(ភ្នំពេញ)៖ ក្រោយពីពិភាក្សាជាមួយ លោក កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារត្រពាំងផ្លុង ខេត្តត្បូងឃ្មុំ រួចហើយ , ក្រុមមេធាវីសម្រេចដាក់បណ្តឹងសាទុក្ខទៅតុលាការកំពូលបន្តទៀត ដើម្បីប្រឆាំងនឹងដីកាសម្រេចឃុំខ្លួន លោក កឹម សុខា។ នេះបើតាមការបញ្ជាក់របស់លោកមេធាវី សំ សុគង់ ថ្លែងប្រាប់បណ្តាញព័ត៌មាន Fresh News នៅវេលាថ្ងៃត្រង់ទី២៧ ខែកញ្ញា ឆ្នាំ២០១៧នេះ ។
លោកមេធាវីសំ សុគង់ ថ្លែងថា «ក្រុមមេធាវីប្តឹងនឹងសេចក្ដីសម្រេចទាំងមូលនៃសាលដីការបស់សភាស៊ើបសួរសាលាឧទ្ធរណ៍ ហើយអាចថ្ងៃសុក្រសប្តាហ៍នេះ បណ្តឹងនឹងដាក់ផ្លូវការ» ។
សូមបញ្ជាក់ថា នៅថ្ងៃទី២៦ ខែកញ្ញា ម្សិលមិញ សាលាឧទ្ធរណ៍បានបើកសវនាការលើសំណុំរឿងស្នើសុំនៅក្រៅឃុំរបស់ លោក កឹម សុខា។ ក្រោយបើកសវនាការ លោក ឃុន លាងម៉េង អនុប្រធានសាលាឧទ្ធរណ៍ និង ជាប្រធានក្រុមប្រឹក្សាជំនុំជម្រះសភាស៊ើបសួរ សម្រេចតម្កល់ការសម្រេចរបស់ចៅក្រមស៊ើបសួរសាលាដំបូងរាជធានីភ្នំពេញទុកជាបានការដដែល ពោលគឺ បន្តឃុំខ្លួនលោក កឹម សុខា ក្នុងពន្ធនាគារដដែល ។
ក្រោយពេលសវនាការនោះ អ្នកនាំពាក្យសាលាឧទ្ធរណ៍ និងមហាអយ្យការអមសាលាឧទ្ធរណ៍ បានចេញសេចក្តីថ្លែងការណ៍ សម្តែងនូវ ការសោកស្តាយយ៉ាងខ្លាំង ចំពោះមេធាវីរបស់ជនត្រូវចោទ ដែលជាអ្នកប្តឹងឧទ្ធរណ៍ប្រឆាំងនឹងដីកាឃុំខ្លួន របស់ជនត្រូវចោទ។ ប៉ុន្តែបែរជាធ្វើពហិការដើរចេញ មិនបាននៅលើកពីមូលហេតុ នៃបណ្តឹងឧទ្ធរណ៍របស់ខ្លួននៅក្នុងបន្ទប់សវនាការទៅវិញ។
សេចក្តីប្រកាសព័ត៌មានរបស់ លោក ទូច ថារិទ្ធិ អ្នកនាំពាក្យសាលាឧទ្ធរណ៍ បញ្ជាក់ទៀតថា ការបកស្រាយពីការប៉ះពាល់ដល់សិទ្ធិ របស់ជនត្រូវចោទរបស់ ក្រុមមេធាវីការពារ លោក កឹម សុខា ជាសាធារណៈ មិនមានលក្ខណៈត្រឹមត្រូវឡើងយ។ សំណុំរឿងនេះ គឺជាសំណុំរឿងមុខអង្គសេចក្តី មិនមែនជាសំណុំរឿងអង្គសេចក្តី ដែលចាំបាច់ត្រូវមានជនជាប់ចោទទេ ភាពខុសគ្នានេះ គឺមានចែងក្នុងច្បាប់ច្បាស់លាស់។
សាលាឧទ្ធរណ៍បញ្ជាក់ថា «នៅក្នុងដំណាក់កាលស៉ើបសួរឈ្មោះ កឹម សុខា មានឋានៈជាជនត្រូវចោទនៅឡើយ ដូច្នេះការលើកយកតាមមាត្រា៣០០ និង៣០៥ នៃក្រមនីតិវិធីព្រហ្មទណ្ឌ របស់ក្រុមមេធាវីការពារឲ្យឈ្មោះ កឹម សុខា ដើម្បីទាមទារ ឲ្យមានវត្តមានជនត្រូវចោទក្នុងសវនាការ គឺជាការយល់ច្រឡំធ្ងន់ធ្ងរណាស់ ព្រោះមាត្រានេះចែក មានអត្ថន័យទាក់ទងនឹងជនជាប់ចោទ ដូច្នេះការលើកឡើងរបស់ក្រុមមេធាវីនេះ ហាក់បែរជាទទួលស្គាល់ថា ឈ្មោះ កឹម សុខា គឺជាជនជាប់ចោទ»៕
