(ភ្នំពេញ)៖ លោកទេសរដ្ឋមន្រ្ដី ប្រាក់ សុខុន រដ្ឋមន្រ្ដីក្រសួងការបរទេស និងសហប្រតិបត្តិការអន្ដរជាតិ បានស្នើឲ្យ រដ្ឋមន្រ្ដីក្រសួងការបរទេសសិង្ហបុរី លោកបណ្ឌិត វីវៀន បាឡាគ្រីស្សស្នាន ឲ្យពិចារណាការនាំចូលផលិតផលកសិកម្មរបស់កម្ពុជា ដែលរួមមាន អង្ករ ម្រេច ស្វាយ ទៅលើទីផ្សារសិង្ហបុរី និងពង្រីកការវិនិយោគបន្ថែមទៀតនៅកម្ពុជា។ នេះបើយោងតាមសេចក្ដីប្រកាសព័ត៌មាន ជុំវិញលទ្ធផល​នៃដំណើរទស្សនកិច្ចផ្លូវការ របស់រដ្ឋមន្ត្រីការបរទេសសិង្ហបុរី ដែលអង្គភាព Fresh News ទទួលបាននៅថ្ងៃទី១៨ ខែតុលា ឆ្នាំ២០១៧។

ជាមួយគ្នានេះ លោកទេសរដ្ឋមន្ត្រី ប្រាក់ សុខុន បានបង្ហាញនូវការពេញចិត្ត លើការចុះហត្ថលេខា នៃកិច្ចព្រមព្រៀងលើវិស័យប្រេងកាត សម្រាប់ការអភិវឌ្ឍវិស័យប្រេងក្នុងដែនសមុទ្រ ក្នុងប្លុក A រវាងកម្ពុជាង និងក្រុមហ៊ុនសិង្ហបុរី KrisEnergy។ លោក ប្រាក់ សុខុន ក៏ស្នើឲ្យសិង្ហបុរី ពង្រីកការវិនិយោគបន្ថែម ក្នុងវិស័យដែលមានសក្ដានុពលផ្សេងៗទៀតផងដែរ។

ក្នុងនោះរដ្ឋមន្រ្ដីទាំងពីរ បានកត់សម្គាល់លើកំណើន នៃចំនួនភ្ញៀវទេសចរ ពីមួយឆ្នាំទៅមួយឆ្នាំ ដែលនឹងជម្រុញការប្រាស័យ ទាក់ទងរវាងប្រជាជនទាំងពីរ។ លោក ប្រាក់ សុខុន បានផ្ដល់យោបល់ថា ប្រទេសទាំងពីរគួរតែពង្រីកកិច្ចសហប្រតិបត្តិការ ក្នុងការទប់​ស្កាត់ការជួញដូរខុសច្បាប់នូវសម្បត្តិវប្បធម៌ និងបានពិភាក្សាលើកិច្ចសហប្រតិបត្តិការ ក្នុងវិស័យអាកាសចរស៊ីវិលផងដែរ។

លើកពីនេះទៅទៀតនោះ លោកទេសរដ្ឋមន្ត្រី ប្រាក់ សុខុន បានថ្លែងអំណរគុណចំពោះរដ្ឋាភិបាលសង្ហបុរី ចំពោះការទទួលយកពលករកម្ពុជា និងសង្ឃឹមថា ប្រទេសសិង្ហបុរី នឹងនៅតែបន្តស្វាគមន៍ពលករកម្ពុជាបន្ថែមទៀត។

សូមជម្រាបថា រដ្ឋមន្រ្ដីក្រសួងការបរទេសសិង្ហបុរី លោកបណ្ឌិត វីវៀន បាឡាគ្រីស្សស្នាន បានដឹកនាំប្រតិភូមមកពេញទស្សនកិច្ចផ្លូវការនៅកម្ពុជា រយៈពេល១ថ្ងៃ គឺថ្ងៃទី១៧ ខែតុលា ឆ្នាំ២០១៧ ដោយលោកបានចូលជួបពិភាក្សាការងារជាមួយ សម្តេចតេជោ ហ៊ុន​ សែន នាយករដ្ឋមន្ត្រីនៃកម្ពុជា លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបទេសកម្ពុជា លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងពិសាអាហារពេលល្ងាចរៀបចំដោយ លោករដ្ឋមន្ត្រីបរិស្ថាន សាយ សំអាល់ ផងដែរ៕