(ភ្នំពេញ)៖ ដើម្បីបញ្ជ្រាបចំណេះដឹង ផ្នែកហិរញ្ញវត្ថុឲ្យកាន់តែទូលំទូលាយ និងជាប្រយោជន៍ ដល់ប្រជាពលរដ្ឋកម្ពុជា ជាពិសេស​យុវវ័យជំនាន់ ក្រោយឲ្យមានសមត្ថភាពយល់ដឹង ផ្នែកហិរញ្ញវត្ថុគ្រប់គ្រាន់​សម្រាប់ជីវិតរបស់ពួកគេ នាពេលអនាគត ក្រសួងអប់រំ យុវជន និងកីឡា ក្រោមការសហការជាមួយធនាគារជាតិនៃកម្ពុជា អង្គការ Good Return និងអង្គការ World Education Cambodia គ្រោងនឹងបញ្ជូលកម្មវិធីសិក្សា ចំណេះដឹងផ្នែកហិរញ្ញវត្ថុ ទៅលើមុខវិជ្ជាចំនួន៣ ដល់សិស្សសិក្សាចំណេះដឹងទូទៅ​ នៅកម្ពុជាឆ្នាំ២០១៩ ខាងមុខ។

ថ្លែងក្នុងសិក្ខាសាលាស្ដីពី «គម្រោងបញ្ជ្រាបចំណេះដឹង ផ្នែកហិរញ្ញវត្ថុ នៅក្នុងកម្មវិធីសិក្សា​ចំណេះទូទៅ នៅកម្ពុជាដំណាក់កាលទី​១» នាព្រឹកថ្ងៃទី២៧ ខែកញ្ញា ឆ្នាំ២០១៧ លោក ម៉ុក សារ៉ុម អគ្គនាយករងអប់រំ និងជាតំណាងក្រសួងអប់រំ យុវជន និងកីឡា បានថ្លែង​ឲ្យដឹងថា «បន្ទាប់ពីមានការសហការជាមួយ ធនាគារជាតិនៃកម្ពុជា អង្គការ Good Return និងអង្គការ World Education
Cambodia យើងបានកំពុងដុតដៃដុតជើង ក្នុងការបញ្ជ្រាបចំណេះដឹងហិរញ្ញវត្ថុ ទៅក្នុងកម្មវិធីសិក្សា... ដោយបញ្រ្ជាបកម្មវិធីសិក្សានេះ ទៅក្នុងមុខវិជ្ជាចំនួន៣ រួមមាន មុខវិជ្ជាគណិតវិទ្យា មុខវិជ្ជាបំណិនជីវិតតាមមូលដ្ឋាន និងមុខវិជ្ជា គេហកិច្ចវិទ្យា ​ដោយបញ្ជា្របតាំងពីថ្នាក់បឋមសិក្សា រហូតដល់ថ្នាក់វិទ្យាល័យ»។

លោកបន្ដទៀតថា ការបញ្ជ្រាបកម្មវិធីសិក្សាផ្នែកហិរញ្ញវត្ថុនេះ នឹងទទួលបានអត្ថប្រយោជន៍ច្រើន ព្រោះថានេះគឺជាការបណ្ដុះគំនិត​​តាំង ​ពីក្មេងវ័យទៅដល់កុមារ ដើម្បីឲ្យកុមារចេះប្រើប្រាស់ថវិកា ដោយមានផែនការច្បាស់លាស់ ដើម្បីឲ្យជីវិតរបស់ពួកគេទៅថ្ងៃមុខមាន​ការអភិវឌ្ឍន៍រឹងមាំ រីកចំរើន ដោយមិនមានបញ្ហាផ្នែកសេដ្ឋកិច្ច រួមទាំងអាចការពារការចំណាក់ស្រុកផ្សេងៗទៀតបាន។

លោកបានបញ្ជាក់ទៀតថា នៅក្នុងឆ្នាំ២០១៧ នេះក្រសួងអប់រំគ្រាន់ តែបញ្ជ្រាបចំណេះដឹងផ្នែកហិរញ្ញវត្ថុក្នុងកម្មវិធីសិក្សា ហើយឆ្នាំ​២០១៨ ក្រសួងអប់រំនឹងចាប់ផ្ដើមសរសេរលម្អិតបន្ថែម រហូតដល់ឆ្នាំ២០១៩ ទើបបញ្ជូលខ្លឹមសារទាំងមូលចូលក្នុងសៀវភៅសិក្សា​គោលរបស់សិស្ស។

ក្នុងនោះដែរលោកស្រី ជា សេរី អគ្គនាយកបច្ចេកទេសបានថ្លែងឲ្យដឹងដែរថា ការបញ្ជ្រាបចំណេះដឹងផ្នែកហិរញ្ញវត្ថុ នៅក្នុង​កម្មវិធី​សិក្សានេះ ត្រូវបានធ្វើឡើង តាំងពីថ្នាក់បឋមសិក្សា​ រហូតដល់ថ្នាក់វិទ្យាល័យ ដើម្បីធ្វើយ៉ាងណាបញ្ជ្រាបចំណេះដឹងនេះដល់កុមារ ​ឲ្យយល់តាំងតែពីក្មេងវ័យទៅ ហើយយើងក៏សង្ឃឹមថា កុមារបានរៀនហើយពួកគេ ក៏អាចពន្យល់ទៅដល់ឪពុកម្ដាយ បងប្អូន ដែលមិនបានទទួលចំណេះដឹងផ្នែកអប់រំ ឲ្យយល់ច្បាស់បន្ថែមទៀត។

លោកស្រីបានបញ្ជាក់ទៀតថា ធនាគារជាតិនៃកម្ពុជា គ្រោងនឹងបើកម្មវិធីបណ្ដុះបណ្ដាល គ្រូបង្គោលដើម្បីទៅបង្រៀន​ដល់សិស្សានុសិស្សផងដែរ ដោយដំណាក់កាលទី១នេះ​ យើងបានរៀបចំជាឯកសារ ជាមុនសិន ហើយដំណាក់កាល​បន្ដបន្ទាប់ទៀត​ ​នឹងរៀបចំវគ្គបណ្ដុះបណ្ដាល​ ដល់គ្រូបង្គោល ព្រោះថាទល់តែគ្រូបង្គោលយល់ទើប គាត់អាចទៅបង្រៀនលោកគ្រូ អ្នកគ្រូ​ផ្សេងៗទៀត ហើយលោកគ្រូ អ្នកគ្រូ នឹងអាចពន្យល់បន្ថែមដល់សិស្សានុសិស្ស ទាំងអស់ឲ្យបានយល់៕