(ស្ទឹងត្រែង)៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដឹកនាំមន្ដ្រីរាជការក្រសួង ​ចុះជួបសំណេះសំណាលជាមួយបងប្អូន នាយទាហាន ពលទាហាន យោធភូមិភាគទី១ និងផ្តាំផ្ញើ​សួរសុខទុក្ខ ដល់កងទ័ព​ឈរជើងប្រចាំ នៅតំបន់ព្រំដែនកម្ពុជា-ឡាវ ខេត្តស្ទឹងត្រែង ក្នុងរដូវបុណ្យភ្ជុំបិណ្ឌ។

រដ្ឋមន្ដ្រី វង សូត ​បាន​នាំនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្តេចកិត្តិព្រឹទ្ធបណ្ឌិត ពីចម្ងាយ​ជូនចំពោះបងប្អូនកងទ័ព ដែលសម្តេច​តែងតែយកចិត្តទុកដាក់គិតគូរ ដល់បងប្អូនជានិច្ច មិនតែប៉ុណ្ណោះសម្តេច តែងតែដាស់តឿនដល់មន្ត្រីនៅសមរភូមិក្រោយ ត្រូវខិតខំកៀរគររកជំនួយគ្រប់បែបយ៉ាងទាំងសម្ភារៈ គ្រឿងឧបភោគបរិភោគ និងថវិកា ដើម្បីឧបត្ថម្ភជូនដល់កងទ័ព និងគ្រួសារទ័ព។

លោករដ្ឋមន្ដ្រីបញ្ជាក់ថា ទាំងអស់នេះធ្វើឡើង​ដើម្បីរួមចំណែក ក្នុងស្មារតីស្នេហាជាតិ តាមពាក្យស្លោក «ការពារជាតិ ដើម្បីទាំងអស់គ្នា ទាំងអស់គ្នា ដើម្បីការពារជាតិ»។

​ជាមួយគ្នានោះ លោក​សូមកោតសរសើរយ៉ាងខ្លាំង ដល់គំរូវីរភាពដ៏អង់អាចក្លាហានរបស់កងទ័ព ដែលបានលះបង់សាច់ស្រស់ឈាមស្រស់ មិនគិតពីអាយុជីវិត ដើម្បីបុព្វហេតុការពារប្រជាជន ការពារប្រទេសជាតិ ការពារអធិបតេយ្យភាព ការពារបូរណភាពទឹកដី មិនឲ្យសត្រូវណាមករំលោភបំពានទឹកដី ដ៏បវរនៃយើងសូម្បីតែមួយមីលីម៉ែត្រឡើយ។

សូមជម្រាបថា អំណោយរួមមាន​ ទឹកក្រូច​១០០កេស, មី​១០០កេស,​ ស្រាបៀរ​១០០កេស, ត្រីខ​១០កេស, ​ថវិកាចំនួន១០លានរៀល ឧបត្ថម្ភ​សម្រាប់ទីបញ្ជាការ, ថវិកាចំនួន១០លានរៀល សាងសង់ឃ្លាំង, ឧបត្ថម្ភដល់នាយទាហាន ពលទាហានចំនួន​៨៧៥នាក់ ​ក្នុងម្នាក់ទទួលលុយ៣០,០០០រៀល សរុបថវិកា​ ៤៦,២៥០,​០០០​រៀល៕