(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ នឹងបំពេញដំណើរ​ទស្សនកិច្ច​ទៅកាន់​បណ្ដាប្រទេស​ក្នុងតំបន់​អាស៊ីចំនួន ០៥ នៅខែវិច្ឆិកា​ខាងមុខនេះ នាឱកាស​ចូលរួម​កិច្ចប្រជុំ​កំពូលថ្នាក់​តំបន់។ នេះបើតាម​ការចេញផ្សាយ​ដោយ​សារព័ត៌មាន BBC នៅព្រឹកថ្ងៃសៅរ៍ ទី៣០ ខែកញ្ញា ឆ្នាំ២០១៧។

ជាមួយគ្នា​នោះដែរ បើតាម​សេតវិមាន លោក ដូណាល់ ត្រាំ នឹងបំពេញដំណើរ​ទស្សនកិច្ច​រយៈពេល ១១ថ្ងៃ មកកាន់​ប្រទេស​ជប៉ុន ចិន កូរ៉េខាងត្បូង វៀតណាម ហ្វីលីពីន និងរដ្ឋហាវ៉ៃ​របស់​សហរដ្ឋអាមេរិក។ សេតវិមានបានគូស​បញ្ជាក់បន្ថែមដូច្នេះថា «លោកប្រធានាធិបតី​អាមេរិក ក៏បានសន្យា​ផងដែរថា នឹងពង្រឹង​ដំណោះស្រាយ​អន្តរជាតិ ប្រឈមមុខ​នឹងការគំរាម​កំហែង ពីសំណាក់​កូរ៉េខាងជើង»។

កូរ៉េខាងជើង និងសហរដ្ឋអាមេរិក​បានប្រើវោហាស័ព្ទធ្វើសង្រ្គាមដាក់គ្នាទៅវិញទៅមក​នាពេលថ្មីៗនេះ ដោយចាប់ផ្ដើមពី លោក ដូណាល់ ត្រាំ ដែលបាន​យកវេទិកា​អង្គការសហប្រជាជាតិ គំរាមកម្ទេចទីក្រុង​ព្យុងយ៉ាងឱ្យ​ក្លាយជាផេះ ខណៈរបបដឹកនាំ​លោក គីម ជុងអ៊ុន ព្រមានថា នឹងបាញ់ទម្លាក់​យន្ដហោះចម្បាំង​អាមេរិក ដែលហោះ​មកក្បែរ​ដែនអាកាស​របស់ខ្លួន។ ក៏ប៉ុន្តែ សង្រ្គាមពាក្យ​សម្ដីនេះក៏​បានធ្វើឱ្យទីក្រុងប៉េកាំង ព្រួយបារម្ភ​មិនតិច​នោះទេ ពោលគឺបើ​តាមក្រុម​អ្នកជំនាញខ្លះ តាមរយៈ​ការព្រួយបារម្ភ​នេះឯង និងដើម្បី​បន្ទន់ចិត្ត ទីក្រុង​វ៉ាស៊ីនតោន ក៏ដូចជាទុក​ឱកាសឱ្យកូរ៉េខាងជើង​គិតគូរឡើងវិញ ទើបក្រសួង​ពាណិជ្ជកម្មចិន​ បានចេញបញ្ជាឱ្យក្រុមហ៊ុន​កូរ៉េខាងជើង​មានមូលដ្ឋាន​នៅក្នុងប្រទេសចិន ឬជាក្រុមហ៊ុន​មាន​ភាគហ៊ុនចិន-កូរ៉េខាងជើង បិទប្រតិបត្តិការ​ក្នុងរយៈពេល ១២០ថ្ងៃ រាប់ចាប់ពី​ការអនុម័ត​ការដាក់​ទណ្ឌកម្ម UN កាលពីពាក់​កណ្ដាល​ខែកញ្ញានេះ។

គួរបញ្ជាក់ថា នៅក្នុងដំណើរ​ទស្សនកិច្ច​ជាលើកដំបូងរបស់ លោក ដូណាល់ ត្រាំ មកកាន់ទ្វីបអាស៊ី គេរំពឹងថា ប្រធានបទសំខាន់ៗមួយចំនួននឹងត្រូវលើក​មកពិភាក្សាក្នុងនោះ​រួមមាន វិបត្តិនុយ ក្លេអ៊ែរកូរ៉េខាងជើង សមុទ្រចិនខាងត្បូង កិច្ចព្រមព្រៀង TPP និងការស្ដារទំនាក់ទំនងល្អឡើង​វិញ​ជាមួយហ្វីលីពីន​ជាដើម៕