(ភ្នំពេញ)៖ លោកបណ្ឌិត សេង សុភាព ប្រធានវិទ្យាស្ថានជាតិ ប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មានវិទ្យា​ ហៅថា NIPTICT ដែលជាសាកលវិទ្យាល័យទី១នៅកម្ពុជា ដែលជំនាញផ្នែកបច្ចេកវិទ្យាគមនាគមន៍ និងព័ត៌មានវិទ្យា (ICT) បានថ្លែងអះអាងថា នៅប្រទេសកម្ពុជា មានតម្រូវការធំធេងខ្លាំងណាស់ សម្រាប់អ្នកជំនាញ ICT ប៉ុន្តែអ្នកជំនាញនេះបើជាមានតិចតួចនៅឡើយ។

ការថ្លែងយ៉ាងដូច្នេះធ្វើឡើងក្នុងឱកាសដែលលោកអញ្ជើញចូលរួមផ្តល់កិច្ចសម្ភាសន៍ ក្នុងកម្មវិធី សង្គម និងសេដ្ឋកិច្ច របស់បណ្តាញសារព័ត៌មាន Fresh News។

ទន្ទឹមនឹងការខ្វះខាតអ្នកជំនាញ ICT នេះ លោកបណ្ឌិត សេង សុភាព ក៏បានជំរុញលើកទឹកចិត្តឲ្យ សិស្ស ដែលទើបបញ្ចប់សញ្ញាបត្រមធ្យម​សិក្សាទុតិយភូមិ (បាក់ឌុប) នាពេលថ្មីៗនេះ សិក្សាជំនាញ ជំនាញ ICT ព្រោះវាជាជំនាញមួយដ៏ល្អ ដែល​នឹងផ្ដល់ជម្រើសល្អ ក្នុងឱកាសការងារនៅលើទីផ្សា ទាំងពេលបច្ចុប្បន្ន និងនាពេលអនាគត។

លោកបណ្ឌិត សេង សុភាព​ បានថ្លែងឲ្យដឹងថា «វិស័យ​ព័ត៌មានវិទ្យា ត្រូវបានប្រើប្រាស់យ៉ាងទូលំទូលាយ នៅក្នុងប្រទេសកម្ពុជា និងទូទាំងពិភពលោក ហើយស្ទើរតែគ្រប់វិស័យទាំង​អស់ ​សុទ្ធតែត្រូវការវិស័យ ICT ដើម្បីឲ្យការងារទាំងអស់ អាចប្រព្រឹត្តិទៅបានដោយប្រសិទ្ធភាព និងមានភាពប្រកួតប្រជែង ក្នុងអាជីវកម្ម ធនាគារ ពាណិជ្ជកម្ម រដ្ឋាភិបាល ការកំសាន្ដ សារព័ត៌មាន សុទ្ធសឹងតែប្រើប្រាស់បច្ចេកវិទ្យា យ៉ាងខ្លាំងក្លាផងដែរ»។

លោកបានបន្ដទៀតថា ក្នុងប្រទេសនីមួយៗ ដើម្បីធានានូវភាពប្រកួតប្រជែង ក្នុងវិស័យសេដ្ឋកិច្ច ទាល់តែមានធនធានមនុស្សខ្លាំង ​ក្នុង​វិស័យព័ត៌មានវិទ្យា ដើម្បីធ្វើយ៉ាងណាជម្រុញសេដ្ឋកិច្ច ឲ្យមានភាពប្រកួតប្រជែង ដែលសម័យនេះហៅថា សេដ្ឋកិច្ច Digital ដែលជា​សេដ្ឋកិច្ច ដែលប្រើប្រាស់បច្ចេកទេស ICT ជាគោល។

លោកបានបញ្ជាក់ទៀតថា «តម្រូវការធនធានមនុស្សក្នុងវិស័យ ICT នេះ គឺមានទំហំធំធេងខ្លាំងណាស់ គ្រប់ក្រុមហ៊ុនទាំងអស់ សុទ្ធ​តែត្រូវការអ្នកជំនាញនេះ មិនថាតែក្រុមហ៊ុន IT ក្រុមហ៊ុនទូរគមនាគមន៍ ក្រុមហ៊ុនអ៊ីនធឺណេតនោះទេ សូម្បីតែខាងទេសចរណ៍ ខាងសំណង់ កសិកម្ម ក៏ត្រូវការអ្នកជំនាញ ICT ដែរ»។

លោកបន្ថែមទៀតថា ប្រសិនបើសិស្សសិក្សាផ្នែកសំណង់នោះ ធ្វើការបានតែក្រុមហ៊ុនសំណង់នោះទេ បើរៀនធនាគារនោះនិស្សិត​ធ្វើការបានតែធនាគារប៉ុណ្ណោះ ប៉ុន្ដែប្រសិនបើនិស្សិតជ្រើសរើសជំនាញព័ត៌មានវិទ្យាសម្រាប់សិក្សា នោះនឹងមានឱកាសធ្វើការ​ងារ នៅក្នុងក្រុមហ៊ុនដទៃទៀតបាន ព្រោះថាស្ទើរតែគ្រប់​វិស័យទាំងអស់ សុទ្ធសឹងតែត្រូវការ អ្នកជំនាញ ICT ធនាគារក៏ត្រូវការអ្នកជំនាញ​ ICT ក្រុមហ៊ុនទូរស័ព្ទក៏ត្រូវាការជំនាញ ICT ។

លោកបានបន្ថែមទៀតថា ដោយសារតែកម្ពុជា មានយុវជនច្រើន ដូច្នេះត្រូវតែធ្វើយ៉ាងណាជម្រុញ ឲ្យយុវជនទាំងនោះងាកមកចាប់​អារម្មណ៍ វិស័យបច្ចេកវិទ្យា ព្រោះតាមរយៈវិស័យនេះហើយ ដែលអាចពង្រឹងភាពប្រកួតប្រជែង របស់ប្រទេសកម្ពុជា និងជម្រុញសេដ្ឋកិច្ច ឲ្យកាន់តែរីកចំរើនបន្ថែមទៀត ព្រោះថា សេដ្ឋកិច្ចបច្ចុប្បន្នមិនមែនជាសេដ្ឋកិច្ច ដែលប្រើកំលាំងបាយទេ តែជាសេដ្ឋកិច្ចពឹងផ្អែក​លើចំណេះដឹង និងបច្ចេកវិទ្យា មានន័យថា កាលណាកម្ពុជាមិនមានអ្នកដែលចេះ វិស័យបច្ចេកវិទ្យាខ្លាំងនោះទេ ក៏មិនអាចជម្រុញសេដ្ឋកិច្ចកម្ពុជាឲ្យខ្លាំងក្លានោះទេ។

លោកបណ្ឌិត សេង សុភាព បន្ថែមទៀតថា ដើម្បីលើកទឹកចិត្តដល់បេក្ខជន ដែលទើបប្រឡងជាប់បាក់ឌុប ឲ្យសិក្សាជំនាញផ្នែក ICT សម្រាប់ឆ្នាំសិក្សា ២០១៧-២០១៨នេះ វិទ្យាស្ថានជាតិ NIPTICT មានផ្ដលជូនជាអាហារូបករណ៍ រយ:ពេល៤ឆ្នាំពេញ ចំនួន៦០កន្លែងផងដែរ សម្រាប់បេក្ខភាពនារី ដែលមានបំណងសិក្សានៅ NIPTICT វិទ្យាស្ថាននឹងមានផ្ដល់ ជូនអាហារូបករណ៍៥០% ដោយស្វ័យប្រវត្តិ រាល់ពេលសិស្សស្រីចុះឈ្មោះចូលរៀន បើទោះបីជាគាត់ពុំបានប្រឡងជាប់អាហារូបករណ៍ក្ដី។ ជាមួយគ្នានេះ សាលាក៏មានជាអន្តេវាសិកដ្ឋាន សម្រាប់ផ្ដល់ឲ្យនិស្សិតដែលមកពីមណ្ដាខេត្តនានាស្នាក់នៅផងដែរ។

សូមជម្រាបថា NIPTICT ជាវិទ្យាស្ថានដែលប ង្កើតឡើងដៅយក្រសួប្រៃសណីយ៍ និងទូរគមនាគមន៍ ដែលមានបេសកកម្មដូចជា ការអប់រំ និងបណ្ដុះបណ្ដាល ការស្រាវជ្រាវ និងនវានុវត្តន៍ និង គំនិតច្នៃប្រឌិត និងសហគ្រិនភាព ដោយវិទ្យាស្ថានជាតិ មានផ្ដល់ការអប់រំបណ្ដុះបណ្ដាលថ្នាក់បរិញ្ញាប័ត្រ លើជំនាញបីដូចជា ទូរគមនាគមន៍ និងបណ្ដាញកុំព្យូទ័រ (Telecoms & Networking) ពាណិជ្ជកម្មអេឡិចត្រូនិច (e-Commerce) និងវិទ្យាសាស្រ្តកុំព្យូទ័រ (Computer Science) ផងដែរ។ វិទ្យាស្ថានជាតិមានដៃគូសហការ ដែលជាក្រុមហ៊ុនបច្ចេកវិទ្យាធំៗនាំមុខ ក្នុងប្រទេសកម្ពុជាដូចជា Smart Hauwai Seatel Metfone Cisco ZTE... ។ លើសពីនេះទៅទៀតវិទ្យាស្ថាន ក៏មានជាដៃគូជាមួយនឹង សាកលវិទ្យាល័យនៅក្រៅប្រទេសដូចជា ប្រទេសកូរ៉េ ប្រទេសថៃ និងប្រទេសវៀតណាមជាដើម៕