(ភ្នំពេញ)៖ ផ្សារ Jet's Container មានរៀបចំព្រឹត្តិការណ៍មួយ មានឈ្មោះថា «ភ្ជុំមហាគ្រួសារខ្មែរ» ដែលធ្វើឡើងក្នុងគោលបំណង ដើម្បីអបអរសាទរពិធីបុណ្យភ្ជុំបិណ្ឌ ដែលជាបុណ្យប្រពៃណីជាតិខ្មែរដ៏ធំ តាំងពីដូនតាមក និងដើម្បីជាការជួបជុំកម្សាន្តសប្បាយ មុនពេលដែលបងប្អូនប្រជាពលរដ្ឋ ទៅកាន់ស្រុកកំណើតរៀងៗខ្លួន ក្នុងឱកាសបុណ្យភ្ជុំនេះ។ អ្វីដែលប្លែកសម្រាប់អ្នកចូលរួម គឺកម្មវិធីមានអ្នកដើរបង្ហាញម៉ូដ តុបតែងខ្លួនដូចប្រេត ខណៈកម្មវិធីនេះ មានលក្ខណៈស្រដៀងទៅ នឹងបុណ្យ Halloween របស់បរទេស ព្រោះភ្ញៀវ តារាចម្រៀង Original Song និងអ្នកដើរម៉ូដ តម្រូវឲ្យតុបតែងមុខមាត់ដូចប្រេត ខ្មោច ព្រាយ ជាដើម។
លោកឧកញ៉ា ស្រី ចាន់ថន អគ្គនាយកក្រុមហ៊ុន «Jet's Container» បានថ្លែងថា ព្រឹត្តិការណ៍ដែលរៀបចំឡើង នៅថ្ងៃទី១៦ខាងមុខនេះ ក្នុងនោះអត់មានខ្ទង់ចំណាយ ឬចំណេញអ្វីទាំងអស់ ខណៈដែលកម្មវិធីនេះ រៀបចំឡើងក្នុងគោលបំណង ឲ្យបងប្អូនសប្បាយរីករាយ មុននឹងទៅលេងស្រុកកំណើត។ ក្នុងកម្មវិធីមានតារាចម្រៀង Original song ព្រមទាំងតារាសម្ដែង ចូលរួមប្រមាណចន្លោះពី៥០ទៅ១០០ ដែលសុទ្ធសឹងជាអ្នកស្ម័គ្រចិត្តជួយ ដោយមិនយកកម្រៃឡើយ។
លោកឧកញ៉ា សង្ឃឹមយ៉ាងមុតមាំថា កម្មវិធីនេះ នឹងមានភ្ញៀវចូលចូលរួម ចន្លោះពី៥០០០នាក់ ទៅ១០០០០នាក់ ហើយកម្មវិធីនេះ នឹងទាក់ទាញភ្ញៀវបរទេសឲ្យកាន់តែស្គាល់ ជំនឿនៃបុណ្យភ្ជុំបិណ្ឌ ដែលបន្សល់ទុកតាំងពីជំនាន់ ដូនតាមកម្ល៉េះ។ ជាមួយគ្នានេះ យើងក៏បានលើកទឹកចិត្ត ដល់អាជីវករនៅក្នុងផ្សារ «Jet's Container»របស់យើង ឲ្យផ្ដល់ជូននូវ ការបញ្ចុះតម្លៃពិសេសណាមួយ ដល់អតិថិជន ដែលបានមកចូលរួម នៅក្នុងកម្មវិធីនេះ។
ដោយឡែកលោក ប៉ានី វិរៈរិទ្ធ ប្រធានផ្នែកផលិតកម្មវិធីប្រចាំក្រុមហ៊ុន Clip Media បានលើកឡើងថា ដោយសារតែអំឡុងពេលនេះ ជារដូវកាលភ្ជុំបិណ្ឌ ទើបរូបលោក និងក្រុមហ៊ុន២ ផ្សេងទៀតចាប់ដៃគ្នាបង្កើតកម្មវិធី «ភ្ជុំមហាគ្រួសារខ្មែរ» នេះឡើងក្នុងគោលបំណង ដើម្បីឲ្យបងប្អូនប្រជាពលរដ្ឋខ្មែរ បានលេងកម្សាន្ត មុនពេលត្រឡប់ទៅជួបជុំគ្រួសារ នៅស្រុកកំណើត។ តែទោះបីជាភ្ញៀវ ដែលមិនបានតុបតែងមុខមាត់ដូចប្រេត បើសិនជាពួកគាត់ចង់ចូលរួម ពួកគាត់អាចចូលរួមបានដូចគ្នា ព្រោះកម្មវិធីនេះយើងអត់លក់សំបុត្រនោះទេ និងផ្ដល់ជូនឲ្យបងប្អូនទស្សនា បានដោយសេរី។
កម្មវិធី «ភ្ជុំមហាគ្រួសារខ្មែរ» នឹងប្រព្រឹត្តិទៅនៅថ្ងៃទី១៦ ខែកញ្ញា ឆ្នាំ ២០១៧ ខាងមុខនេះ ត្រូវនឹងបិណ្ឌទី១១ នៅផ្សារ «Jet's Container» ចាប់ពីវេលាម៉ោង៧ យប់ដល់ម៉ោង២រំលងអាធ្រាត្រ៕
