(ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) គ្រោងបញ្ចូលចំណេះដឹងពាក់ព័ន្ធនឹងការបោះឆ្នោត ក្នុងកម្មវិធីសិក្សារបស់ក្រសួងអប់រំ យុវជន និងកីឡា ព្រមទាំងគ្រោងបង្កើតបណ្ណាល័យបោះឆ្នោត ដើម្បីបញ្ជ្រាបចំណេះដឹងអំពីការបោះឆ្នោតនេះដល់អ្នកបោះឆ្នោត សាធារណជន និងសិស្សានុសិស្ស ឲ្យកាន់ជ្រោតជ្រាបថែមទៀត។ នេះបើតាមលោក ហង្ស ពុទ្ធា អ្នកនាំពាក្យ គ.ជ.ប។

លោក ហង្ស ពុទ្ធា លើកឡើងបែបនេះ ក្នុងសិក្ខាសាលា​លើក​ទី​១ ស្ដី​ពី​ការ​ពង្រឹង​យុទ្ធសាស្ត្រ​អប់រំ​អ្នក​បោះឆ្នោត សម្រាប់​ការ​បោះឆ្នោត​ជ្រើស​តាំង​តំណាងរាស្ត្រ​ នីតិកាលទី​៦ ឆ្នាំ​២០១៨ នៅ​សណ្ឋាគារសាន់វ៉េ នា​ថ្ងៃ​ទី​១៣ ខែ​តុលា ឆ្នាំ​២០១៧ ដែលចូលរួមសហការ​ជាមួយ​ EU និង​អង្គការ​ Konrad។

លោក ហង្ស ពុទ្ធា បានបញ្ជាក់ថា ដើម្បីអប់រំអ្នកបោះឆ្នោតនៅទូទាំងប្រទេសកម្ពុជា ឲ្យកាន់យល់ច្បាស់អំពីការបោះឆ្នោត និងកាតព្វកិច្ចពាក់ព័ន្ធនោះ គ.ជ.ប គ្រោងនឹងធ្វើការងារមួយចំនួន រួមមាន៖
១៖ បង្កើតបណ្ណាល័យបោះឆ្នោត មានទាំងសៀវភៅ និងអាចស្រាវជ្រាវតាមប្រព័ន្ធអេឡិចត្រូនិច។
២៖ បង្កើនគ្រូបណ្ដុះបណ្ដាលសម្រាប់អប់រំអ្នកបោះឆ្នោត និងសាធារណជនទូទៅ។
៣៖ បង្កើតឧបករណ៍សម្រាប់អប់រំអ្នកបោះឆ្នោត និងសាធារណជន។
៤៖ បញ្ចូលចំណេះដឹងបោះឆ្នោតទៅក្នុងកម្មវិធីសិក្សារបស់ក្រសួងអប់រំ យុវជន និងកីឡា ជាដើម។

បើតាមអ្នកនាំពាក្យរូបនេះ សិក្ខាសាលានេះ គឺជាការបណ្ដុះបណ្ដាលផ្ទៃក្នុងបន្ថែមដល់មន្ត្រី គ.ជ.ប ឲ្យយល់ដឹងពីការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ សម្រាប់យកទៅបណ្ដុះបណ្ដាលអប់រំបន្តដល់អ្នកបោះឆ្នោត និងសាធារណជន។ សិក្ខាសាលានេះ មានរយៈពេល២ថ្ងៃ ចាប់ពីថ្ងៃ១៣-១៤ ខែតុលា ឆ្នាំ២០១៧ ដែលមានសិក្ខាកាមចូលរួមមកពី គ.ជ.ប សរុប៣២នាក់។

សូមជម្រាបថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ៕