(ភ្នំពេញ)៖ នៅព្រឹកថ្ងៃទី១៨ ខែតុលា ឆ្នាំ២០១៧នេះ លោក នុត ពុធដារ៉ា ជំនួយការសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាអភិបាលខណ្ឌដង្កោ រួមជាមួយព្រះសង្ឃ អភិបាលរង មន្ត្រីរាជការខណ្ឌ សង្កាត់ ភូមិ បាននាំយកអំណោយទៅចែកជូនប្រជាពលរដ្ឋក្រីក្រ ចំនួន៣០គ្រួសារ ក្នុងសង្កាត់ប្រទះឡាង។
អំណោយដែលត្រូវបានចែកជូនក្នុង០១គ្រួសារទទួលបាន៖ អង្ករ២០គីឡូក្រាម មី០១កេស ទឹកត្រី ទឹកស៊ីអ៊ីវ គ្រឿងឧបភោគបរិភាគ និងសម្ភារប្រើប្រាស់៦មុខផ្សេងទៀត និងថវិកា៣ម៉ឺនរៀល។
លោកអភិបាលខណ្ឌ បានផ្តាំផ្ញើរពីសំណាក់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលជានិច្ចកាលសម្តេចតែងបានគិតគូរ និងយកចិត្តទុកដាក់ដល់ការលំបាករបស់បងប្អូន ប្រជាពលរដ្ឋនៅមូលដ្ឋាន ជាពិសេសបងប្អូនប្រជាពលរដ្ឋក្រីក្រ ទុរគតជន ជនរងគ្រោះនានា និងបានផ្តាំផ្ញើរការសាកសួរសុខទុក្ខ ពីសម្តេចទាំងពីរ ជូនដល់បងប្អូនប្រជាពលរដ្ឋទាំងអស់។
ក្នុងឱកាសនោះលោកអភិបាល ក៏បានលើកឡើងអំពីការអភិវឌ្ឍរីកចម្រើនរបស់ប្រទេសជាតិ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានធ្វើឲ្យប្រទេសមានសុខសន្តិភាព និងការអភិវឌ្ឍជាលំដាប់។
លោកអភិបាលក៏បានផ្តាំផ្ញើដល់បងប្អូនទាំងអស់ឲ្យយកចិត្តទុកដាក់ថែរក្សាសុខភាព តាមរយៈការហាត់ប្រាណ រស់នៅស្អាត ហូបស្អាត ផឹកស្អាត ដើម្បីបន្តរស់នៅបានយូរអង្វែង រងចាំមើលការអភិវឌ្ឍរបស់ប្រទេសជាតិតទៅមុខទៀត៕
