(ភ្នំពេញ)៖ កម្លាំងនគរបាលអន្ដោប្រវេសន៍ សហការជាមួយកម្លាំងនគរបាលមូលដ្ឋានខណ្ឌចំការមន នៅថ្ងៃទី១៦ ខែកញ្ញា ឆ្នាំ២០១៧នេះ បានចុះបង្ក្រាបជនជាតិចិន៥០នាក់ ដែលពាក់ព័ន្ធករណីបោកលុយតាមទូរស័ព្ទ និងប្រព័ន្ធ Internet។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានប្រាប់អង្គភាព Fresh News ឲ្យដឹងថា ប្រតិបត្តិការនេះធ្វើឡើង នៅតាមបណ្តោយផ្លូវ៤៦២ ស្ថិតនៅភូមិ៣ សង្កាត់ទន្លេបាសាក់ ខណ្ឌចំការមន ដែលស្ថិតក្រោមការសម្របសម្រួលពី ព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ។
ប្រធាននាយកដ្ឋានរូបនេះ បានបញ្ជាក់ថា ជនជាតិចិនដែលបានឃាត់ខ្លួនក្នុងប្រតិបត្តិការនេះ មានចំនួន៥០នាក់ ក្នុងនោះស្រី៧នាក់ ដែលបានធ្វើសកម្មភាពបោកលុយតាមប្រព័ន្ធទូរស័ព្ទ និងប្រព័ន្ធ Internet។
បច្ចុប្បន្នជនជាតិចិនទាំង៥០នេះ ត្រូវបានបញ្ជូនទៅកាន់នាយកដ្ឋានអន្តោប្រវេសន៍ ក្រសួងមហាផ្ទៃ ដើម្បីចាត់ការបន្ដតាមនីតិវិធី៕
