(ភ្នំពេញ)៖ ដើម្បីរួមគ្នារក្សាអនាម័យដល់សិស្សសាលា បង្ការការជៀសផុតពីជំងឺឆ្លងនានា ក្រុមហ៊ុនផលិ​ត​សាប៊ូចំនួនពីរ រួមមានក្រុមហ៊ុន Cow Brand និងក្រុមហ៊ុន NAKAMURA បានរួមគ្នាចំណាយថវិកា​ប្រមាណ៨ម៉ឺនដុល្លារ ផលិតសាប៊ូ និងនាំមកចែកចាយដោយឥតគិតថ្លៃ ដល់សិស្សសាលាប៊ែលធី​ចំនួន ១៨សាខា ដោយមានសិស្សសរុបចំនួន៣៥០០០នាក់។

ការចែកចាយសាប៊ូដោយឥតគិតថ្លៃនេះ ធ្វើឡើងដើម្បីពង្រឹងដល់សិស្សានុសិស្សទាំងអស់ឲ្យចេះរក្សា​អនាម័យ​ លាងសំអាតដៃ​មុនពេលបរិភោគអាហារ ក្រោយពេលបន្ទោបង់ជាដើម ដោយក្នុងនោះក៏មានការ​ ការបង្ហាញពីរបៀបលាងសំអាតដៃពីអ្នកគ្រូ លោកគ្រូ មកពីប្រទេសជប៉ុន ដើម្បីឲ្យកាន់តែយល់​ច្បាស់​បន្ថែម​ទៀតពីការរក្សាអនាម័យសុខភាព។

លោក លី ឆេង អគ្គនាយកប្រចាំសាលាប៊ែលធី ក៏បានថ្លែងអំណរគុណយ៉ាងជ្រាលជ្រៅ​ចំពោះ ក្រុមហ៊ុនសាប៊ូទាំងពីរ ដែលបានចែកចាយសាប៊ូរក្សាអនាម័យដ ល់សិស្សានុសិស្សប្រចាំ​សាលាប៊ែល​ធីដោយឥតគិតថ្លៃ និងណែនាំសិស្សទាំងអស់ឲ្យចេះរក្សាអនាម័យដល់ខ្លួនឯង។

លើសពីនេះទៅទៀត ដើម្បីអបអរបុណ្យភ្ជុំបិណ្ឌប្រពៃណីជាតិខ្មែរ ក្រុមហ៊ុន Cow Brand និងក្រុមហ៊ុន NAKAMURA ក៏បានផ្ដល់ជូនសាប៊ូដល់សិស្សទាំងអស់ ប្រើប្រាស់ក្នុងគ្រួសារ ឬជូនឪពុក ម្ដាយ ជាពិសេស​បានប្រើប្រាស់ក្នុងពេលទៅលេងស្រុកកំណើតផងដែរ។

សូមបញ្ជាក់ថា ក្រុមហ៊ុន Cow Brand និងក្រុមហ៊ុន NAKAMURA បាននាំចូលផ្សាច់មុខ និងចែក​ចាយ​សាប៊ូ ម៉ាក Cow Brand សញ្ញារូបគោអស់រយៈពេល៩ឆ្នាំមកហើយនៅក្នុងប្រទេសកម្ពុជា៕