(ភ្នំពេញ)៖ ដោយមើលឃើញអំពីកំណើន ប្រជាពលរដ្ឋ​ថ្នាក់កណ្តាល ការកើនឡើងចំណូលប្រជាជនជាមួយ និងកំណើនសេដ្ឋកិច្ចដ៏រឹងមាំ ក្នុងរយៈពេលបីទសវត្សចុងក្រោយនេះ ក៏ដូចជាការកើនឡើងនៃចំនួនភ្ញៀវទេសចរបរទេស ជាពិសេសភ្ញៀវទេសចរចិន ក្រុមហ៊ុន HGB Group ដែលជាក្រុមហ៊ុនក្នុងស្រុក បានសហការជាមួយ Yum China ដែលជាក្រុមហ៊ុនភោជនីយដ្ឋាន ឈានមុខគេរបស់ប្រទេសចិន នាំយកនូវភោជនីយដ្ឋានលំដាប់ពិភពលោក មានឈ្មោះថា «Little Sheep» មកកាន់ប្រទេសកម្ពុជាក្នុងថ្ងៃនេះ​ ដោយបានធ្វើពិធីបើកសម្ពោធ នាល្ងាចថ្ងៃទី០២ ខែតុលា ឆ្នាំ២០១៧នេះ។

ភោជនីយដ្ឋាន Little Sheep Hot Pot បានទទួលជោគជ័យយ៉ាងធំធេង ក្នុងរយៈពេល ១៨ ឆ្នាំមកហើយ។ ជាមួយនឹងបណ្តាញទូទាំងពិភពលោក នៅ១២០ក្នុងតំបន់ និងទីក្រុងនានា ដែលមានហាងជិត៣០០​នៅតាមទីក្រុងធំៗ ដូចជា សៀងហៃ ហុងកុង តូក្យូ ញូវយ៉ក និងតូរ៉ុនតូជាដើម។ ភោជនីយដ្ឋានយីហោ The Little Sheep ត្រូវបានគេស្គាល់ថា «មានមុខម្ហូប​ពិសេស» និង​«សាច់ដ៏ល្អឥតខ្ចោះ» ដែលគ្មានពីរបានបង្ហាញខ្លួនពាសពេញ ពិភពលោក។ ឥឡូវនេះ មុខម្ហូបពិសេសៗទាំងនេះ បានមកដល់ព្រះរាជាណាចក្រកម្ពុជាយើងហើយ ដើម្បី
បម្រើជូនដល់បងប្អូនជាលក្ខណៈគ្រួសារ និងភ្ញៀវទេសចរចិន ក៏ដូចជាភ្ញៀវទេសចរបរទេសដទៃទៀត ភ្លក្សនូវរសជាតិពិសេសៗទាំងនេះ នៅរាជធានីភ្នំពេញ។

លោក Herfried Hasenoehrl នាយកប្រតិបត្តិនៃក្រុមហ៊ុន HGB Group បានថ្លែងឲ្យដឹងថា ជាមួយនឹងវត្តមានរបស់ Little Sheep Hot Pot នឹងផ្តល់ជូននូវរស​ជាតិពិសេស និងថ្មីមួយទៀត សម្រាប់ប្រជាជនកម្ពុជា និងភ្ញៀវទេសចរចិន ដែលកំពុងកើនឡើង​។ ទន្ទឹមនឹងនេះ Little Sheep នឹងជួយទាក់ទាញភ្ញៀវទេសចរចិន ទាំងនោះឲ្យស្នាក់កម្ពុជា កាន់តែយូរជាងមុន។

លោកបានថ្លែងបន្តថា «ទីផ្សារគោលដៅរបស់យើង គឺភ្ញៀវជាលក្ខណៈគ្រួសារ និងភ្ញៀវចិននៅក្នុងប្រទេសកម្ពុជា។ ​វត្តមានភោជនីយដ្ឋាន The Little Sheep ក៏ជួយ និងលើកទឹកចិត្តឲ្យភ្ញៀវទេសចរចិនស្នាក់នៅ ប្រទេសកម្ពុជាយូរជាងមុនផងដែរ​។ ​ក្រុមហ៊ុន HGB មានការចាប់អារម្មណ៍ ក្នុងការនាំយកភោជនីយដ្ឋាន «The Little Sheep» ចូលមកកាន់ប្រទេសកម្ពុជា មិនត្រឹមតែដោយសារតែវាជាស្លាកសញ្ញា លំដាប់ពិភពលោកប៉ុណ្ណោះ​ទេ ក៏ប៉ុន្តែយើងចង់ឲ្យប្រជាជនកម្ពុជា មានជម្រើសកាន់តែច្រើននៅពេលពួកគាត់ ចង់ចេញមកបរិភោគម្ហូបអាហារ នៅខាងក្រៅ»។

យោងតាមទិន្នន័យ ពីក្រសួងសេដ្ឋកិច្ច និងហិរញ្ញវត្ថុ បានព្យាករណ៍ថា កំណើនសេដ្ឋកិច្ចរបស់ប្រទេសកម្ពុជា នឹងសម្រេចបានប្រហែល ៧ ភាគរយនៅក្នុងឆ្នាំនេះ និង ឆ្នាំក្រោយ ខណៈដែលផលិតផលក្នុងស្រុក សរុបសម្រាប់មនុស្សម្នាក់ៗនឹងកើនឡើងដល់ ១.៤២២ ដុល្លារនៅដំណាច់ឆ្នាំនេះ ដោយកើនពី ១.៣០២ដុល្លារ កាលពីឆ្នាំមុន។
កាលពីឆ្នាំមុនប្រទេសកម្ពុជា បានស្វាគមន៍ភ្ញៀវទេសចអន្តរជាតិ ប្រមាណជាជាង ៥ លាននាក់ដែលភ្ញៀវទេសចរចិនឈានមុខគេ ខណៈដែលរដ្ឋាភិបាលកម្ពុជា បានប្ដេជ្ញាថា នឹងទាក់ទាញភ្ញៀវទេសចរចិនឲ្យបាន២ លាននាក់ក្នុងមួយឆ្នាំៗ។

ថ្លែងនៅក្នុងវេទិកាទេសចរណ៍ សកលលោកលើកទី៤ នៅទី​ក្រុងម៉ាកាវ ​កាលពីឆ្នាំ២០១៥ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជា​ណាចក្រកម្ពុជា បានអំពាវនាវឲ្យមានការសម្រួល ដល់ការប្រើប្រាស់ប្រាក់យន់ នៅក្នុងប្រទេសកម្ពុជា ដើម្បីទាក់ទាញភ្ញៀវទេសចរ និង​​វិនិយោគិនចិនមកកាន់ព្រះរាជាណាចក្រកម្ពុជា កាន់តែច្រើនថែមទៀត។ លោក Herfried Hasenoehrl ក៏បានបន្តឲ្យដឹងផងដែរថា ភោជនីយដ្ឋាន Little Sheep នេះនឹងផ្តល់ជម្រើសទូទាត់ច្រើន សម្រាប់អតិថិជន និងក៏ផ្តល់ជូនពិសេសដល់គ្រប់អតិថិជនខ្លួនផងដែរ។

លោកបន្ថែមថា​ «យើងទទួលយកការទូទាត់​តាម Union Pay, Visa, និង Master។ ប៉ុន្តែយើងមិនទាន់មានការផ្តល់ជូនពិសេស តាមរយៈ​ធនាគារនៅឡើយទេ នាពេលបច្ចុប្បន្ននេះ​។
​រាល់ភ្ញៀវ VIP ទាំងអស់នឹងទទួលបានអត្ថប្រយោជន៍ពិសេស ដូចជាអាទិភាពក្នុងការតម្រង់ជួរ​ជាដើម​។​ Little Sheep Hot Pot ក៏ចង់ផ្តល់ជាយោបល់ដល់អតិថិជន ឲ្យសាកមកភ្លក្សនូវរសជាតិពិសេសៗជាច្រើនទៀត ដែលភោជនីយដ្ឋានផ្តល់ជូន។ ​មុខម្ហូបពិសេសៗ​ដែល Little Sheep Hot Pot ផ្តល់ជូនអតិថិជនរួមមានសាច់ចៀម ពិសេសមកពីអង់គ្លេស អូស្រ្តាលី សាច់ចៀមអាំង និង តៅហ៊ូបំពងពិសេស»។

យោងតាមការសិក្សាថ្មីមួយ ស្តីអំពីផ្នែកអាហារ និងភេសជ្ជៈបានបង្ហាញថា ប្រហែល​១.៥៣លានដុល្លារ ត្រូវបានចំណាយជារៀងរាល់ថ្ងៃ សម្រាប់អាហារពេលព្រឹក និងអាហារថ្ងៃត្រង់ នៅតាមទីក្រុងធំៗនៅប្រទេសកម្ពុជា ជាពិសេសនៅរាជធានីភ្នំពេញ។ បើយោងតាមរបាយការណ៍នេះ គិតត្រឹមដំណាច់ ឆ្នាំ២០១៥ ត្រឹមតែនៅរាជធានីភ្នំពេញ មានភោជនីយដ្ឋានចំនួន ២.១៨០ កន្លែងដោយកើនឡើង ពីចំនួន១.៧២៦ កន្លែងក្នុងឆ្នាំ្ ២០១៤។ ភោជនីយដា្ឋន Little Sheep តែងតែធ្វើការ​ផ្សព្វផ្សាយនិង លើកកម្ពស់អំពីមុខម្ហូបពិសេសៗ ទាំងនេះដែលមានដើម​កំណើតពីទឹកដី វាលស្មៅរបស់ប្រទេស ម៉ុងហ្គោលី។ Little Sheep បានបង្កើតឡើងជាង១៨ឆ្នាំ​មកហើយ នៅតាមដងវិថី​អាល់លែន​ លេខ២២ ក្នុងទីក្រុងប៊ាវទូ នៃរដ្ឋម៉ុងហ្គោលី ក្នុងប្រទេសចិន។

ភោជនីយដា្ឋន Little Sheep បានទទួលស្គាល់ និងមានកេរ្តិ៍ឈ្មោះយ៉ាងឆាប់រហ័ស សម្រាប់មុខម្ហូបពិសេសៗ ដោយគ្មានទឹកជ្រលក់របស់ខ្លួន។ ការជម្រុះចោលនូវទម្លាប់ នៃការដាក់ទឹកជ្រលក់ទៅលើមុខម្ហូប Little Sheep បានបង្ហាញនូវនិន្នាការថ្មីមួយ ដោយកែប្រែទម្លាប់ចាស់ នៃ​ការញុំាមកបង្កើតនូវរសជាតិចំនួនប្រាំ បញ្ចូលតែមួយ និងភាពដូចគ្នានៃគ្រឿង ទេស៧មុខ ឲ្យមកតែមួយ។ រាល់អាហារគ្រប់មុខត្រូវបាន​បម្រើ ជូននូវមុខម្ហូបថ្មីៗនិងស្រស់ៗ។ ទាំងនេះគឺជាការរួមបញ្ចូលគ្នា ដ៏ល្អឥតខ្ចោះនៃមូលដ្ឋាន​នៃការចម្អិន ជាមួយ និងការផ្សំគ្រឿងតាមបែបម៉ុងហ្គោលី បានផ្លាស់ប្តូរលំនាំនៃមុខម្ហូប លំដាប់ពិភពលោក៕