(ភ្នំពេញ)៖ លោក ឃួង ស្រេង អភិបាលរាជធានីពេញ និងលោកស្រី លោក ម៉ប់ សារិន ប្រធានក្រុមប្រឹក្សារាជធានី នៅរសៀលថ្ងៃទី១២ ខែកញ្ញា ឆ្នាំ២០១៧នេះ បានដឹកនាំមន្ត្រីក្រោមឱវាទទាំងអស់ អញ្ជើញចូលរួមកាន់បិណ្ឌទី៨ នៅវត្តជេដ្ឋាឧត្តម ហៅវត្តគ្រួស ស្ថិតនៅក្នុងសង្កាត់សំរោង ខណ្ឌព្រែកព្នៅ ដែលពិធីនេះធ្វើឡើងស្របតាមប្រពៃណីព្រះពុទ្ធសាសនា និងដើម្បីប្រមូលបច្ច័យមួយចំនួនកសាងទីអារាមវត្តនេះ ឲ្យមានការអភិវឌ្ឍន៍ ស្របពេលដែលប្រទេសកម្ពុជាទាំងមូល កំពុងតែអភិវឌ្ឍន៍រីកចំរើនយ៉ាងឆាប់រហ័សនោះ។
ពិធីដាក់បិណ្ឌនេះ លោក ឃួង ស្រេង និងលោកស្រី ព្រមទាំងមន្ត្រីក្រោមឱវាទទាំងអស់ បានសូត្រមន្តដើម្បីកាន់បិណ្ឌ និងប្រគេនទេយ្យទានមួយចំនួន ដល់ព្រះសង្ឃជាច្រើនអង្គដែលគង់នៅទីអារាមវត្តជេដ្ឋាឧត្តម ហៅវត្តគ្រួស លុះព្រឹកថ្ងៃទី១៣ ខែកញ្ញា ត្រូវនិងវេណបិណ្ឌទី៨ លោក ឃួង ស្រេង និងលោកស្រី ព្រមទាំងមន្ត្រីក្រោមឱវាទទាំងអស់ និងអញ្ជើញមកទីអារាមនេះម្តងទៀត ដើម្បីប្រគេនទេយ្យទាន ម្ហូបអាហារ បង្អែមជាដើម ដល់ព្រះសង្ឃ ដើម្បីឧទ្ទិសកុសល ផលបុណ្យជូនដល់បុព្វកាលរីជន មានមាតា បីតា ជីជូន ជីតា ញាតិកាល ទាំង៧សន្តាន ដែលបានបែកកាយ រំលាយដ្ឋានទៅកាន់លោកខាងមុខ។
គួររំលឹកថា បុណ្យនេះត្រូវបានពុទ្ធសាសនិកខ្មែរធ្វើឡើងរៀងរាល់ឆ្នាំចាប់ពី ថ្ងៃ១រោច ដល់ថ្ងៃ១៥រោច ខែភទ្របទ(ចន្លោះ ខែកញ្ញា)។ ពុទ្ធសាសនិកខ្មែរធ្វើបុណ្យ នេះដោយការយកទេយ្យទានផ្សេងៗមាន អាហារជាដើមទៅផ្គត់ផ្គង់ព្រះសង្ឃ នៅក្នុងវត្តដែលកំពុងគង់ចាំវស្សារយៈពេល១៥ថ្ងៃគត់។
ដោយហេតុពុទ្ធសាសនិកមានការមមាញឹក ចំពោះកិច្ចានុកិច្ចប្រចាំថ្ងៃ និងដើម្បីធានាថា ព្រះសង្ឃត្រូវបានផ្គត់ផ្គង់ជាទៀងទាត់នោះ ទើបគេចែកជាក្រុមៗដាក់វេនគ្នាយក ទេយ្យទានទៅប្រគេនព្រះសង្ឃរយៈពេល១៤ថ្ងៃ ចាប់ពីថ្ងៃ១រោច ដល់ថ្ងៃ១៤រោចខែភទ្រ បទហើយឱ្យឈ្មោះថា វេនទី១ រហូតដល់វេន ទី១៤។
រយៈពេល១៤ថ្ងៃនេះឱ្យឈ្មោះថា បុណ្យកាន់បិណ្ឌឬបុណ្យដាក់បិណ្ឌ។ ចំណែកថ្ងៃ១៥រោច ដែលជាថ្ងៃចុងក្រោយនោះពុទ្ធសាសនិក ពីគ្រប់វេនទាំងអស់បាន មកជួបជុំគ្នាធ្វើទានចំពោះសង្ឃជាមួយគ្នា ដើម្បីបញ្ចប់បុណ្យកាន់បិណ្ឌ។ លុះថ្ងៃទី១៥ត្រូវ នឹងថ្ងៃ១៥រោចខែភទ្របទដែលជាថ្ងៃចុង ក្រោយនេះឱ្យឈ្មោះថា ភ្ជុំបិណ្ឌឬថ្ងៃភ្ជុំបិណ្ឌ៕
