ចាប់រថយន្តស្លាកលេខនគរបាល ដឹកឈើចេញពីទីតាំងនគរបាលវរព្រំដែនគោកវរ៨២៣ ស្រុកសំឡូត ខណៈលេចឮថា មានអ្នកកំពុងរត់ការដោះលែងវិញ
04-10-2017 11:27
(បាត់ដំបង)៖ រដ្ឋបាលព្រៃឈើស្រុកសំឡូត សហការជាមួយកម្លាំងអាវុធហត្ថស្រុករតនៈមណ្ឌល បានស្ទាក់ចាប់រថយន្តដឹកឈើ របស់នគរបាលវរការពារព្រំដែនលេខ៨២៣ ដែលមានលោក លោក យឹម វិចិត្រ ប្រធានអង្គភាពនគរបាលវរការពារព្រំដែនគោក៨២៣ ក្នុងស្រុកសំឡូត ស្ថិតនៅលើផ្លូវជាតិលេខ៥៧ ត្រង់ចំណុចភូមិដង្គត់ ឃុំស្ដៅ ស្រុករតនៈមណ្ឌល ខេត្តបាត់ដំបង។
ប្រតិបត្តិការស្ទាក់ចាប់ រថយន្តដឹកឈើពាក់ស្លាកនគរបាលនេះ របស់ប្រធានអង្គភាពនគរបាលវរៈការពារព្រំដែនគោក៨២៣នេះ ធ្វើឡើងនៅរសៀលថ្ងៃទី៣ ខែតុលា ឆ្នាំ២០១៧ ដែលជាប្រភេទឈើគគីរ និងឈើដួងចែម។
បើតាមសេចក្តីរាយការណ៍ពីសមត្ថកិច្ច រថយន្តដឹកឈើនោះ ជាប្រភេទរថយន្តកូរ៉េទម្ងន់២.៥តោន ពាក់ស្លាកលេខនគរបាល ២-១៥៤៣ ជារថយន្តរបស់អង្គភាពនគរបាលវរៈការពារ ព្រំដែនគោកលេខ៨២៣ ដែលមានទីតាំងក្បែរផ្លូវ ទៅកាន់ច្រកទ្វារតំបន់ ៤០០ ស្រុកសំឡូត បើកបរដោយមន្ត្រីនគរបាលម្នាក់ ឈ្មោះ មឿន វាសនា និងរួមដំណើការពារដោយមនុស្ស៤នាក់ទៀត ដែលជាមន្ត្រីនគរបាលនៅអង្គភាព៨២៣ជាមួយគ្នា។
ប្រភពដដែលបញ្ជាក់ថា ឈើដែលមន្ត្រីព្រៃឈើ និងកងរាជអាវុធហត្ថស្ទាក់ចាប់នោះ មានចំនួន៧សន្លឹកធំៗ (ក្ដារងឿ) ជាប្រភេទឈើគគីរ និងឈើដួងចែម បើតាមការសួរនាំមន្ត្រីជំនាញបានប្រាប់ថា ឈើនោះឈើនោះ ជារបស់នគរបាលវរ:ការពារព្រំដែនគោកលេខ៨២៣ ដោយគ្មានលិខិតស្នាមទេ ដោយបម្រុងដឹកយកទៅទុកនៅក្រុងបាត់ដំបង។
លោក គឹម ពៅ មេបញ្ជាការអាវុធហត្ថស្រុករតនៈមណ្ឌលបានបញ្ជាក់ថា លោកមិនបានដឹងរឿងអ្វីទេ គ្រាន់តែខាងរដ្ឋបាលព្រៃឈើស្រុកសំឡូត ពឹងពាក់ឲ្យជួយឃាត់រថយន្តនោះប៉ុណ្ណោះ ហើយឈើទាំងអស់នោះ ត្រូវបានមន្រ្តីខណ្ឌរដ្ឋបាលព្រៃឈើខេត្ត ដឹកយកទៅខេត្តអស់ហើយ។
ប្រភពព័ត៌មានពីមន្ត្រីជាន់ខ្ពស់ម្នាក់ នៅខេត្តបាត់ដំបងទម្លាយថា ឈើទាំងនោះជារបស់លោក យឹម វិចិត្រ ប្រធានអង្គភាព នគរបាលវរៈការពារព្រំដែនគោក៨២៣ និងលោក ម៉ី ណាន់ មេប៉ុស្តិ៍នគរបាលច្រក៤០០ ដែលជាអ្នករកស៉ីដឹកឈើដ៏ល្បឺឈ្មោះ នៅស្រុកសំឡូតឈើប្រណិត។ បន្ទាប់ពីមានការឃាត់រថយន្តដឹកឈើនេះ មានមនុស្សចំនួន កំពុងរត់ការចង់ឲ្យមានការដោះលែងផងដែរ។
ពាក់ព័ន្ធករណីឃាត់រថយន្តដឹកឈើ ដែលសមត្ថកិច្ចអះអាងថា ជារបស់ប្រធានអង្គភាព នគរបាលវរៈការពារព្រំដែនគោក៨២៣ និងបក្ខពួកនេះ អង្គភាពព័ត៌មាន Fresh News មិនទាន់អាចទំនាក់ទំនង លោក ម៉ី ណាន់ និងលោក យឹម វិចិត្រ បានទេនៅព្រឹកថ្ងៃទី៤ ខែតុលានេះ៕
