(ភ្នំពេញ)៖ ឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ បានថ្លែងប្រាប់បណ្តាញព័ត៌មាន Fresh News ឲ្យដឹងនៅមុននេះបន្តិចនារសៀលថ្ងៃទី២២ ខែកញ្ញា ឆ្នាំ២០១៧នេះថា សមត្ថកិច្ចនគរបាលខេត្តក្រចេះបានឃាត់ខ្លួនបុរសម្នាក់ឈ្មោះ ហ៊ុយ ឧត្ដម ភេទប្រុស អាយុ២៩ឆ្នាំ នៅភូមិឬស្សីកែវ ឃុំប្ញស្សីកែវ ស្រុកព្រែកប្រសព្វ ខេត្តក្រចេះ ពាក់ព័ន្ធនឹងការជេរប្រមាថ ថ្នាក់ដឹកនាំប្រទេស គឺសម្តេចតេជោ ហ៊ុន សែន នៅលើបណ្ដាញសង្គម Facebook។
លោកស្នងការ លន់ សុផាត បានបញ្ជាក់បន្ថែមថា សមត្ថកិច្ចកំពុងសួរចម្លើយដើម្បីកសាងសំណុំរឿងបញ្ជូនទៅសាលាដំបូងខេត្តក្រចេះ នឹងត្រៀមបញ្ជូនទៅតុលាការ។ ចំណែកបុរសពូកែជេរប្រមាថនេះមានស្រុកកំណើតនៅស្រុកអង្គស្នួល ខេត្តកណ្តាល៕
