(កំពង់ស្ពឺ)៖ កម្លាំងអាវុធហត្ថស្រុកគងពិសី សហការជាមួយកម្លាំងអាវុធហត្ថលើផ្ទៃប្រទេស បានធ្វើការឃាត់ខ្លួនបុរស២នាក់ ខណៈកំពុងដឹកជញ្ជូនឈើម្រេញ ជាង៧ម៉ែត្រគូប ដោយខុសច្បាប់ នៅថ្ងៃទី១៥ ខែកញ្ញា ឆ្នាំ២០១៧ តាមបណ្ដោយផ្លូវជាតិលេខ៤១ ចន្លោះគីឡូម៉ែត្រលេខ២៧-២៨ ស្ថិតក្នុងភូមិសំរោង ឃុំស្នំក្រពើ ស្រុកគងពិសី។
កម្លាំងអាវុធហត្ថដែលចូលរួមប្រតិបត្ដិការនេះ បានលើកឡើងថា កម្លាំងជំនាញបានប្រដេញ រហូតចាប់បានរថយន្ត០១គ្រឿង ម៉ាកហ៊ីយ៉ានដាយ ពណ៌សលាយខៀវ ពាក់ស្លាកលេខភ្នំពេញ3A-1476 ដឹកឈើប្រភេទម្រេញចំនួន១៤ដុំ ស្មើជាង៧ម៉ែត្រគូប ហើយក្នុងនោះឃាត់បានបុរស២នាក់ អ្នកបើកបរឈ្មោះ ផុន ដា អាយុ៣៣ឆ្នាំ រស់នៅភូមិសំបួរ ឃុំតាំងស្យា ស្រុកភ្នំស្រួច និងអ្នករួមដំណើរ ឈ្មោះ ស៊ុ ចំរើន អាយុ៣៣ឆ្នាំ នៅភូមិចាម ឃុំស្វាយចចឹប ស្រុកបសេដ្ឋ ខេត្តកំពង់ស្ពឺ។
ក្រោយប្រតិបត្តិការកម្លាំងអាវុធហត្ថបានបញ្ជូនវត្ថុតាង ទៅឲ្យផ្នែករដ្ឋបាលព្រៃឈើដើម្បីចាត់ការបន្ដ៕
