(ភ្នំពេញ)៖ សហគ្រិនជោគជ័យ៣រូប បានចូលរួមចែករំលែកបទពិសោធន៍ ស្ដីពីយុទ្ធសាស្រ្ដក្នុងការធ្វើ ប្រេនឌីង (Branding) ទៅដល់សាធារណជន ​ដែលកំពុងតែចាប់ផ្ដើមធ្វើអាជីវកម្ម ដើម្បីជាគំនិតក្នុងការប្រកបអាជីវកម្មប្រកបដោយភាពជោគជ័យ។

សហគ្រិនជោគជ័យទាំង៣រូបនេះរួមមាន លោក ហុង សុហួរ អគ្គនាយកក្រហ៊ុន ផ្សារមូលបត្រកម្ពុជា លោកវេជ្ជបណ្ឌិត គួច ម៉េងលី ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន ម៉េងលី ជេ គួច អេឃ្យូខេសិន និង លោក ឃុន ឈុនដារ៉ា ស្ថាបនិកភេសជ្ជៈ KOI។

ថ្លែងក្នុងវេទិកាស្ដីពីយុទ្ធសាស្រ្ដក្នុងការធ្វើ ប្រេនឌីង នាព្រឹកថ្ងៃទី​០៤ ខែតុលា ឆ្នាំ២០១៧នេះ លោក ហុង សុហួរ បានថ្លែងឲ្យដឹងថា «ផ្សារមូលបត្រកម្ពុជា បានរៀបចំកម្មវិធីនេះឡើង មួយត្រីមាសម្ដង ដើម្បីជាឱកាសដល់អ្នកដែលចាប់អារម្មណ៍នឹងការធ្វើអាជីវកម្ម ក៏ដូចជាអ្នកចាប់ផ្ដើមអាជីវកម្មដំបូង ដែលចង់មានគំនិតបន្ថែមផ្សេងៗ ឬចង់បើកអាជីវកម្មថ្មី ឲ្យទទួលបានបទពិសោធន៍ពីរៀម​ច្បង​ ដែលជោគជ័យក្នុងវិស័យអាជីវកម្មស្រាប់ ដែលលេចធ្លោរក្នុងប្រទេសកម្ពុជា»។

លោកបានបន្ដទៀថា សហគ្រិនជោគជ័យទាំងអស់នឹងចាប់ផ្ដើមចែករំលែកបទពិសោធន៍ យោលបល់ផ្សេងៗ ហើយអ្នកចូលរួមទាំងអស់​នឹង ទទួលបាននូវបទពិសោធន៍ មេរៀន ឧបសគ្គ ឬវិធីដើម្បីទទួលបានជោគជ័យ នៅពេលដែលចាប់ផ្ដើមអាជីវកម្ម ដូច្នេះយើង​នៅក្នុងផ្សារមូលបត្រកម្ពុជា នឹងព្យាយាមពង្រឹងវិស័យឯកជន ដើម្បីទៅថ្ងៃក្រោយអាចជួយដល់វិស័យសេដ្ឋកិច្ចឲ្យរឹងមាំ។

ក្នុងនោះលោក វេជ្ជបណ្ឌិត គួច ម៉េងលី ក៏បានឲ្យដឹងដែរថា ប្រេនឌីង គឺជាវិធីសាស្រ្ដបំផុលឲ្យគេស្គាល់នូវអត្តសញ្ញាណ កេរ្ដិ៍ឈ្មោះ​របស់ក្រុមហ៊ុន។ ប្រេនឌីង មិនមែនជា Logo មិនមែនជា វេបសាយ នោះឡើយ តែជាវិធីសាស្រ្ដធ្វើយ៉ាងណាឲ្យគេដឹងស្គាល់ និងយល់។

លោកបានបញ្ជាក់ទៀតថា សម្រាប់អ្នកចាប់ផ្ដើមធ្វើអាជីវកម្មដំបូង ត្រូវយល់ឲ្យច្បាស់ថា តើត្រូវធ្វើអាជីវកម្មអ្វី? តើមានទីផ្សារ សម្រាប់អាជីវកម្មនេះហើយឬនៅ? ប្រសិនបើទីផ្សារមានហើយ តើចំណង់ចំណូលចិត្ត ចំណេះជំនាញរបស់យើងខ្លាំងប៉ុណ្ណា? ប្រសិនបើយើងខ្លាំង ច្បាស់លាស និងចូលចិត្តហើយនោះ យើងនឹងអាចសម្រេចបានហើយ។ បន្ទាប់ពីយើងសួរខ្លួនឯងរួចហើយ ត្រូវបន្ដ​សួរទៀតថា តើយើងមានធនធានគ្រប់គ្រាន់ឬនៅ ទាំងធនធានថវិកា ធនធានមនុស្ស និងមានបច្ចេកទេសធ្វើឬអត់? ប្រសិនបើមាន​គ្រប់គ្រាន់ហើយចាំបន្ដធ្វើ និងរៀបចំធ្វើ LOGO រៀបចំបុគ្គលិក រៀបចំធនធានមនុស្ស រចនាសម្ព័ន្ធការផ្សព្វផ្សាយ ហើយបន្ទាប់មកទៀត​គឺការបន្ដធ្វើប្រេនឌីង។

លោកបានឲ្យដឹងទៀតថា «ដើម្បីប្រកបអាជីវកម្មអ្វីមួយ ត្រូវតែឆ្លងកាត់ការៀនសូត្រឲ្យច្រើន អានច្រើនចេះច្រើន.... ដូច្នេះហើយ​ទើប​គេឲ្យពួកយើងខំរៀន ខំធ្វើការ មុននឹងយកលុយទៅវិនិយោគទុន គេឲ្យយើងយកចំណេះដឹង ចំណង់ចំណូលចិត្ត ជំនាញទៅវិនិយោគទុនជាមុនសិន ត្រូវធ្វើការឲ្យគេឆ្លងកាត់ និងយកបទពិសោធន៍ជាមុនសិន ទើបមិនធ្វើឲ្យយើងយកលុយទៅបំផ្លាញចោល
ដូច្នេះសំខាន់ត្រូវតែស៊ីជម្រៅ ឲ្យបានច្បាស់ពីអ្វីដែលយើងចង់ធ្វើ ទាំងចំណេះដឹង បទពិសោធន៍ ច្បាស់លាស់ ទើបអាចធ្វើឲ្យអ្នកមិនបរាជ័យ»។

សហគ្រិនវ័យក្មេងកម្ពុជា លោក ឃុន ឈុនដារ៉ា បានឲ្យដឹងដែរថា ​«ក្នុងថ្ងៃនេះ ខ្ញុំគ្រាន់តែចែករំលែកដល់បងប្អូន ​ដែលបានចូលរួមឲ្យយល់ដឹងបន្ថែមទៀត អំពីការធ្វើប្រេនឌីង ឲ្យកាន់តែស៊ីជម្រៅជាងមុនទៀត ខ្ញុំគិតថានៅក្នុងប្រទេសកម្ពុជា មានអ្នកចេះបង្កើតស្នាដៃបង្កើតផលិតផលល្អ និងសេវាកម្មប្លែកៗច្រើន ប៉ុន្ដែដោយសារតែយើងមិនទាន់ចេះធ្វើប្រេនឌីង Marketing ទើបធ្វើឲ្យផលិតផលរបស់យើង មិនត្រូវបានគេស្គាល់ច្រើន និងទូលំទូលាយលើទីផ្សារ»។

លោកបានបញ្ជាក់ទៀតថា «គោលបំណងរបស់ខ្ញុំ ចង់ជម្រុញអ្នកចេះបង្កើតផលិតផល តែមិនទាន់ចេះបង្កើតម៉ាក ឲ្យចេះបង្កើតម៉ាក​ដោយខ្លួនឯង ចេះខ្ចប់ នឹងចេះរៀបចំយ៉ាងណា ដើម្បីអាចឲ្យយើងយកទៅលក់នៅបរទេសបាន និងអាចពង្រីកមុខមាត់ទីផ្សារកម្ពុជា​កាន់ប្រសើរ»៕