(ស្ទឹងត្រែង)៖ អភិបាលខេត្តស្ទឹងត្រែង លោក ម៉ុម សារឿន បាននាំយកម៉ាស៊ីនកុំព្យូទ័រ រួមនិងថវិកាមួយចំនួន ដែលជារង្វាន់របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាជូនដល់សិស្សដែលទើបបានប្រឡងជាប់មធ្យមសិក្សាទុតិយភូមិ (បាក់ឌុប) នាពេលថ្មីៗនេះ។

ក្នុងឱកាសលោកអភិបាលខេត្ត បាននាំយកនូវប្រសាសន៍ផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងពីរតែងតែយកចិត្តទុកដាក់ខ្ពស់ចំពោះការសិក្សារៀនសូត្ររបស់សិស្សានុសិស្សគ្រប់ពេលវេលា។

ជាមួយគ្នានោះ លោកអភិបាលខេត្ត ក៏បាននាំយកអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនសិស្សជ័យលាភី និទ្ទេសB ចំនួន ០២នាក់ (ស្រី ០១នាក់) ក្នុងម្នាក់ៗទទួលបានម៉ាស៊ីនកំព្យូទ័រយួរដៃ ០១គ្រឿង, និងសិស្សជ័យលាភីនិទ្ទេស C ចំនួន ២៣នាក់(ស្រី ១៤នាក់) ក្នុងម្នាក់ៗទទួលបានថវិកា ១០០.០០០រៀល។
 
គួរបញ្ជាក់ផងដែរថា ក្នុងសម័យប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៦-២០១៧ នេះ ខេត្តស្ទឹងត្រែង មានបេក្ខជនប្រឡងជាប់ចំនួន ៤៨២នាក់ ស្រី ២៦២នាក់ ស្មើនឹង ៨៤.៥៦% ធៀបនឹងឆ្នាំសិក្សាចាស់កើនឡើង ៧.៦៨%។ ក្នុងនោះ និទ្ទេស B ចំនួន ០២នាក់(ស្រី ០១នាក់)  និទ្ទេស C ចំនួន ២៣នាក់(ស្រី ១៤នាក់) និទ្ទេស D ចំនួន ៩៤នាក់(ស្រ្តី៤៤នាក់) និងនិទ្ទេស E ចំនួន ៣៦៣នាក់(ស្រី ២០៣នាក់)៕