(ភ្នំពេញ)៖ ក្រសួងសាធារណការ និងដឹកជញ្ជូន បានឲ្យដឹងនៅថ្ងៃទី០៤ ខែតុលា ឆ្នាំ២០១៧នេះថា ក្នុងខែកញ្ញាកន្លងទៅនេះ លេខាធិការដ្ឋានគណៈកម្មាធិការ សម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ បានចាប់រថយន្ដចំនួន៦៤២គ្រឿង ដែលដឹកលើសទម្ងន់។
ក្រសួងសាធារណការ និងដឹកជញ្ជូន តាមរយៈទំព័រ Facebook ផ្លូវការរបស់ខ្លួនបានបន្ថែមថា ក្រៅពីការចាប់បានរថយន្ដទាំងនេះ ក្រសួងក៏បាន ពិន័យជាប្រាក់សរុបចំនួន ១,០៧០,៥០៨,០០០រៀល។
សូមជម្រាបថា ចំនួនរថយន្តដែលចាប់បានទាំងនេះ មានការកើនឡើងចំនួន៤៨៧គ្រឿង បើប្រៀងធៀបក្នុងខែសីហា ឆ្នាំ២០១៧ ដែលក្នុងចំណោមរថយន្តដែលចាប់បាននោះ ផ្ទុកលើសទម្ងន់ចាប់ពី៤តោន រហូតដល់២៣តោន៕
