(ភ្នំពេញ)៖ រយៈពេល៨ខែ ឆ្នាំ២០១៧ គិតចាប់ពីខែមករា ដល់ខែសីហា កម្ពុជាបាននាំចេញជ័យកៅ​ស៊ូស្ងួតបានជិត១០ម៉ឺនតោន កើនឡើង៣៤ភាគរយ ដោយទទួលបានទឹកប្រាក់ ជាង១៦៦លានដុល្លារ កើនឡើង៥៧ភាគរយ បើធៀបនឹងរយៈពេលដូចគ្នា ឆ្នាំ២០១៦។ នេះបើយោងតាមរបាយការណ៍ ផ្លូវការ​របស់អគ្គនាយកដ្ឋានកៅស៊ូ ក្រសួងកសិកម្ម រុក្ខាប្រមាញ់ និងនេសាទ ដែលអង្គភាព Fresh News ទទួលបាន​នៅថ្ងៃទី២៦ ខែកញ្ញា ឆ្នាំ២០១៧។

យោងតាមរបាយការណ៍ របស់អគ្គនាយកដ្ឋានកៅស៊ូ បានបញ្ជាក់ឲ្យដឹងទៀតថា ៨ខែ ឆ្នាំ២០១៧ កម្ពុជាបាននាំចេញកៅស៊ូចំនួន៩៩,០៥៧តោន ដោយទទួលបានទឹកប្រាក់ចំនួន១៦៦,៧១៩,៧៦០លានដុល្លារ ដែលតម្លៃជ័រកៅស៊ូជាមធ្យម ថ្លៃ១៦៨៣ដុល្លារក្នុងតោន។

លោក ប៉ុល សុផា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានកៅស៊ូ បានប្រាប់អង្គភាព Fresh News នៅរសៀលថ្ងៃទី២៦ ខែកញ្ញានេះថា ស្ថានភាពកៅស៊ូនៅរយៈពេល៨ខែ ឆ្នាំ២០១៧ មានដំណើរការល្អមួយ បើទោះតម្លៃជ័រកៅស្ថិតក្នុងកម្រិតជាមធ្យមរង្វង់១៧០០ដុល្លារ ដែលជាតម្លៃមិនល្អណាស់ណាក៏ដោយ ប៉ុន្តែតម្លៃនេះអាចឲ្យអ្នកដាំកៅស៊ូ អាចទ្រទ្រង់ការចំណាយ និងចំណេញបានខ្លះ។

អគ្គនាយករូបនេះ បានបញ្ជាក់ទៀតថា រាជរដ្ឋាភិបាលបានជំរុញលើកទឹកចិត្ត ឲ្យមានការដាំដុះកៅស៊ូ ឲ្យបានច្រើនតបតាមគោលនយោបាយកៅស៊ូ។

សូមជម្រាបថា កៅស៊ូកម្ពុជា បាននាំចេញទៅកាន់ប្រទេសចិន វៀតណាម សង្ហឹបុរី និងម៉ាឡេស៊ី។ នៅឆ្នាំ២០១៦កន្លងទៅ កម្ពុជា​បាននាំចេញជ័រកៅស៊ូ បានជាង១៤ម៉ឺនតោន ទទួលបានទឹកប្រាក់ជាង១៨០លានដុល្លារ។ គិតត្រឹមចុងឆ្នាំ២០១៦ កម្ពុជាមានផ្ទៃដីកៅស៊ូចំនួន ៤៣១,៣៣២ហិកតា៕