(ចិន)៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងប្រាប់និស្សិតជាង១០០នាក់ ដែលទទួលបានអាហារូបករណ៍សិក្សានៅប្រទេសចិនថា ក្មួយៗនិស្សិតទាំងអស់ ត្រូវខិតខំរៀនសូត្រ ដើម្បីយកចំណេះដឹងមកបម្រើ ប្រទេសជាតិ និងចូលរួមថែរក្សាសន្តិភាពឲ្យ បានរឹងមាំជាមួយរាជរដ្ឋាភិបាលកម្ពុជា។ សម្តេចតេជោ បន្តថា ក្មួយៗនិស្សិត ទាំងអស់ខិតខំរៀនសូត្រ និងចូលរួមថែរក្សាសន្តិភាព ដើម្បីយើងទាំងអស់គ្នាកាន់តែមានឱកាស ទាំងក្នុងការកសាងខ្លួនយើងផង ក្រុមគ្រួសារយើងផង និងសង្គមជាតិទាំងមូល។
សម្តេចតេជោ ហ៊ុន សែន មានប្រសាសន៍បែបនេះ ខណៈសម្តេចបានអញ្ជើញជួបនិស្សិត សម្តេចតេជោ ហ៊ុន សែន បានអញ្ជើញជួបនិស្សិត ជាង១០០នាក់ ដែលបានអាហារូប ករណ៍ និងកំពុងសិក្សានៅក្នុងប្រទេសចិន នៅថ្ងៃទី១២ ខែកញ្ញា បន្ទាប់ពីអញ្ជើញសម្ពោធ ពន្លាជាតិ និងទស្សនាសាលពិព័រណ៍ពាណិជ្ជកម្មកម្ពុជា។
ជាការឆ្លើយតប ក្រុមនិស្សិតទាំងអស់ បានសម្តែងសេចក្តីរីករាយ និងថ្លែងអំណរគុណយ៉ាងជ្រាលជ្រៅ ដល់សម្តេចតេជោ នាយករដ្ឋមន្រ្តី ដែលបានឆ្លៀតឱកាស ជួបសំណេះ សំណាល ជាមួយពួកគេដូចជាកូនក្មួយពិតៗ ដែលកំពុងសិក្សានៅក្នុងប្រទេសចិន។ ក្រុមនិស្សិតនៅទីនេះ តែងតែយកចិត្តទុកដាក់ជួយនិស្សិតដែលទើបមកដល់ថ្មីៗ ដែលកន្លងមកមានជាង៣០០នាក់។ បច្ចុប្បន្ននេះ មាននិស្សិតប្រមាណជាង១២០០នាក់ កំពុងសិក្សានៅក្នុង ប្រទេសចិន។
ជាមួយគ្នានោះ ក្រុមនិស្សិតទាំងអស់ ក៏បានគាំទ្រដល់ចំណាត់ ការរបស់រាជរដ្ឋាភិបាលក្នុងការទប់ស្កាត់បដិវត្តិពណ៍គ្រប់ រូបភាព និងគាំទ្រយ៉ាងពេញទំហឹងនូវចំណាត់ការ ចំពោះជនក្បត់ជាតិ ដែលមានបំណងធ្វើឲ្យប្រទេសជាតិអន្តរាយ។
នៅថ្ងៃដដែលនោះ សម្តេចតេជោនាយករដ្ឋមន្រ្តី បានឧបត្ថម្ភថវិការបន្ថែម២ម៉ឺនដុល្លារ បូកនឹងថវិកាអំណោយសភាពាណិជ្ជកម្ម កម្ពុជា២ម៉ឺនដុល្លារទៀតដើម្បីទំនុកបម្រុង ដល់សកម្មភាពការងាររបស់ក្រុមសមាគមនិស្សិតប្រចាំប្រចាំទេសចិន។ សម្តេចតេជោ បានឧបត្ថម្ភថវិកាក្នុងម្នាក់ ៥០០ដុល្លារ ដល់និស្សិតចំនួន១៤២នាក់ ដែលបានមកចូលរួមនៅក្នុង ពិធីសំណេះសំណាលសួរសុខទុក្ខនៅថ្ងៃទី១២ ខែកញ្ញា ឆ្នាំ២០១៧នេះ។
តំណាងក្រុមសមាគមនិស្សិតប្រចាំប្រទេស ចិនបានថ្លែងអំណគុណយ៉ាងជ្រាលជ្រៅបំផុតជូនចំពោះ សម្តេចតេជោ ហ៊ុន សែន ដែលតែងតែយកចិត្ត ទុកដាក់ចំពោះកូនក្មួយនិស្សិតដែលកំពុង សិក្សានៅបរទេស។
សម្តេចតេជោ បានបញ្ជាក់ប្រាប់ ក្មួយៗ និស្សិតថា កម្ពុជា និងចិនគឺមានទំនាក់ទំនងជាមិត្ត និងជាបងប្អូនដ៏ល្អ ជាប្រពៃណី តាំងពីជំនាន់សម្តេចតា សម្តេចតាទួត នៃយើងមកម៉្លេះ ហើយសម្តេចតេជោ កំពុងបន្ត និងពង្រឹងនូវ ចំណងមិត្តភាព និងកិច្ចសហប្រតិបត្តិការគ្រប់ជ្រុងជ្រោយ ជាមួយមហាមិត្តចិន ដែលគ្មាននរណាមកបំបែកបានឡើយ។
ប្រមុខរាជរដ្ឋាភិបាលកម្ពុជា ក៏បានផ្តាំផ្ញើឲ្យនិស្សិតគោរពច្បាប់ប្រទេសចិន ពេលកំពុងសិក្សា និងរស់នៅទីនេះ ហើយត្រូវខិតខំដើម្បី ទទួលផលនៅខាងមុខ ព្រោះមានក្រុមវិនិយោគចិនជាច្រើន បោះទុនវិនិយោគនៅកម្ពុជាហើយត្រូវខិតខំ សិក្សាភាសាចិនឲ្យបានជ្រៅជ្រះ។
សម្តេចតេជោ ហ៊ុន សែន បានជម្រាបប្រាប់និស្សិតទាំងអស់ថា សម្តេចនឹងបន្ត ធ្វើជានាយករដ្ឋមន្រ្តី២អាណត្តិទៀត បើគណបក្សប្រជាជន នៅតែបន្តឈ្នះឆ្នោត ដើម្បីការពារសន្តិភាព និងអភិវឌ្ឍន៍ប្រទេសឲ្យកាន់តែរីកចម្រើន។
គួរបញ្ជាក់ថា កាលពីខែឧសភា ឆ្នាំ២០១៦កន្លងទៅ សម្តេចតេជោ ហ៊ុន សែន ធ្លាប់បានអញ្ជើញជួបក្រុមនិស្សិត នៅប្រទេសចិនម្តង រួចមក ហើយព្រមទាំងបានឧបត្ថម្ភថវិកាមួយចំនួន ដើម្បីជួយដល់សមាគមក្នុងការទ្រទ្រង់ និងជួយដល់និស្សិត ដទៃៗទៀត ដែលត្រូវការជំនួយពេលបានមកសិក្សានៅប្រទេសចិន៕
