(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី១១ ខែតុលា ឆ្នាំ២០១៧នេះ បានប្រកាសអំពាវនាវឲ្យបងប្អូនប្រជាពលរដ្ឋខ្មែរទាំងអស់ ក្រោកឈរឡើង ដើម្បីការពារសន្តិភាពសម្រាប់ប្រទេសជាតិ ដែលសន្តិភាពនេះគឺជាការធានាដល់ការអភិវឌ្ឍរបស់ប្រទេសកម្ពុជា ទៅថ្ងៃអនាគត។

ការអំពាវនាវរបស់សម្តេចតេជោ ហ៊ុន សែន បានធ្វើឡើងនៅក្នុងឱកាសដែលសម្តេចអញ្ជើញជួបសំណេះសំណាលជាមួយកម្មករ កម្មការិនី ប្រមាណជា ២ម៉ឺននាក់ មកពីរោងចក្រចំនួន១១ នៅតាមបណ្តោយផ្លូវវ៉េងស្រេង ក្នុងខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី១១ ខែតុលា ឆ្នាំ២០១៧នេះ។

ថ្លែងទៅកាន់កម្មករ កម្មការិនី ជាង២ម៉ឺននាក់ ក្នុងពិធីសំណេះសំណាលនេះ សម្តេចតេជោ ហ៊ុន សែន បានប្រតិកម្មជាថ្មី ទៅនឹងការជ្រៀតជ្រែករបស់បរទេស មកដល់នយោបាយរបស់កម្ពុជា ជាពិសេសពាក់ព័ន្ធនឹងវិធានការច្បាប់នាថ្មីៗនេះ។ សម្តេចបានថ្លែងថា កម្ពុជា គ្រាន់តែប្រើច្បាប់ដើម្បីការពារជាតិ ការពារសន្តិសុខ ប៉ុន្តែត្រូវបរទេសចោទថា រាជរដ្ឋាភិបាលរំលោភសិទ្ធិមនុស្ស ប៉ុន្តែពេលពួកគេទម្លាក់គ្រាប់បែកលើកម្ពុជា គេមិនបានគិតទេ។ សម្តេចបានចាត់ទុកថា រឿងនេះវាជាអយុត្តិធម៌ណាស់សម្រាប់កម្ពុជា។ អ្នកមានលទ្ធភាពតែងដើរឈ្លានពានវាយប្រហារគេ។

ជាមួយនឹងប្រតិកម្មបែបនេះ សម្តេចតេជោ ហ៊ុន សែន បានអំពាវនាវយ៉ាងដូច្នេះថា៖ «ខ្ញុំអំពាវនាវដល់ប្រជាពលរដ្ឋរបស់យើង ក្រោកឈរឡើង រួមគ្នាដើម្បីការពារសន្តិភាពរបស់ប្រទេស។ សន្តិភាពនេះហើយ គឺធានាដល់ការអភិវឌ្ឍសម្រាប់យើងទៅថ្ងៃអនាគត»។

សម្តេចតេជោ ហ៊ុន សែន បានជំរុញឱ្យកម្មករ និងប្រជាពលរដ្ឋខ្មែរទាំងអស់ ពិនិត្យមើលស្ថានភាព នៅប្រទេសមួយចំនួននៅមជ្ឈឹមបូព៌ា ដែលជ្រៀតជ្រែកនយោបាយដោយប្រទេសមហាអំណាច ដូចជាសហរដ្ឋអាមេរិក ដែលរហូតដល់ពេលនេះ គ្មានអ្នកទៅទេសចរ និងវិនិយោគនោះឡើយ ហើយពេលនេះប្រទេសកំពុងធ្លាក់ដុនដាបគ្នាសន្តិសុខ សុវត្ថិភាព៕