(ភ្នំពេញ)៖ ក្រសួងទេសចរណ៍ សហការជាមួយសហភាពសហព័ន្ធយុវជនកម្ពុជា (ស.ស.យ.ក) បង្កើតវេទិកាជាតិទេសចរណ៍ដ៏ធំមួយ ក្រោមប្រធានបទ «យុវជន និងទេសចរណ៍» អមជាមួយ​ពិព័រណ៍ការងារទេសចរណ៍​លើក១ ដែលមានអ្នកចូលរួមយ៉ាងច្រើនកុះករ នៅមជ្ឈមណ្ឌល​សហប្រតិបត្តិការ​កម្ពុជា-កូរ៉េ​ (CKCC)។

វេទិកាទេសចរណ៍ដ៏ធំនេះ ប្រព្រឹត្តទៅរយៈពេល២ថ្ងៃ ចាប់ពីថ្ងៃទី១០-១១ ខែតុលា ឆ្នាំ២០១៧ ដែលពិធីបើកជាផ្លូវការធ្វើឡើងក្រោមអធិបតីភាពលោក ជា បូរ៉ា​ រដ្ឋលេខាធិការក្រសួងទេសចរណ៍ ​តំណាងលោក ថោង ខុន រដ្ឋមន្ត្រីក្រសួងទេសចរណ៍។

ការរៀបចំវេទិកាជាតិទេសចរណ៍​ខាងលើនេះ ​ធ្វើឡើង​ក្នុង​គោលបំណង​បញ្ជ្រាប​​​ការ​យល់ដឹង​ជាសាធារណៈ​ដល់យុវជនកម្ពុជា ​អំពីការ​ចូលរួម​របស់យុវជន ​ក្នុង​ការ​ជំរុញចលនា​ទេសចរក្នុងស្រុក ក៏ដូចជាការបញ្ជ្រាបការយល់ដឹង​ជាសាធារណៈ​ និង​ផ្តល់​ឱកាស​ឱ្យយុវជន​កម្ពុជា​ទាំងប្រឡ​ងជាប់ ឬ​ធ្លាក់​សញ្ញាបត្រ​មធ្យមសិក្សា​ទុតិយ​ភូមិ​ អាចស្វែង​យល់​ពីឱកាស​ការងារ​ក្នុង​ឧស្សាហកម្មទេសចរណ៍កម្ពុជា និងជំនាញវិជ្ជាជីវៈទេសចរណ៍នានា ដោយ​ធ្វើការ​ពិភាក្សា​លើ​ប្រធាន​បទ​សំខាន់​ៗចំនួន​៥ រួម​មាន៖
ប្រធាន​បទទី១៖ ​​ការចូលរួមរបស់យុវជនក្នុងការជំរុញ​ចលនាទេសចរណ៍ក្នុងស្រុក និងការបញ្រ្ជាបការយល់ដឹងជាសាធារណៈក្នុងវិស័យទេសចរណ៍​។
ប្រធាន​បទទី២៖ ​ការចូលរួមរបស់យុវជនក្នុងសកម្មភាពស្ម័គ្រចិត្ត និងការប្រឡងប្រណាំង «យុវជនទេសចរណ៍​ឆ្នើម» ប្រចាំឆ្នាំ។
ប្រធានបទទី៣៖ សហគ្រិនវ័យក្មេងឆ្នើមក្នុងវិស័យទេសចរណ៍ និងកម្មវិធីកម្មសិក្សាក្នុងវិស័យ​ទេសចរណ៍។
ប្រធានបទទី៤៖ កម្មវិធីកម្ចីសម្រាប់និស្សិតក្នុងវិស័យទេសចរណ៍ និងការបណ្តុះប​ណ្តាលជំនាញវិជ្ជាជីវៈទេសចរណ៍។
ប្រធានបទី៥៖ វិថីអភិវឌ្ឍជំនាញទេសចរណ៍យុវជន។

ក្នុងឱកាសនោះ លោករដ្ឋលេខាធិការ ជា បូរ៉ា បានលើកឡើងថា វិស័យទេសចរណ៍​ត្រូវបាន​ចាត់ទុក​ជាវិស័យ​អាទិ​ភាព​​ដ៏សំខាន់​មួយ​ ក្នុងការកសាង​សេដ្ឋ​​កិច្ច​-សង្គម ដោយបាន​នាំមកនូវ​ចំណូល​ជូនជាតិ ផ្តល់ឱកាស​ការងារ និងចូលរួម​ដល់​​​ការ​កាត់បន្ថយ​ភាពក្រីក្ររបស់ប្រជាពលរដ្ឋ​ប្រកបដោយ​ប្រសិទ្ធភាព ពិសេសតាមរយៈការរីកចម្រើននៃវិស័យទេសចរណ៍ បានជំរុញការអភិវឌ្ឍហេដ្ឋារចនាសម្ព័ន្ធផ្លូវថ្នល់ ស្ពាន កំពង់ផែ អាកាសយាន្តដ្ឋាន ការផ្តត់ផ្គង់អគ្គិសនី ទឹកស្អាតនៅតំបន់ទេសចរណ៍អាទិភាពជាដើម។

លោកបន្តថា កម្ពុជាមានសក្តានុពល​ធំធេងណាស់​សម្រាប់​ទាក់ទាញ​យុវ​ជន​​ធៀបនឹង​ប្រទេស​ជិត​ខាង។ បើគិត​ត្រឹមតែប្រាង្គប្រាសាទបុរាណ កម្ពុជាជាប្រទេសតែ​មួយ​គត់​ក្នុងតំបន់អាស៊ី ដែលមានប្រាង្គប្រាសា​ទបុរាណជាង​​ ១០០កន្លែង​ និងគ្រឹះប្រាសាទ​​រាប់ពាន់កន្លែងផ្សេងទៀត​ ​ដែលមានអាយុកាលរាប់ពាន់ឆ្នាំ ជាពិសេស​​ប្រាសាទអង្គរវត្ត ​ប្រាសាទ​ព្រះវិហារ និងប្រាសាទសំបូរព្រៃគុក ដែលបានក្លាយជា​សម្បត្តិ​បេតិកភណ្ឌ​វប្បធម៌រូបីនៃមនុស្សជាតិរបស់អង្គការ UNESCO កាល​ពី​ឆ្នាំ​១៩៩២ ​២០០៨ និង២០១៧ និងរបាំអប្សរា​ និងសិល្បៈល្ខោនខោល ដែលបានចុះបញ្ជី​ជាសម្បត្តិបេតិកភណ្ឌ​វប្បធម៌​អរូបី​របស់អង្គ​ការ UNESCO កាលពីឆ្នាំ២០០២ និង២០០៥។

លើស​ពីនេះទៅទៀត​ តំបន់​ឆ្នេរសមុទ្រ​​​កម្ពុជាទាំង​មូល​ប្រវែង ៤៤០គីឡូម៉ែត បាន​ក្លាយជា​សមាជិកក្លឹបឆ្នេរសមុទ្រដែលស្អាតបំផុត​​លើ​សាកលលោក កាលពី​​ឆ្នាំ​២០១១ និងត្រូវ​បាន​ប្រសិទ្ធនាម «ឆ្នេរសមុទ្រកម្ពុជា តារារះនាទិសនិរតី» ព្រម​ជាមួយ​នឹង​តំបន់អេកូ​ទេសចរណ៍​ភូមិ​ភាគ​ឦសាន្ត ដែល​ពោលពេញ​ទៅដោយ​អាថ៌កំបាំង​ធម្មជាតិដ៏សម្បូរ​បែបសម្រាប់​ការសិក្សា​ស្រាវជ្រាវ និង​ផ្សង​ព្រេង​របស់​យុវជនជាភ្ញៀវទេសចរជាតិ និងអន្តរជាតិ។

សូមជម្រាបថា ក្នុងឆ្នាំ២០១៦ កន្លងទៅ កម្ពុជាទទួលបានទេសចរអន្តរជាតិប្រមាណ ៥លាននាក់ ក្នុងអត្រាកំណើន ៥% និងទេសចរក្នុងស្រុកប្រមាណ ១១.៦៤លាននាក់ នាំចំណូលជូនជាតិប្រមាណ ៣,៤០០លានដុល្លាអាមេរិក ចាក់បញ្ចូលក្នុង​សេដ្ឋកិច្ច​ជាតិរួម​ចំណែកប្រមាណ ១៣% នៃផលិតផល​ក្នុងស្រុកសរុប (GDP) និងបង្កើត​ការងារ​ផ្ទាល់ប្រមាណ​ ៦២ម៉ឺននាក់ ព្រមទាំងបង្កើតការងារ​ដោយប្រយោល​​រាប់សិបម៉ឺននាក់ទៀត​។

រយៈពេល​៧ខែ​ ដើមឆ្នាំ​២០១៧ ទេសចរអន្តរជាតិមកទស្សនាកម្ពុជាប្រមាណ ៣.១លាននាក់ កើនឡើង ១២.៨% ហើយ​ជាចក្ខុវិស័យ​ នៅ​ឆ្នាំ២០២០ កម្ពុជារំពឹង​ថានឹង​​ទទួលបាន​ភ្ញៀវ​ទេសចរអន្តរជាតិប្រមាណ ៧លាននាក់ និងទេសចរក្នុងស្រុក​ប្រមាណ ១៥លាននាក់ ដែល​​នឹងបង្កើត​​ចំណូលជូន​​​ជាតិ​ប្រមាណ ៥ពាន់លានដុល្លារ និងបង្កើត​​ការងារដោយផ្ទាល់​ប្រមាណជិត ១លាននាក់៕