(ភ្នំពេញ)៖ ជាមួយនឹងការរម្លឹកដល់រឿង គ្រាប់បែកគីមីរបស់សហរដ្ឋអាមេរិក ដែលបានបន្សល់ទុកតាំងពីសម័យសង្រ្គាម នៅស្រុករមាសហែក ខេត្តស្វាយរៀង ហើយមិនទាន់អាចដោះចេញរហូតដល់ពេលនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបង្ហាញការជឿជាក់ថា ឆ្លងការបទពិសោធន៍ ដ៏ឈឺចាប់កាលពីអតីតកាល ប្រជាពលរដ្ឋខ្មែរ នឹងមិនទុកឱ្យប្រទេសរបស់ខ្លួន ស្ថិតនៅក្រោមឥទ្ធិពលបរទេស ដូចអ្នកជំនាន់មុនទៀតឡើយ។
ការអះអាងនេះបានធ្វើឡើង នៅក្នុងពិធីជួបសំណេះសំណាលជាមួយកម្មករជាង១ម៉ឺននាក់ មកពីរោងចក្រចំនួន១៧រោងចក្រ នៅវេទិកាលើផ្លូវ៦០ម៉ែត្រ នាសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ នៅព្រឹកថ្ងៃទី២៧ ខែកញ្ញា ឆ្នាំ២០១៧នេះ ស្របពេលដែលមានប្រជាពលរដ្ឋជាច្រើន នៅស្រុករមាសហែក បានសម្តែងការព្រួយបារម្ភ និងភ័យខ្លាចចំពោះគ្រាប់បែកគីមីដ៏ធំសម្បើមរបស់សហរដ្ឋអាមេរិក ដែលទើបនឹងប្រទះឃើញនាថ្មីៗនេះ។
សម្តេចតេជោ ហ៊ុន សែន បានថ្លែងទៅកាន់កម្មករថា ការលេចឡើងនូវផែនការឃុបឃិតគ្នាជាមួយបរទេស ដោយអ្នកនយោបាយប្រឆាំង នាថ្មីៗនេះគឺជាការព្យាយាម ទាញកម្ពុជាដែលកំពុងមានសន្តិភាព និងការអភិវឌ្ឍនេះ ឱ្យវិលត្រឡប់ទៅកាន់អតីតឆ្នាំ១៩៧០ ជាពេលដែល លន់ នល់ ធ្វើរដ្ឋប្រហារទម្លាក់សម្តេចសីហនុ តាមខ្សែញាក់របស់អាមេរិក បណ្តាលឱ្យកម្ពុជាធ្លាក់ក្នុងសង្រ្គាមដ៏រ៉ាំរ៉ៃជាច្រើនទស្សវត្សរ៍ ប៉ុន្តែសម្តេចជឿជាក់ថា ប្រជាពលរដ្ឋខ្មែរទាំងអស់ នឹងមិនឱ្យប្រទេសខ្លួន ដើរជាន់ដានប្រវត្តិសាស្រ្តទៀតឡើយ។
សម្តេចតេជោ ហ៊ុន សែន បានគូសបញ្ជាក់យ៉ាងដូច្នេះថា៖ «ស្ថានភាពប្រហាក់ប្រហែលគ្នានេះ គឺជាការច្រំដែលនៃប្រវត្តិសាស្រ្ត តែខ្ញុំជឿជាក់លើប្រជាជនកម្ពុជា ដែលមិនទុកឱ្យប្រទេសរបស់ខ្លួន នៅក្រោមឥទ្ធិពលរបស់បរទេស ក្រោមខ្សែញាក់របស់បរទេស ដែលធ្វើឱ្យប្រទេស(កម្ពុជា) កើតនូវសង្រ្គាម បាត់បង់នូវសន្តិភាពដែលជាផ្នែកដ៏សំខាន់មិនអាចបេះផ្តាច់ចេញពីការអភិវឌ្ឍ»។
សម្តេចតេជោ ហ៊ុន សែន បានថ្លែងបន្តទៀតថា នៅដំណាក់កាលនេះទាំងរាជរដ្ឋាភិបាល ទាំងប្រជាពលរដ្ឋ ត្រូវរួមគ្នាថែរក្សាសន្តិភាព និងការអភិវឌ្ឍរបស់ខ្លួនដែល កំពុងមាននេះ។ សម្តេចរម្លឹកឱ្យប្រជាពលរដ្ឋក្រឡេកមើលទៅប្រទេសមួយចំនួននៅមជ្ឈឹមបូព៌ា ដូចជាប្រទេសស៊ីរី លីប៊ី អ៊ីរ៉ាក់ និងយ៉េមែនជាដើម ដែលបរទេសលូកដៃ យ៉ាងជ្រៅ ក្នុងនយោបាយប្រទេសទាំងនោះ បានធ្វើឱ្យប្រទេសធ្លាក់ដុនដាបយ៉ាងខ្លាំង ហើយប្រជាពលរដ្ឋរស់នៅយ៉ាងវេទនា ដូច្នេះកម្ពុជាត្រូវការពារសន្តិភាព និងការអភិវឌ្ឍរបស់ខ្លួន កុំឱ្យដូចប្រទេសទាំងនោះ។
សម្តេចបានបញ្ជាក់ថា «បើគ្មានស្ថិរភាព គ្មានសណ្តាប់ធ្នាប់ទេ ការងាររបស់យើងក៏គ្មានសុវត្ថិភាពដែរ តិចៗបិទរោងចក្រ គ្មាននរណាគេមកវិនិយោគ ក្នុងប្រទេសយើង ក្រោមគ្រាប់បែកគ្រាប់ផ្លោង ឬការបាញ់ប្រហារគ្នាតាមបែបភេរវកម្ម ឬក៏បាញ់ប្រហារគ្នា តាមរយៈបងតូចបងធំ ក្រុមម៉ាហ្វ៊ីយ៉ានោះទេ ហើយក៏គ្មាននរណាមកទស្សនកិច្ចប្រទេសយើង តាមរយៈការធ្វើសកម្មភាពទេសចរណ៍នោះដែរ»៕
