(ភ្នំពេញ)៖ គណនី Facebook ផ្លូវការរបស់លោក អ៊ុក គឹមសេង អ្នកនាំពាក្យក្រសួងព័ត៌មាន ត្រូវបានជនអនាមិកលួច (Hack) គ្រប់គ្រង នៅថ្ងៃទី០២ ខែតុលា ឆ្នាំ២០១៧នេះ និងបានបង្ហោះសារ និងរូបភាពមួយចំនួន ដែលប៉ះពាល់ដល់សិទ្ធិអ្នកដទៃ។
លោក អ៊ុក គឹមសេង បានថ្លែងយ៉ាងដូច្នេះថា «ខ្ញុំបាទ អ៊ុក គឹមសេង អ្នកនាំពាក្យក្រសួងព័ត៌មាន សូមប្រកាសជូនជ្រាបជាព័ត៌មានថា ព្រឹកថ្ងៃទី០២ ខែតុលា ឆ្នាំ២០១៧ គណនី Facebook របស់ខ្ញុំ ត្រូវបានចោរអ៊ីនធឺណេត បានហែកចូលកាន់កាប់ និងបានបង្ហោះសារ ឬរូបភាពមួយចំនួន ដែលរំលោភសិទ្ធិឯកជន»។
លោក អ៊ុក គឹមសេង ក៏បានបញ្ជាក់ថា លោកមិនទទួលខុសត្រូវនូវរាល់ព័ត៌មាន ឬអត្ថបទ រូបភាពផ្សេងៗ ដែលរំលោភសិទ្ធិឯកជននោះទេ ព្រោះគណនីមួយនេះ មិនស្ថិតក្រោមការគ្រប់គ្រង របស់លោកទៀតនោះទេ៕
