្នងការដ្ឋាននគរបាលរាជធានីភ្នំពេញ គាំទ្រពេញទំហឹងដល់ចំណាត់ការរាជរដ្ឋាភិបាល ដែលកំចាត់ពួកក្បត់ជាតិ បំផ្លាញសន្តិភាពនៅកម្ពុជា»៕
