(ភ្នំពេញ)៖ សាលាដំបូងរាជធានីភ្នំពេញ នៅថ្ងៃទី១៣ ខែតុលា ឆ្នាំ២០១៧ នេះ បើកសវនាការរឿងក្ដីមន្ត្រីធនាគារអេស៊ីលីដា៥នាក់ ករណីកិបកេងប្រាក់ធនាគារជិត២លានដុល្លារអាមេរិក ។
រឿងក្ដីនេះដំបូងមានមន្ត្រី៦នាក់ត្រូវបានឃាត់ខ្លួន តែក្រោយមកនៅដំណាក់កាលចៅក្រមស៊ើបសួរ បានសម្រេចលើកលែងការចោទប្រកាន់មនុស្សម្នាក់វិញ ហើយសល់តែ៥នាក់ប៉ុណ្ណោះ ដែលបញ្ជូនមកជំនុំជម្រះ ។
ឯកសារដែលបណ្តាញព័ត៌មាន Fresh News ទទួលបានបង្ហាញឲ្យដឹងថា មន្ត្រីទាំង៥នាក់នេះឈ្មោះ ឈន ទីន ជាប្រធានការិយាល័យឥណទានស្រុកឯកភ្នំ ខេត្តបាត់ដំបង ឈ្មោះ ស៊ីវ សុភ័ក្រ ឈ្មោះ ឡេវ ឆាយ និង ឈ្មោះ មឿន សំណង់ ជាមន្ត្រីធនាគារខេត្តបាត់ដំបង ព្រមទាំងឈ្មោះ ជា សិលា ប្រធានឥណទានខេត្តបាត់ដំបង។ ដោយឡែកឈ្មោះ ញឹក សារ៉ន ប្រធានសាខាធនាគារអេស៊ីលីដា ខេត្តបាត់ដំបង ត្រូវបានលើកលែងការចោទប្រកាន់នៅដំណាក់កាលចៅក្រមស៊ើបសួរ ។
តាមព័ត៌មានដែលទទួលបានបញ្ជាក់ថា បច្ចុប្បន្ននេះ គឺ មានតែជនជាប់ចោទពីរនាក់ប៉ុណ្ណោះកំពុងជាប់ពន្ធនាគារប៉េហ្ស៊ីរីឯ៣នាក់ កំពុងស្ថិតនៅក្រៅឃុំបណ្តោះអាសន្ន ។
ជនជាប់ចោទ៥នាក់ ត្រូវបានតុលាការចោទប្រកាន់ពីបទ «រំលោភលើទំនុកចិត្តពិសេសដោយអភិបាលឬបុគ្គលផ្សេងទៀត និងបទក្លែងបន្លំ» តាមមាត្រា៣៩១ មាត្រា៣៩៣ មាត្រា៦២៦ និងមាត្រា៦២៧នៃក្រមព្រហ្មទណ្ឌ។ ទោះបីយ៉ាងណា ក្រោយការសួរដេញដោល ពេញមួយព្រឹកថ្ងៃទី១៣ ខែតុលា លោកសេង លាង ចៅក្រមជំនុំជម្រះសាលាដំបូងរាជធានីភ្នំពេញ សម្រេចលើកពេលបន្តសវនាការទៅថ្ងៃទី២៦ ខែតុលា ខាងមុខនេះវិញ ។
ពាក់ព័ន្ធករណីនេះ ប្រភពព័ត៌មានបញ្ជាក់ថា ចាប់តាំងពីឆ្នាំ ២០១៤រហូតមកដល់ឆ្នាំ ២០១៦ មន្ត្រីធនាគារអេស៊ីលីដាសាខាខេត្តបាត់ដំបង បានឃុបឃិតគ្នាក្លែងបន្លំឯកសារជាទម្រង់អតិថិជនខ្ចីចងការប្រាក់ ។ ប៉ុន្តែគ្មានមនុស្សពិតប្រាកដឡើយ ដោយសរុបមានឯកសារក្លែងបន្លំនេះរហូតដល់ទៅ ១២ ឯកសារ និង ដកប្រាក់អស់ចំនួន ១.៧០០.០០០ដុល្លារអាមេរិក ។
ក្រោយមកមានការផ្លាស់ប្ដូរតួនាទីថ្នាក់ដឹកនាំសាខាធនាគារខេត្តបាត់ដំបង ទើបបែកការណ៍ពីករណីក្លែងបន្លំឯកសារ និង ដកប្រាក់ ទើបធនាគារអេស៊ីលីដាកណ្ដាលនៅភ្នំពេញ បញ្ជូនក្រុមអ្នកធើ្វអធិការកិច្ចទៅខេត្តបាត់ដំបង រកឃើញពីភាពមិនប្រក្រតីនេះ ហើយប្ដឹងទៅក្រសួងមហាផ្ទៃចាត់ការតែម្ដង៕
