(ព្រះសីហនុ)៖ ​ចៅក្រមស៊ើបសួរនៃសាលាដំបូងខេត្តព្រះសីហនុ ​លោក គួន ចន្ថា ចេញដីកាបង្គាប់ឲ្យឃុំខ្លួន​បុគ្គលិក សណ្ឋាគារ និងកាស៊ីណូវិមានខ្សាច់ស ចំនួន៣នាក់ នៅថ្ងៃទី២៣ ខែកញ្ញា ឆ្នាំ២០១៧ ដែលលេងបៀរបន្លំឲ្យភ្ញៀវឈ្នះ ដើម្បីយកលុយចែកគ្នា ហើយត្រូវបានម្ចាស់កាស៊ីណូដាក់ពាក្យបណ្ដឹង។

តាមដីកាបង្គាប់របស់លោកចៅក្រមស៊ើបសួរ ដែល​អង្គភាព Fresh News ទទួលបាននៅព្រឹកថ្ងៃទី២៤ ខែកញ្ញា ឆ្នាំ២០១៧នេះ បញ្ជាក់ថា បុគ្គលិកកាស៊ីណូវិមានខ្សាច់ស ទាំង៣នាក់នេះ ទី១៖ឈ្មោះ YAO FENGYU អាយុ៤២ឆ្នាំ ជនជាតិចិន, ទី២៖ឈ្មោះ នាក់ វិច្ឆិកា អាយុ១៩ឆ្នាំ និងទី៣៖ឈ្មោះ ផាន់ ប្រុសពៅ អាយុ២៣ឆ្នាំ ហើយអ្នកទាំង៣នាក់នេះ ត្រូវបានចោទប្រកាន់ពីបទ «ឆបោក» តាមបញ្ញត្តិមាត្រា៣៧៧ និងមាត្រា៣៧៨ នៃក្រមព្រហ្មទណ្ឌ។​

សូមជម្រាបថា ជនទាំង៣នាក់នេះ ត្រូវបានកម្លាំងសមត្ថកិច្ចឃាត់ខ្លួន នៅថ្ងៃទី២២ ខែកញ្ញា ឆ្នាំ២០១៧ បន្ទាប់បានទទួលពាក្យបណ្ដឹង ពីម្ចាស់សណ្ឋាគារ និងកាស៊ីណូវិមានខ្សាច់ស៕